Mukanda wa Kayadi ku Akwa Kolindu
4 Kuma twa tambula o ukunji yú mukonda dya henda ya Nzambi, etu ki tu bhwila. 2 Maji twa ditunu o ima ya jisonyi yene mu bhanga o athu mu kaswekele, etu ki twene mu nganala o athu, ki twene mu katula mba kubandekesa kima mu mak’â Nzambi. Maji mu kwijidisa o kidi, tubhana phangu yambote ku athu oso, bhu pholo ya Nzambi. 3 Mu kidi se o njimbu yambote itwene muboka yósweke, yósweke phala yó ngó ala mu njila ya kufwa. 4 O athu enyá, o nzambi ya mundu yú* wa axiti o ilunji yâ mwavundu, phala kamone o kubhenya kwa mukengeji wa njimbu yambote yafuma ya Kidistu, o kidifwanganu kya Nzambi. 5 Mukonda etu ki twa muboka yalungu n’etu, maji twa mu bokela Jezú Kidistu kala Ngana yetu. Twa muboka we yalungu n’etu kala tu abhik’enu, mukonda dya Jezú. 6 Kuma Nzambi wazwelele, wixi: “O mukengeji umwikine mwavundu.” Mwene wene mu bhangesa o mukengeji kumwikina o mixima yetu, phala yene i mwike ni kwijiya kwonene kwa Nzambi, bhukaxi ka pholo ya Kidistu.
7 Etu twala ni ujitu yú mu itutu ya mavu, phala kulondekesa kwila twa tambula o kutena kusomboka o kutena kwa athu. O kutena kuku, ki kutundu kokwetu kana maji kutunda kwa Nzambi. 8 Atuxina mu maukexilu oso, maji katutolola. Sayi ithangana tukala ni jiphata, maji ki tukala sé ditundilu.* 9 A tu zukutisa, maji ki tukambe kikwatekesu. A tulundujula, maji ka tubwikisa. 10 Ithangana yoso o mukutu wetu ukolokota mu jiphaxi ja kalunga kala ja bhitile naju Jezú, phala o mwenyu wetu udifwangane ni mwenyu wa Jezú. 11 Etu twala ku mwenyu, izuwa yoso tubhita mu kilwezu kya kufwa mukonda dya Jezú, phala athu amone kwila etu twa mu tala hadi kála kya tale Jezú. 12 Kyenyiki, o kilwezu kya kufwa kya tutokala etu, maji enu o kima kya mi tokala o mwenyu.
13 Mukonda o Mikanda Ikôla yamba: “Eme nga xikana, kyene ki nga zwelela.” Etu we, o kixikanu ki twala nakyu kyene kimoxi, kyene ki twa zwelela o ima yiyi, 14 kuma twejiya kwila, o Yó wa fukununa Jezú, wanda tu fukununa we kumoxi ni Jezú, ni kutubheka kumoxi ni enu bhu pholo ya Jezú. 15 Kuma ima yoso yiyi ya mubhita mukonda dyenu, phala o ngalasa ya Nzambi idibandekese dingi, mukonda athu avulu a mu sakidila Nzambi phala o fuma yê.
16 Mukonda dya kiki, etu ki tu bhwila, né mwene se mukutu wetu ujila, o muxima wetu ni kilunji kitambula dingi nguzu kizuwa ni kizuwa. 17 O hadi* i twa mubhita nayu ki yanda nangenena, ya bhebhuluka. Maji yanda tubhangesa kutambula fuma ya dikota, o fuma inangenena. 18 Mukonda etu ki twa mu suwa o ima imoneka ku mesu, maji twa mu suwa o ima ki imoneka ku mesu. Kuma o ima i moneka ku mesu ki inangenena, maji o ima ki imoneka ku mesu, inangenena katé ku hádya ni hádya.