Daniyele

11 O diyala wazwatele o izwatu ya linyu wambe, wixi: “Ku muvu wa dyanga wa sobha Dályu o mukwa Medya, ngeza mukwatekesa ni kuswinisa Mingyedi. 2 O maka u nganda kutangela, anda dikumbidila mwene:

“Mu utuminu wa Pélesa mwanda moneka sobha jitatu, o ya kawana yene yanda betakota mu kukala ni umvwama o jisobha jamukwa ndenge. Mukonda dya umvwama wavulu, wanda funyisa akwâ kubalukila o utuminu wa Ngelexa.

3 “Kwanda moneka sobha wanda kala ni ungana wavulu, mwene wanda tumina jixi javulu, wanda bhanga we yoso yamesena. 4 Maji kyoso kyanda kala ni kutena kwavulu, o utuminu wê anda umwanga ni ku u wanuna mu mbandu jiwana ja ngongo. O mbutu yê kiyanda tambula kima, kiyanda kala we ni kutena kwexile-naku kyoso kyexile mutumina, mukonda o utuminu wê anda mutambula-wu, anda ubhana ku athu engi.

5 “O sobha ya lwiji, kifwa, muthu umoxi ku ilamba yê, wanda swina kyavulu. Maji sayi-ku mukwa wanda mutunda mu nguzu, wanda tumina jixi javulu. Wanda betakota mu kukala ni ungana, mwene* ndenge.

6 “Mu kubhita mivu, ene anda ta kikutu. O mon’a kilumba a sobha ya lwiji, wandaya muta kikutu* ni sobha ya thunda. Maji o lukwaku lwa mona kilumba kilwanda kala ni nguzu, o sobha kanda kala dingi ni kutena. O mona kilumba anda mubhakula kumoxi ni yó a mubheka, ni tat’ê ni yó a mukwatekesa mu thembu yenyoyo. 7 Kwanda moneka muthu wanda mubhingana, muthu watokala ku mwiji wa mona kilumba, mwene wandaya mu usoladi, wanda bokona mu mbonge ya sobha ya thunda, wanda bhânga-nawu, wanda ku atolola. 8 Wanda vutuka ku Ijitu ni jinzambi jê ni iteka yê ya felu ni imbamba ya phalata ni ya ulu ni abhika. Kwanda bhita mivu, mwene kanda lwa ita ni sobha ya thunda. 9 O sobha ya thunda wandaya mubhânga ni sobha ya lwiji. Maji wanda vutuka mu ixi yê.

10 “Yalungu ni an’ê,* ene anda disokejeka phala kulwa ita, anda kwongeka kifuxi kyadikota kya masoladi. Mwene wanda kwiza, wanda bobesa o ixi mukwa ni diluvyu. Maji mwene wanda vutuka ni kulwa ita kate kyanda bhixila mu mbonge yê mwene.

11 “O sobha ya lwiji wanda futuluka, wandaya mulwa ita ni mwene, kifwa ni sobha ya thunda. Mwene* wanda bhongolola kifuxi kyadikota, maji o kifuxi kiki, anda kibhakula bhu maku a sobha ya lwiji. 12 O kifuxi anda kyambata, o sobha wanda dizangeleka. Mwene wanda jibha makwinyi a jimidi ja athu, wanda kala ni ungana wavulu, maji o kutena kwê kanda bhanga-naku kima.

13 “O sobha ya thunda wanda vutuka, wanda kwongeka kifuxi kyadikota, o kya dyangele ndenge. Kudisukilu dya jithembu, mu kubhita mivu, mwene wanda kwiza ni kifuxi kyadikota kya masoladi ni jimbote javulu. 14 Mu thembu yenyoyo, avulu anda balukila o sobha ya lwiji.

“O isweya yatokala ku mundu wé, anda baluka phala kubhangesa kwila, o nzoji ya loto ikale yakidi, maji kanda tena.

