Ndongixi
1 Maka atele o mulongexi,* mon’a Davidi, wexile sobha mu Jeluzaleme.
2 “Yoso kingoho!” Kyene kyambe o mulongexi.
“Yoso kingoho mu kingoho! Yoso ukumbu ngo!”
3 Mbote yahi imona o muthu,
Mu ikalakalu yoso ya nguzu, yabhanga mu ngongo mumu?
4 Kutunda mwiji kwiza mwiji,
Maji o ixi inangenena kate ku hádya ni hádya.
5 O dikumbi dibanda anga diboba.*
Divutuka dingi ni lusolo bhu kididi bhu dyatundu.
6 O kitembwe kibhukila ku mbandu ya lwiji anga kikondolokela ku mbandu ya thunda.
Kyenda ni kunyunga kyenyiki, o mu kyabhitile kya, mwene mu kibhita dingi. Kisuluka ni kujinguluka kyenyiki.
7 O menya a jingiji joso, a kungulukila mu musanza wa kalunga. Né kiki, o musanza kiwizala ni menya.
O menya avutuka dingi ku hoto ya jingiji, anga aya dingi ni ku kunguluka.
8 Ima yoso itohokesa.
Maji séku muthu utena ku ijimbulula.
O muthu kasanguluka ni ima yamona.
Kasanguluka we ni ima yevwa.
9 O kima kyene-ku kya, kyene dingi kya keza-ku.
O kyobhange kya, anda kibhanga dingi.
Séku kima kya ubhe mu ngongo.
10 O kwila mu ngongo mwala kima kya ubhe?
Kana, ima yoso yene-ku kya tunde ukulu,
Ande mwene dya ku tuvwala.
11 Séku muthu ulembalala akwa xahulu.
Séku muthu wanda lembalala we yó anda kwiza.
O yá kanda kwalembalala we kwa yó akeza-ku.
12 Eme ngi mulongexi, ngakituka ngi sobha ya Izalayele mu Jeluzaleme. 13 Ngasolo kudilonga ni kutokwesa ni unjimu, o ima yoso yene mubhanga o athu mu ngongo, kifwa, o ikalakalu yabhonzo yabhana Nzambi ku athu, phala akale ni kima kya kubhanga.
14 Ngatonginina yoso yene mubhanga o athu mu ngongo,
Nga imono kwila kingoho, mukwa ni kukayela o kitembwe.
15 O kima kyabhengalala kya, katena dingi ku kiyudika.
O kyakambe-ku, katena ku kikwata konda.
16 Ku muxima wami-phe, ngambe: “Ngala ni unjimu wavulu, oso a ngidyangele-ku mu Jeluzaleme ndenge. Ngala ni unjimu ni kwijiya kwavulu.” 17 Ngabhange yoso, phala kwijiya kyebhi kikala o unjimu ni ulaji ni wowa. Kudisukilu ngamono kwila, kusota kwijiya o ima yiyi mukwa ni kukayela we o kitembwe.
18 O unjimu wavulu, ukatesa o muxima.
O yó ubandekesa o kwijiya kwê, jindolo jê jidibandekesa we.