Nahumu
2 Ninive, o yó wanda ku mwanga weza mubhânga n’eye.
Langidila o ilumbu yé,
Ta alangidi mu njila.
Disokejeke phala o ita, bhongolola o masoladi mê moso.
2 Mukonda, Jihova wanda bheka dingi o fuma ya Jakobo,
Kifwa, o fuma ya Izalayele,
Mukonda o jinguma ja abwika,
Jabwika we o jithangu ja mividi yâ.
3 O jingubu ja jinguma ja akwa Ninive ja kusuka,
O masoladi mê ate izwatu yakusuka.
Mu kizuwa kyadisokejeka phala o ita
O makalu mâ a ita, abhenya kala mulengu wa túbhya,
Ene akwata o jisosa jâ mu ukexilu ukwatesa wôma.
4 O makalu a ita a jinguma jâ, enda ni lusolo mu ikoka.
A banda a kulumuka mu ididi mubhita athu avulu.
A bhenya kala túbhya, a sedima kala jinzaji.
5 O sobha* wanda kwixana o jikabhitangu jê.
Andaya ni kulenga kate ku ilumbu ya mbanza,
Phala ku ita ifikidilu.
Mu kulenga anda dibhukajana.
6 O mabhitu a jingiji anda kwa jikula,
O inzo* anda ibula.
7 Akizwela kya: Na mvwale* a muzula,
A mwambata ku ubhika.
O abhik’ê a ahatu a mudila, kala kyene mudila o membe.
8 O mbanza ya Ninive yedile kala kizanga kya menya tunde ukulu,
Maji kindala o athu a mulenga-mu.
Anda kwa handekela, exi: “Imanenu! Imanenu!”
Maji séku muthu wanda sakuka n’a tale ku dima.
9 Ambatenu o phalata ni ulu!
O mbanza yezala ni ima yoso yavalolo.
Mwala jimbote javulu.
10 O mbanza a imwanga-mwanga, a ibwika, yaxala ngundu!
O athu ala ni wôma wavulu, o inama ni jiphuna jâ, ja muteketa
Enyoso aluwala.
11 Ihi yabhiti ni mbanza yedile kala diswamenu dya jihoji, kwexile mudila o ana a jihoji,
Kwexile mutunda o hoji ni monê,
Se kumona muthu wa akwatesa wôma?
12 O hoji, yexile mukwata yama yasoko phala kudikila an’ê.
Yexile mujibha we yama phala o jihoji ja akaji kudya,
O kididi kyê kya kubhaka o xitu yakwata, kyezalele.
O diswamenu dyê dyezalele we ni xitu.
13 Jihova dya ifuxi wambe kiki: “Talesa! Eme nganda kukastikala,
Nganda kwoha o makalu mé a ita,
O xibhata yanda jibha o jihoji jé.
O yama i wene mukwata mu unyanga, nganda izubha mu ixi
O mázwi a akunj’é, kanda kwa evwa dingi.”