Mikeya
2 “Lamba dya yó afunya ndunge ya kubhanga ima yayibha,
Kyoso kyala hanji mu hama yâ!
Kyoso kikukya, ene abhanga o ima yiyi,
Mukonda ene ala ni kutena kwa kukibhanga.
2 Kibhela kyoso-kyoso kyamesena, ene akitambula,
Inzo yoso-yoso yawabhela, a itambula phala ene.
Ene adinga makutu ku muthu phala ku mutambula o inzo yê,
Ni ku mutambula o undundu wê.
3 Kyenyiki Jihova wambe, wixi:
‘Nganda bheka divuwa ku mwiji yú, dyanda ku mitula enu enyoso.
Kimwanda dizangeleka dingi, mukonda kyanda kala kithangana kya malamba.
4 Mu kizuwa kyenyokyo, o athu anda mitumbula mu jisabhu,
Anda dila ni kuta jingololo.
Ene anda zwela: “Atubwika mwene!
Nzambi wabhana o undundu wetu ku athu engi, undundu wetu a tutambula-nawu!
Nzambi wabhana o mabhya metu ku athu kene mu mubheza.”
5 Mwaxaxi ka mundu wa Jihova kimwanda kala muthu u kuwanena o mavu,
Kyoso kyanda ku awanena mu kuta jisolote.
6 Maji ene amba: “Kana kuboka dingi,
Kana kuzwela dingi o ima yiyi,
O jisonyi kijanda tukwata!”
7 O mbutu ya Jakobo ya muzwela:
“O kwila Jihova kala dingi ni mwanyu?*
O kwila mwene wanda bhanga mwene o ima yiyi?”
Eme kingakanena kubheka o mbote kwa yó a ngikala fiyele?
8 Maji kindala kiki, o mundu wami wa ngilungulukila kala ngi nguma yâ.
Enu kimwala ni wôma wa kutambula makembu a izwatu,
Ya yó watululuka kala o muthu wa mutunda mu ita.
9 Enu mwene mukaya o ahatu atokala ku mundu wami mu jinzo jâ jafwama,
Mwene mufidisa o twana twâ kutambula o mabesá u nga akanena.
10 Balumukenu mwende, mukonda o kididi kiki, ki kididi phala kunyohela-mu.
Nganda bheka kibwika mukonda dya ituxi yenu. Kibwika kyadikota mwene.
11 Se bhukala muthu ubhanga ima yayibha, unganala akwâ, anga utanga makutu, wixi:
“Nganda mibokela yalungu ni vinyu ni mauholwa amukwa,”
Kyenyiki-phe, o muthu yú mwéne wafwama kubokela o mundu yú!
12 Eye u Jakobo, nganda kwongeka o mbutu yé yoso.
Mukidi, nganda kwongeka oso asubhuka ku akwa Izalayele.
Nganda ku abhangesa kukala dingi kumoxi, kala o jimbudi mu kibhanga.
Nganda ku abunda kumoxi, kala jimbudi mu kibhanga.
Mu kididi kyenyokyo, anda kwivwa-mu dingi jibuya javulu ja athu.’
13 O yó ujikula o njila, wanda kwa twamenena ku pholo yâ.
Ene anda jikula o njila, anda bhitila bhu mwelu, anga atunda bhenyobho.
O sobha yâ, wanda ku atwamenena ku pholo.
Jihova wanda ku atwamenena ku pholo yâ.”