15 “O sobha ya thunda wanda bhixila, wanda kwimika kimbaka phala kutolola o mbanza yala ni ilumbu. O kifuxi kya sobha ya lwiji, né mwene o mazonda mê kanda kala ni kutena kwa kubhânga ni ene. 16 O yó wanda kwiza mubhânga ni sobha ya lwiji, wanda bhanga yoso yamesena, kibhwanda kala muthu wanda tena ku mutolola. Mwene wanda tambula o Ixi ya Diwabhela, wanda kala ni kutena kwa kubwika o jinguma jê. 17 Mwene wanda kwiza ni kifuxi kya masoladi kya utuminu wê woso, wanda kumbidila mwene yabakana. O mona kilumba anda mubwika, kanda tena kubhânga ni mwene, kanda mutokala we dingi. 18 Mwene wandaya mu jixi jala bhu mbandu a musanza wa kalunga, wanda tambula-mu jimbanza javulu. Maji kwanda moneka kabhitangu a mukwatesele jisonyi, wanda zubha o ukumbu wê ni ku mukwatesa we jisonyi. 19 Mwene wanda vutuka mu mbonge ya ixi yê, wanda dibhukana ni kudibhala, kanda mumona dingi.

20 “Kwanda moneka sobha yengi yanda mubhingana. O sobha yiyi, yanda sola muthu phala kukobhalala o lubhaku mu utuminu wê. Maji mu kubhita tu izuwa, o sobha* yiyi yanda fwa, maji kikwila kwanda kala muthu wanda mubhanga kima kyayibha mba wandaya mu ita.

21 “Bhu kididi kyê bhwanda moneka muthu kene mu muxila, kanda mubhana o kijingu kyatokala o utuminu, mwene wanda bhixila mu kithangana kya kutululuka,* wanda tambula o utuminu mu kubhanga jimvunda. 22 Mwene wanda tolola o kifuxi kya masoladi kyedi kala diluvyu, wanda kibwika. O mutwameni wa kikutu, anda mubwika we. 23 Mukonda dya kikutu kyate-nê, mwene wanda munganala. Wanda kala dingi ni ungana ni kutena ni kikwatekesu kya kibuka kyofele kya athu. 24 Mu kithangana kyofele kya kutululuka, mwene wanda bokona mu kibatu, mu ididi mwala jimbote javulu. Wanda bhanga kima kyalembwa kubhanga o jitata jê ni jikuku jê. O jimbote ni ima yatambula, wanda ku i wanena ku athu, wanda funya ndunge ya kutambula o jimbanza jala ni ilumbu, maji wanda kibhanga mu kithangana kyofele.

25 “Mwene wanda dyelela mu nguzu ni mu kutena kwê ni mu kifuxi kyê kyadikota phala kubhânga ni sobha ya lwiji. O sobha ya lwiji wanda disokejeka ni kifuxi kyê kyonene-nene phala kulwa ita, maji mwene kanda nangenena, mukonda o athu anda funya ndunge ya ku mutolola. 26 O yó adya-nê kumoxi, anda mubhekela wíndwa.

“O kifuxi kyê anda kitolola, avulu anda ku ajibha.

27 “Yalungu ni jisobha jiyadi jiji, anda xinganeka ngo kubhanga ima yayibha, ene anda xikama kumoxi bhu meza, anda tanga makutu kala muthu mudyâ. Maji ene kanda zediwa mu ima yanda bhanga, mukonda o disukilu dya ima yiyi, dyanda bhita mu kithangana kyoxinde.

28 “O sobha ya thunda wanda vutuka mu ixi yê ni jimbote javulu, mwene wanda sota kujimuna o kikutu kyate Nzambi ni mundu wê. Yoso ya mukala ku muxima yene yanda bhanga, n’avutuke ku ixi yê.

29 “Mu kithangana kyatokala mwene wanda vutuka dingi phala kubhânga ni sobha ya lwiji, maji kikyanda bhita kala kyabhitile ku dimatekenu, 30 mukonda o jinaviyu jitunda ku Kitime janda mulungulukila, anda mukwatesa jisonyi.

