Jobe
15 Elifaji mukwa Temane wa muvutwila, wixi:
2 “O kwila o njimu utambwijila sé kuxinganeka?
O kwila weji kwizalesa o muxima wê ni ibanzelu yayibha?
3 O njimu kazwela ima sé kuxinganeka,
O kuzwela ngo ki ku kwatekesa muthu.
4 Eye wa mufidisa akwenu kusuluka ni kuxila Nzambi.
Wa mubhangesa kwila, akwenu kabanze dingi kwa Nzambi.
5 O kikuma kyé, kyene kya mu kuzwelesa kiki,
Eye wa musola izwelu yambote phala kunganala-nayu akwenu.
6 O dikanu dyé, dyéne dya mu kubelesa, k’eme-ku kana.
O mizumbu yé, yéne mwene ya mubhana o umbangi wa ima i wa muzwela.
7 O kwila éye u muthu a dyanga ku kuvwala?
Inga a kuvwala ande dya kubhanga o tumilundu?
8 O kwila o kikutu kya Nzambi a kutungunwina-kyu eye?
Inga éye ngo wala ni unjimu?
9 Ihi i wejiya, i twakambe o kwijiya?
Kima kyahi kya kutetulukila, kyakambe ku tutetulukila?
10 Mwaxaxi k’etu mwala we yó ala ni jimvi, ni yó akuka,
Athu akuka dingi, tat’enu ndenge.
11 O izwelu ya Nzambi ki isoko phala ku kukonda o malamba?
O kwila o izwelu yetu ki isoko phala ku kukonda o malamba?
12 Mukonda dyahi wa mukwehela o ixinganeku yé ku kufunyisa?
Mukonda dyahi wala ni njinda?
13 Eye wafutuluka ni Nzambi,
Kyene ki wa muzwelela kiki.
14 O kwila bhu pholo ya Nzambi sayi muthu wazele?
O kwila o mukwa ituxi utena kuyuka?
15 Tala! Nzambi kate ni jianju jê kajidyelela,
Né mwene o dyulu, ku mesu mê kidya yuka.
16 Kwambe dingi o muthu umesena kubhanga kyayibha,
Kala o muthu wala ni dinyota kyandala kunwa menya!
17 Ngivwe, nganda kutangela kima!
Nganda kutangela o kima ki ngamono,
18 O ima yatange o jinjimu,
Ima yakambe o kusweka, ima yevu ku jitata jâ.
19 O ixi a abhana-yu ngo ene,
Éne ngo atungile-mu.
20 O muthu wayibha, izuwa yoso a mutatesa.
Mivu yoso kumwiza malamba.
21 Mátwi mê evwa ngo jibuya ji mukwatesa wôma,
Né mwene kyoso ki kutululuka, kumwiza mwiyi u munyana.
22 Mwene kaxikina kwila, kwanda mwiza dibhebhu,
Mukonda wejiya kwila, anda mubhakula phala ku mujibha ni xibhata.
23 Mwene ututumba ni kusota kudya, anga wibhwidisa: ‘O kudya kwala kwebhi?’
Mwene wejiya kyambote kwila, o kizuwa kya kitombe kyazukama.
24 O kutata ni kubhondalala kwanda mwiza mukwa ni sobha wadisokejeka phala kulwa ita,
Kwanda mukwatesa wôma.
25 Mukonda mwene uzangula lukwaku lwê mu kuzoka ni Nzambi,
Mwene usota kudikwata ni Muteni wa Yoso.
26 Ujiza mwene mu kuzoka-nê,
Udixitila ni ngubu yê yakolo, yakomo.
27 Mwene wala ni ukumbu,
Wanete mukonda dya jimbote jê.
28 O jimbanza mwatungu mwene, anda jibwika,
Janda xala ngundu.
Mu jinzo ki mwanda kala dingi athu.
29 Mwene kanda kala ngenji, kanda kala we ni jimbote javulu,
O ibhaku yê, kiyanda disokolola mu ngongo.
30 O dibhebhu dyanda mujibha mwene,
O mulengu wa túbhya wanda kwawula o jithangu jê,*
Anda mujibha* kwa Nzambi.
31 Mwene katokala kudyanguka, mu kudyelela mu ima yakambe valolo,
Mukonda kanda tambula futu ya kima.
32 Kwakambe ngo o ima yiyi yanda bhita ni mwene,
O jithangu jê, kijanda bwingita dingi.
33 Mwene wa kéla mukwa ni muxi wa jiuva ulalumuna o jiuva jawisu,
Mukwa ni muxi wa jinzetona ulalumuna o ithulu yê.
34 O kibuka kya athu ayibha, mukwa ni muhatu wa mbaku,
O túbhya twanda jikinisa o jibalaka ja akwa mangonya.
35 Ene abanza ngo ima yayibha, ene mubhanga phulu ku akwâ ithangana yoso,
Ku mixima yâ, afunya ndunge ya kunganala akwâ.”