Ku Akwa Ngalásya
4 Ngi myambela kwila, o mulundudi kyoso kya kala hanji mon’a ndenge, mwene wa difwangana ni mubhika. Sumbala mwéne o ngana ya ima yoso, 2 maji watokala kutumaka o athu a mu mu tambula konda ni imbadi, katé kyanda bhixila o kizuwa kyaxindi tat’ê. 3 Kyene we kyabhiti n’etu, kyoso kitwexile tu an’a ndenge, a tubhangele tu abhika a ixinganeku ni wendelu wa athu a mundu yú. 4 Maji kyoso kyabhixila o kithangana kyoxinde, Nzambi watumikisa Mon’ê. O Mona yú a mu vwala ku muhatu, yu wakudila bhoxi dya Kijila, 5 phala kukula o athu ala bhoxi dya Kijila, Nzambi n’a tu tambulule kala tu an’ê.
6 Kuma mwala mu ana, Nzambi watumikisa o nzumbi ya Mon’ê ku mixima yetu, o nzumbi yiyi i tubhangesa kudikola: “Aba,* Tata!” 7 Kyenyiki, kala muthu mudyenu ki mubhika dingi, maji mona kyá, se wala mona, Nzambi wa mubhange we mulundudi.
8 Kyoso ki mwa kambele kwijiya Nzambi, mwexile mu abhika a jinzambi ja makutu. 9 Kuma mwejiya kyá Nzambi, mba Nzambi wa m’ijiya, mukonda dyahi mwa muvutuka dingi ku ima ya mundu yú yakambe valolo, ni kumesena kukala dingi mu abhika a ima yiyi? 10 Enu mwene muxila kyavulu o izuwa, o jimbeji, o jithembu ni mivu. 11 Ngala ni hele ya kwila, o nguzu ingene mubhanga phala ku mi kwatekesa ikale ya kingoho.
12 Nga mibhingi nga midyóndo, phange jami: Kalenu kala kingala eme, mukonda eme ngexile we kala ki mwala enu, maji nga lunguluka. Enu ki mwa ngibhange kima kyayibha. 13 Enu mwejiya kwila, nga dyangele ku mibokela o njimbu yambote mukonda dya uhaxi u ngakexile nawu. 14 Sumbala o uhaxi wami wa mibhekela ibhidi, enu ki mwa ngi bwazeka, maji mwa ngi tambulula kala anju ya Nzambi, mba kala Kidistu Jezú. 15 Mu kithangana kyenyókyo enu mwa sangulukile. Kwebhi-phe kwala o kusanguluka koko? Ngejiya ni kidi kyoso kwila, se kyabhanene, mweji lokola o mesu menu ni ku ngi bhanawu. 16 O kwila nga dibhange ngi nguma yenu mukonda dya ku mitangela o kidi? 17 Sayi athu amesena kwila mu kala ku mbandu yâ, kiphala kubhanga ima yambote. Amesena kwila mu disandula kokwami, phala mu akayele. 18 Maji se muthu wamesena kwila mukala ku mbandu yê phala kubhanga ima yambote, kyawabha! Kima kyambote se mwene u kibhanga ithangana yoso, kana ngó kyoso ki ngi kala mwaxaxi kenu. 19 Twana twami tata! Eme ngene mu kwívwa ndolo mukonda dyenu, o ndolo yiyi yedi kala ya muhatu kyoso kyala phala kuvwala mona. Nganda suluka mu kwívwa o ndolo yiyi katé kimwanda kala ni idifwa ya Kidistu. 20 Nga mesena kukala ni enu ni ku mi zwelela mu ukexilu wengi, kuma ki ngejiya ihi i nga tokala kubhanga yalungu ni enu.
21 Kuma mwa mesena kukayela o Kijila, ngi tangelyenu hanji kima kimoxi: O kwila mwene mutumaka o Kijila? 22 O Mikanda Ikôla izwela kwila, Mbalahamu wexile ni twana tuyadi, mon’a umoxi, ni selevende ya muhatu, o wa mukwá ni yó kexile selevende. 23 O mona wa selevende a muvwala kala kyene muvwala o twana twa mukwá,* maji o mona wa yó kexile selevende a muvwala mukonda dya kikanenu. 24 O ima yiyi yedi kala kifika, mukonda o ahatu ayadi yá alombolola ikutu iyadi. Kikutu kimoxi a kite ku Mulundu wa Sinayi, athu oso ala bhoxi dya kikutu kiki abhika, o kikutu kiki kyala kala Hangale. 25 Hangale ulombolola o Mulundu wa Sinayi, mulundu wala ku Alábya. Mwene ulombolola o Jeluzaleme ya lelu, wala ku ubhika kumoxi ni an’ê. 26 Maji o Jeluzaleme ya dyulu yala ni ufôlo, mwéne mam’etu.
27 Kuma o Mikanda Ikôla yambe: “Tana-ku eye u muhatu wakambe o kuvwala! Dikole ni kusanguluka, eye u muhatu wakambe kwívwa o ndolo ya kuvwala! Mukonda o muhatu a mu bwazeka wabetakota mu kuvula o ana, o wala ni diyala ndenge.” 28 Enu akwetu jiphange jami, mwa sokela ni Izake, mwala mu an’â Nzambi mukonda dya kikanenu. 29 Mu thembu yenyoyo, o mona a muvwala kala kyene muvwala o twana twa mukwá,* wakexile mu zukutisa o mona a muvwala bhukaxi ka nzumbi ikôla. Kiki kyene we kya mubhita kindala. 30 Maji-phe ihi yamba o Mikanda Ikôla? Yene yamba: “Kaya o selevende ya muhatu ni mon’ê, mukonda o mona wa selevende kanda kala mulundudi kumoxi ni mona wa muhatu ki selevende.” 31 Kyenyiki jiphange jami, kitwala tu an’â selevende kana, maji twala tu ana a muhatu ki selevende.