Dya Dyanga Dya Malunda

10 O akwa Fidíxa exile mubhânga ni akwa Izalayele, o mayala akwa Izalayele alenge o akwa Fidíxa. Athu avulu akwa Izalayele a ajibha ku mulundu wa Jilibowa. 2 Akwa Fidíxa akayela Sawulu ni an’ê ya ajibha Jonatá, Abinadabe ni Malekizuwa, o an’a Sawulu. 3 O ita yabhonzele kyavulu phala Sawulu. O akwa kutakula o mifula a mumono, a mutakula mifula ya a mukwama kyavulu. 4 Kyenyiki, Sawulu wambela o mukwatekexi wê, wixi: “Kwata o xibhata, u ngijibhe, phala o yá akambe ku asaya, kangitalatale ni kuyibha kwoso.” Maji o mukwatekexi wê kamesenene ku mujibha, mukonda wexile ni wôma wavulu. Kyenyiki, Sawulu wasungu o xibhata yê, wadikubu-nayu, yu wabu bhoxi. 5 Mu kumona kwila Sawulu wafu, o mukwatekexi wê wakwata o xibhata, wadikubu we yu wafu. 6 Sawulu ni an’ê atatu ni mayala oso exile-nê, afu mu kizuwa kyenyokyo. 7 Kyoso o akwa Izalayele exile mu honga kyamono kwila Sawulu ni an’ê afu ni kwila o kifuxi kya masoladi kyalenge, ene atundu mu mbanza, ya alenge. Mukusuluka, akwa Fidíxa eza, ya atambula o mbanza.

8 Mu kizuwa kyakayela-ku, kyoso akwa Fidíxa kyayi mubhongolola o ima ya athu afu, asange o kimbi kya Sawulu ni kya an’ê ku mulundu wa Jilibowa. 9 Ene abatula o mútwe wa Sawulu, a muzula o kibhakatu kyê, ya atumikisa akunji phala kutula o ngonge mu jinzo ja jinzambi jâ, ni ku mundu. 10 Kyenyiki, akwata o kibhakatu kya Sawulu ya akitula mu inzo* ya nzambi yâ. O mútwe wê a unyenge mu inzo ya Dangoni.

11 Kyoso akwa Jabeze akexile mu Ngiliyade, kyevu yabhange akwa Fidíxa kwa Sawulu, 12 o masoladi oso ayi, akatula o kimbi kya Sawulu ni kya an’ê, ya a yambata ku Jabeze. Ene afundu o ifuba bhu mbandu a muxi wadikota ku Jabeze, ya ajejuwala mu sambwadi dya izuwa.

13 Kyenyiki, Sawulu wafu mukonda dya kubhukumukina Jihova, kabelesela o kizwelu kya Jihova ni mukonda we dya kusota o mukwa kuzambula, 14 muveji dya kusota o kikwatekesu kya Jihova. Mukonda dya kiki, mwene wa mubhakula phala kufwa, yu wabhangesa Davidi mon’a Jesé ku mubhingana ku usobha.