Mikeya

3 Eme ngambe: “Ivwenu, ngamidyondo, enu mu atwameni a dibhata dya Jakobo,

Enu mwene mutumina o dibhata dya Izalayele.

 2 Enu mwazembe o ima yambote, mwazolo o ima yayibha,

Mukatula o kikonda ku mukutu wa yó atokala ku mundu wami ni xitu ku ifuba yâ.

 3 Enu we mwene mudya o xitu ya mundu wami,

Ni ku akatula o kikonda,

Enu mubula o ifuba, mu iwanuna mu ibhasu-ibhasu,

Kala kibhanga o muthu ulamba o xitu ni ifuba mu imbya yadikota.

 4 Kwanda kwiza kithangana, ene anda dikola kwa Jihova mu kubhinga kikwatekesu,

Maji mwene kanda ku a tambwijila.

Mu kithangana kyenyokyo, mwene kanda ku akwatekesa,

Mukonda dya ima yayibha yabhange ene.

 5 O jipolofeta a munganala o mundu wami,

Akanena o kutululuka kwa yó u abhana kudya,

Maji o yó ka abhana kima phala kudya, a mukanena kulwa-nê ita. Kiki kyene kyambe Jihova.

 6 Enu mwanda kala mwavundu kala mu usuku, ki mwanda tala isumwa.

Mwanda kala ngo mwavundu, kikwanda kala kuzambula.

O dikumbi dyanda boba phala o jipolofeta,

O kizuwa kyanda vunda phala ene.

 7 O akwa kutala o isumwa,* jisonyi janda ku akwata,

O akwa kuzambula, anda tandanganya.

Enyoso anda xita o makanu mâ,

Mukonda Nzambi kanda kwatambwijila.’”

 8 Eme-phe, o nzumbi ya Jihova ya ngibhana kutena kwavulu,

Ya ngibhana we o kutena kwa kufundisa ni kuyuka ni kuswina,

Phala kutangela Jakobo o kubhukumuka kwê, ni ituxi ya akwa Izalayele.

 9 Ngamidyondo, ivwenu enu mu atwameni a dibhata dya Jakobo,

Énu mwene mutumina mu dibhata dya Izalayele,

Mwazembe o kuyuka, mwene mulungulula o ima yambote mu ima yayibha,

10 Enu mutunga o mbanza ya Ziyone mu kubhubhisa manyinga, mutunga o mbanza ya Jeluzaleme mu kubatula milonga ni mangonya.

11 O atwameni’ê, ene mubhinga kitadi mu kufundisa o athu,

O akunj’yê, ene mu afuta phala kulonga,

O jipolofeta jê, ene mubhinga kitadi* phala kuzambula.

12 Kyenyiki, mukonda dyenu,

O mbanza ya Ziyone anda idima kala kya dima o mabhya,

Jeluzaleme yanda kituka kiphulunguzu kyahatu,

O mulundu wa inzo* ya Nzambi, wanda kituka muxitu wezala ni mixi.