“Mwene wanda vutuka ni njinda yavulu, wanda sota kujimuna o kikutu kyate Nzambi ni mundu wê. Yoso ya mukala ku muxima yene yanda bhanga. Mwene wanda vutuka, wanda bhanga ukamba ni yó azembe o kikutu kyate Nzambi ni mundu wê. 31 O kifuxi kyê kya masoladi kyanda kwiza, kyanda kasanesa o tembulu ikôla yedi kala mbanza yala ni ilumbu. O jisata jene mubhana izuwa yoso, kanda jibhakula dingi.

“A kà bhinganesa-bhu o kisunji kibhekela o kibwikilu.

32 “A kà nganala yó azembe o kikutu kyate Nzambi ni mundu wê, anda kwabhangesa kubhukumukina Nzambi ni izwelu yê ya makutu. Maji o athu ejiya o Nzambi yâ anda kolokota, kanda xikina ku anganala. 33 O yó ala ni kilunji mwaxaxi ka mundu, anda longa athu avulu. Anda ku atalesa hadi* mu izuwa yavulu, amoxi anda kwa ambata ku ubhika, amukwa anda kwajibha ni xibhata ni túbhya. 34 Maji kyoso kyandaya ni kutala hadi, anda tambula ka kikwatekesu. Avulu anda dibunda ni ene mu ku atangela makutu. 35 Mwaxaxi ka yó ala ni kilunji, amoxi anda ku atondalesa. Mukonda dya ene, o athu anda kwalola, phala kuzelesa o mundu wa Nzambi, kate mu thembu yasukina-ku, mukonda o kithangana kyoxinde ki kibhixila luwa.

36 “O sobha ya thunda wanda bhanga yoso yamesena, wanda dizangeleka, wanda dijingisa, o jinzambi joso ndenge. Wanda zwela ima yayibha yalungu ni Nzambi ya jinzambi, wanda zediwa kate kyanda bhwa o njinda yê, mukonda o ima yanda bhita kala kyoxinde. 37 Mwene kanda xila o Nzambi ya jitata jê mba o jinzambi jamukwa. Kanda xila we o jihânji ja ahatu, mukonda wanda dizangeleka dingi o jinzambi joso ndenge. 38 O sobha ya thunda, wanda jingisa o nzambi yene mulanga o jimbonge. O nzambi yanda jingisa mwene, o jitata jê ka ijidile. Mwene wanda mubhakwila ulu, phalata, matadi ni ima yamukwa yavalolo. 39 Wanda dyelela ku nzambi ya ixi yengi, phala kuya mulwa ita ni jimbanza jala ni kutena, jala ni ilumbu. Mwene wanda zangeleka yó anda mujingisa,* wanda kwasola phala kutumina athu avulu. Wanda wanuna o ixi, wanda ibhana kwa yó a mufuta.

40 “Mu thembu ya sukina, o sobha ya lwiji, wanda bhanga yoso phala kulwa ita ni mwene. O sobha ya thunda wanda kwiza kala kiza o kitembwe kyadikota phala kulwa-nê, wanda kwiza ni makalu a ita, jikabalu ni jinaviyu javulu. Mwene wanda bokona mu jixi javulu, wanda bwika yoso yala-mu, mukwa ni diluvyu. 41 Mwene we wanda bokona mu Ixi ya Diwabhela, wanda tolola jimbanza javulu. Maji o yó anda sutunuka bhu mak’wê, enyá: Akwa Idomo, akwa Mowabe ni atwameni akwa Amone. 42 Wanda suluka ni kulwa ita phala kutambula jixi javulu, kate mwene o ixi ya Ijitu. 43 O sobha wanda tambula o ima yosweke, ya ulu ni phalata ni ima yoso yala ni valolo ya akwa Ijitu. O akwa Líbya ni akwa Itiyopya, anda bhanga o ima yanda kwatumina kubhanga o sobha ya thunda.

44 “Maji mwene wanda tambula jinjimbu janda tunda ku mbandu kutundila o dikumbi ni ku mbandu ya thunda janda mu thandanganyesa. Mwene wanda tunda ni njinda yavulu phala kujibha athu avulu. 45 Mwene wanda kwimika o jibalaka ja sobha bhwa zukama o kalunga kadikota ni mulundu ukôla mu Ixi ya Diwabhela. Maji o dizubhilu dyê dyanda bhixila, séku muthu wanda mukwatekesa.