Hozeya
8 Jihova wambe:
“Xikenu o jikoloneta! O jinguma ja mukwiza kala jiholokoko phala kubhânga ni mundu wami,
Mukonda o mundu wami, kabelesela o kikutu kyami, abhukumukina o kijila kyami.
2 Ene a mudikola kokwami: ‘Nzambi yetu tata! Etu tu akwa Izalayele, twa kwijiya!’
3 Akwa Izalayele aditunu o ima yambote.
Ene anda ku azukutisa ku jinguma jâ.
4 Ene asolo jisobha, maji ka ngibhula.
Adisolela ilamba sumbala eme ki nga axikina.
Ene akwata o phalata ni ulu yâ, ya abhange iteka,
Mu kubhanga kiki, adisotela kibwika.
5 Eye Samadiya, o kiteka kyê kya ngombe ki wene mubheza, ngaditunu-kyu.
Nganda kukwatela njinda, eye Samadiya.
Mwanda dizelesa thembu kuxi?
6 O kiteka kiki, kyatundu mu Izalayele.
Akibhange ku diyala dyala ni uhete wa kusonga,
O kiteka kiki ki Nzambi, kana.
O kiteka kya ngombe kyala ku Samadiya, anda kitutujula.
7 Ene a mubhanga ima yayibha, kyedi kala a mukuna kitembwe.
Kyenyiki, ene anda bhongolola ima yayibha, yedi kala kitembwe kya kibhungu.*
O ixina ki yanda bhana kudya,
O yoyo isabhuka, ki ibhana phala kubhanga-nayu fuba ya tiliku.
Né mwene se o jimbutu jisabhuka, anda jidya ku akwa jixi jengi.
8 Akwa Izalayele anda ku abwika.
Ene anda ku amwanga mwaxaxi ka ifuxi,
Anda kala kála kitutu kyakambe valolo.
9 Mukonda ene abande ku Asídya, kala jumendu ya muxitu ya mukwenda ubheka wê.
Akwa Efalayíme ayi musota iwaya.
10 Sumbala ene ayi musota iwaya mwaxaxi ka ifuxi,
Kindala nganda kwa ongeka.
Ene anda tala hadi mukonda dya ibhidi yanda kwabhekela o sobha ni ilamba.
11 Akwa Efalayíme, abhange jikalatódyu javulu phala kuta ituxi.
O jikalatódyu jiji a jikitula ididi yâ yakutela ituxi.
12 Eme nga asonekena ima yavulu mu divulu dyami dya kijila,
Maji o ijila yiyi, ene ka ibhana valolo.
13 Ene a ngibhakwila jisata, anga adya o xitu.
Maji ene ka ngisangulukisa, kyene kyambe Jihova.
Nganda lembalala o ituxi yâ, nganda ku a kastikala mukonda dya ituxi yâ.
Ene avutuka* ku Ijitu.
14 Akwa Izalayele ajimbi yó wa abhange, ya atungu jitembulu.
Akwa Judá atungu jimbanza javulu jokondoloke ni ilumbu.
Maji o jimbanza jâ, nganda jita túbhya.
O túbhya twanda bwika o jisabhalalu mu jimbanza jâ joso.”