Ejidala

5 Mukusuluka polofeta Ajewu ni polofeta Zakadiya mulawula a Idu, azwela ni Jijudé akexile mu Judá ni mu Jeluzaleme, mu dijina dya Nzambi ya Izalayele, yó wexile mwa endesa.* 2 Bhenyobho, Nzolobabele mon’a Salatiyele ni Josuwa mon’a Jozadake, amateka kutunga dingi o inzo ya Nzambi, yexile mu Jeluzaleme, o jipolofeta ja Nzambi exile ni ene, a akwatekesa. 3 Mu thembu yenyoyo, Tatenayi o nguvulu ya mbandu kufwila o dikumbi ya ngiji ya Ewufalate, ni Setabozenayi, ni jikoleka jê a ebhwidisa: “Nanyi wa mitumina kutunga dingi o inzo yiyi ni kuzubha o ilumbu yê?” 4 A ebhwidisa we: “Ananyi a mubhanga o kikalakalu kiki?” 5 Maji Nzambi wexile mukwendesa o tufunga twa Jijudé, kyenyiki séku muthu wemanesa o kikalakalu, kate o maka yá kyeji bhixila kwa Sobha Dályu, ni kyoso kyeji vutwila o kitambwijilu kyê kyalungu ni maka enyá bhukaxi ka mukanda.

6 Yú wene o mukanda watumikisa Tatenayi, o nguvulu ya mbandu kufwila o dikumbi ya ngiji ya Ewufalate, ni Setabozenayi, ni jikoleka jê ni akwatekexi a jinguvulu, ja mbandu kufwila o dikumbi ya ngiji ya Ewufalate kwa Sobha Dályu. 7 Ene a mutumikisa mukanda wambele kiki:

“Sobha Dályu:

“O kutululuka kwoso kukale n’eye! 8 Sobha, ejiya-nakyu kwila twayi mu mbanza ya Judá mwala o inzo ya Nzambi yonene, o ilumbu yê a mu itunga ni matadi amakota ni mabaya. O mundu wa mubhanga o kikalakalu ni nguzu yoso, kyenyiki o kikalakalu kyamuya mwene ku pholo. 9 Mukiki twebhwidisa o tufunga twâ: ‘Nanyi wa mitumina kutunga o inzo yiyi ni kuzubha o ilumbu yê?’ 10 Twebhwidisa we o majina mâ, phala mu ku kusonekena tutene ku kutangela se ananyi ala ku pholo dya kikalakalu kiki.

11 “Ene a tutambwijila, exi: ‘Etu tu jiselevende ja Nzambi ya dyulu ni ixi, twamutunga dingi o inzo yatungile kya mivu yavulu ku dima, yazubhile o kutunga o sobha yonene ya Izalayele. 12 Maji, kuma o jitata jetu aluwalesa o muxima wa Nzambi ya dyulu, mwene wa abhakula bhu maku a Nabukodonozolo mukwa Kaladeya, o sobha ya Babilonya, mwene wabulu o inzo yiyi yu wambata o mundu ku Babilonya. 13 Maji mu muvu wa dyanga wa Silu Sobha ya Babilonya, Silu wabhana ngonge phala kutunga dingi o inzo ya Nzambi. 14 Kikyene ngo, Sobha Silu wa katwile mu tembulu ya Babilonya o itutu ya ulu ni ya phalata, yatokala mu inzo ya Nzambi, ya katwile Nabukodonozolo mu tembulu ya Jeluzaleme, yu wa yambatele mu tembulu ya Babilonya. O itutu yiyi a ibhana kwa Sebazale,* a musolele kwala Silu kala nguvulu. 15 Silu wa mwambela, wixi: “Ambata o itutu yiyi. Ndé u itule mu tembulu yala mu Jeluzaleme phala o inzo ya Nzambi, a itunge dingi bhu kididi kyê kyokulu.” 16 Mukiki, Sebazale weza yu wate o madisesa ma inzo ya Nzambi yala mu Jeluzaleme, ene mu itunga tunde mu kithangana kyenyokyo kate kindala ka izubha luwa.’

17 “Kindala se Sobha wa kiwabhela, atume kutokwesa mu madivulu a jisobha ja Babilonya, phala kumona se o Sobha Silu wabhele o ngonge phala kutunga dingi o inzo ya Nzambi yala mu Jeluzaleme, phala Sobha a twambele yoso yasolo mwene yalungu ni maka yá.”