Ikalakalu ya Jipoxolo
22 “Enu akwetu phange jami ni enu mu jitata jami, kindala ivwenu o ima i nganda mitangela.” 2 Kya mwivu kuzwela mudimi dya Hebalayiku, ene adixibha dingi. Kyenyiki, mwene wambe: 3 “Eme ngi Judé, a ngi vwalela mu Tálusu mu mbanza ya Silisya, maji a ngi longo mu mbanza yenyiyi kwa Ngamadiyele. A ngi longo we kyambote o Kijila kya jikuku jetu, ni kubheza Nzambi ni kuswina kwoso kala ki mwa mubhanga. 4 Eme ngakexile mukwata o mala ni ahatu akexile mukayela o Njila yiyi, ni kutuma ku ata mu kaleya, ni kwa zukutisa katé mu ufwilu wâ. 5 O mukunji wadikota ni adyakime oso a Jijudé ala jimbangi ja maka enyá. Ene a ngibhana mikanda phala ku yambata ku atwameni a Jijudé mu mbanza ya Damasku, eme ngakexile muya-mu phala kubheka mu Jeluzaleme oso akexile mwenyomo phala kwabeta, kwakuta, ni kwatalesa hadi.
6 “Maji kyoso ki ngakexile mukwenda, ku mediya, ki nga zukamene kyá mu mbanza ya Damasku, mu kithangana kyenyókyo kwa ngi mwikina mukengeji watundu ku dyulu. 7 Eme ngabu bhoxi, ngevu dízwi dya ng’ambela: ‘Sawúlu, Sawúlu, mukonda dyahi wa mu ngi zukutisa?’ 8 Eme nga mu tambwijila: ‘Éye nanyi Ngana?’ Mwene wa ng’ambela: ‘Éme Jezú dya Nazalé, yó wa mu mu zukutisa.’ 9 O mayala akexile mukwenda n’eme amono o mukengeji, maji katendela o izwelu ya muthu wakexile muzwela n’eme. 10 Bhenyobho nga mwibhwidisa: ‘Ngana, ihi i ngatokala kubhanga?’ O Ngana wa ngi tambwijila, wixi: ‘Balumuka, ndé ku Damasku, kwenyóko anda kutangela yoso i watokala o kubhanga.’ 11 Kuma ki ngatenene kumona kima mukonda dya kubhenya kwa mukengeji u nga monene, a ngikwata mu lukwaku kwa yó akexile n’eme, anga a ng’ambata ku Damasku.
12 “Mwenyomo mwexile diyala amwixana Ananiya, mwene wexile muxila Nzambi kala kilonga o Kijila kya Mozé, o Jijudé atungile mwenyomo akexile ku muzwela kyambote. 13 Ananiya weza mu ngisota. Wabhixila bhu ngakexile, yu wa ngyambela: ‘Sawúlu phang’yami, jikula o mesu ni u mone dingi!’ Mu kithangana kyenyókyo mesu mami ajikuka, éme nga mu mono. 14 Mwene wambe: ‘O Nzambi ya jikuku jetu, wa kusolo phala kwijiya o vondadi yê, phala kumona o muthu wayuka ni kwívwa o dízwi ditunda mu kanu dyê. 15 Mukonda wanda kala u mbangi yê bhu pholo dya athu oso, wa ima i wamono ni ima i wevu. 16 Mu kiki ihi i wa mukingila? Balumuka, ndé n’a ku batizale. Nzambi wanda loloka o ituxi yê, mukonda dya kukola o dijina dya Jezú.’
17 “Kyoso ki ngavutuka mu Jeluzaleme, ki ngakexile mu samba mu tembulu, ngamono kisumwa. 18 Ngamono Ngana Jezú, mwene wa ngyambela: ‘Tunda mu Jeluzaleme, mukonda o umbangi u wanda bhana walungu n’eme kanda uxikina.’ 19 Eme nga mwambela: ‘Ngana, ene ejiya kyambote kwila, mu malombe* moso eme ngakexile mukuta ni kubeta oso a kuxikana. 20 Ejiya we kwila kyoso kyakexile mujibha o mbangi yê Xitevá, bhene bhu ngakexile. Ngaxikina yoso yakexile mubhanga, éme nga bhakele o izwatu ya yó akexile mu mujibha.’ 21 Maji mwene wa ngitangela: ‘Ndé, nganda kutumikisa ku akwa jixi jengi.’”
22 Ene amwívu katé ku izwelu yiyi. Anga adikola ni dízwi dya swina, exi: “Jibhenu o diyala didi, mwene katokala kukala ku mwenyu!” 23 Kuma akexile mudikola kyavulu, ni ku kukumuna o izwatu yâ, ni kutakula mavu bhulu, 24 o kabhitangu ka kibuka kya masoladi, watumu kubokwesa Phawulu mu mbonge ya masoladi, phala ku mwibhwidisa ni ku mubeta ni kwijiya se mukonda dyahi o mundu wakexile mu dikola. 25 Kyazubha ku mukuta phala ku mubeta, Phawulu webhwidisa o kabhitangu ka masoladi wemanene bhenyobho: “O kwila mu kijila kyetu, kifwama kubeta mukwa Loma sé ku mufundisa?” 26 Kyoso o kabhitangu kya k’ivu, wayi mutangela o kabhitangu ka kibuka kya masoladi, wixi: “Ngana, ihi i wamesena o kubhanga? Mukonda o diyala didi mukwa Loma!” 27 O kabhitangu ka kibuka kya masoladi webhwidisa Phawulu: “Ngitangele, eye u mukwa Loma?” Mwene wixi: “Kyene.” 28 O kabhitangu ka kibuka kya masoladi wa mwambela: “O ujitu wakukala ngi mukwa Loma, nga usumbu ni kitadi kyavulu.” Phawulu wa mu vutwila: “Eme-phe, a ngivwala kyá ni ujitu yú.”
29 Mu kithangana kyenyókyo o mayala a mesenene ku mwibhwidisa ni ku mubeta, a muxisa. O kabhitangu ka kibuka kya masoladi wôma wa mukwata mu kwijiya kwila Phawulu wexile mukwa Loma, mukonda watumine ku mukuta ni malubhambu.
30 Mu kizuwa kyakayela, o kabhitangu kakibuka kya masoladi wamesenene kwijiya se mukonda dyahi o Jijudé akexile mutatela Phawulu. Mwene watumu ku mujituna, yu watumu o akunji a makota ni adyakime a mundu kudyongeka. Wa kulumuka kumoxi ni Phawulu, yu wa mwimanesa mwaxaxi kâ.