Hozeya
12 “Efalayíme udyelela ku kima kyakambe valolo.
O kumbi dyoso dya kambamba mwene ukayela,
O kitembwe ki bhusa ku mbandu ya thunda.
Mwene uta kikutu ni akwa Asídya, ubhana máji ku akwa Ijitu.
2 Jihova wanda fundisa Judá.
O Jakobo anda mubhana kastiku mukonda dya wendelu wê.
Mwene wanda mufuta, kala kyafwama o ibhangelu yê.
3 Mu mala dya manyâ, mwene wakwata ku kasende ka phang’yê.
Mwene wabhânge ni Nzambi ni nguzu yê yoso.
4 Mwene wabhânge ni anju, yu wa itolola.
Mwene wadidi, yu wa mudyondela.”
Nzambi wa musange ku Betele, kwenyoko wazwela yalungu n’etu.
5 Jihova Nzambi ya ifuxi,
O athu anda mulembalala mukonda dya dijina dyê, Jihova.
6 “Kyenyiki, vutuka kwa Nzambi yé.
Kala u mukwa henda, bhanga ima yambote.
Dyelela jinga kwa Nzambi yé.
7 Maji o musumbixi wala ni kizongelu kya makutu.
Mwene wa wabhela kunganala o athu.
8 Efalayíme wambe: ‘Eme ngakituka mwene ngi mvwama.
Ngala ni jimbote javulu.
Maji kimwanda sanga kitondalu né kituxi mu ikalakalu yami yoso.’
9 Maji tunde mu ixi ya Ijitu, eme Jihova, ngi Nzambi yé.
Nganda kubhangesa kwila utunga dingi mu jibalaka,
Kala mu izuwa ya jifesa.*
10 Eme ngexile muzwela ni jipolofeta.
Nga abhangesa kumona isumwa yavulu.
Ngexile mutuma o jipolofeta ku mizwelela ni ifika.
11 O athu ku Ngiliyade abhanga ipheteka ya wanga, atanga makutu.
O athu ku Jidingale, asatela jingombe.
O jikalatódyu jâ, jedi kala matumbu a matadi mu mabhya.
12 Jakobo walengela ku ixi ya Eleme.*
Kwenyoko, Izalayele wakalakala phala ku mubhana o muhatu.
Phala kutambula o muhatu, mwene wexile mu kwinga jimbudi.
13 Jihova watumikisa o polofeta yê phala kukatula Izalayele ku Ijitu.
Bhu lukwaku lwa polofeta, mwene wa alange.
14 Efalayíme waxingi kyavulu Nzambi.
Kikuma kyê kya manyinga kyanda nangenena.
O Ngana yê wanda mu kastikala mukonda dya ku mukwatesa jisonyi.”