Ku Akwa Loma
7 Nga mu mitangela enu jiphange jami mwejiya o Kijila. Enu kimwejiya kwila, o Kijila kitumina ngó o muthu kyoso mwene kyala hanji ku mwenyu? 2 Mu kifika, o kijila kyamba kwila, o muhatu wakazala wadikutu kwa mwadi wê kyoso mwene kyala hanji ku mwenyu, maji se mwadi wê ufwa, mwene wajituka ku kijila kiki. 3 Kyenyiki, se mwadi wê wala hanji ku mwenyu, mwene anga ukazala ni diyala dyéngi, wamuta phanda. Maji se mwadi wê ufwa, mwene wajituka ku kijila kyê, se ukazala ni diyala dyéngi, kamuta phanda.
4 Kyenyiki phange jami, o mukutu wa Kidistu wa tubhulula ku Kijila kya Mozé, phala tu tokale kwa Kidistu, yó a mufukununa mw’alunga. Kindala tutena kwima ibundu ibhana kijingu kwa Nzambi. 5 Mukonda kyoso kitwexile mubhanga o ima yaxitu, o Kijila kyexile mu tu ijidisa o jihânji jayibha ja mikutu yetu.* Mu kiki, twexile mu kwima ibundu ibhekela o kufwa. 6 Kuma twafu kukima kyexile mu tufidisa, twa jituka ku Kijila, kindala bhukaxi ka nzumbi ikôla twala tu abhika a Nzambi mu ukexilu wengi. Kana dingi bhukaxi ka Kijila kyósoneke, kala kitwexile m’ukulu.
7 O kwila tutena kuzwela kuma o Kijila kituxi? Kana! Mu kidi eme kingeji kwijiya o kituxi, se kikwexile o Kijila. Mu kifika eme kingeji kwijiya kwila o kukala ni lwimbi lwa ima yangene kituxi, se o Kijila ki kyambele: “Kana kukala ni lwimbi.” 8 Bhukaxi ka kitumu, o kituxi kya ngibhangesa kukala ni malwimbi moso, mukonda kyoso ki kwakambele o kijila, o kituxi ki kyakexile ni kutena. 9 Kyoso ki kwakambele o kijila, eme ngakexile ku mwenyu, maji kyoso kyabhixila o Kijila, o kitumu kyalondekesa kwila ngexile ngi mukwa ituxi, éme ngafu. 10 O kitumu kyeji ngibhekela o mwenyu, ngamono kwila, kya ngibhekela o kufwa. 11 Mukonda dya kitumu, o kituxi kya ngi nganala, anga kya ngi jibha. 12 Kyenyiki, o Kijila kya zele mwene, o kitumu kyazele we, kyayuka, kyawabha.
13 O kwila kiki kilombolola kuma o kima kyawabha kyene kya ngibhekela o kufwa? Kana! O kituxi kyene kya ngibhekela o kufwa. O Kijila kyawabha, maji kyalondekesa kwila, o kya ngibhekela o kufwa o kituxi. Kyenyiki, o kitumu kyedikisa kwila, o kituxi kyayibha kinene. 14 Twejiya kwila o Kijila kyatundu kwa Nzambi bhukaxi ka nzumbi ikôla, maji eme ngi muthu waxitu, a ngisumbisa kala ngi mubhika wa kituxi. 15 Yoso i ngibhanga, ki nga ijiya kyambote. Mukonda ki ngibhange o ima i ngamesena, maji o ima i ngazembe yéne i ngibhanga. 16 Mu kyenyiki, se ngibhanga o ima ki ngi imesena, ngixikina kwila o Kijila kyawabha mwene. 17 K’eme dingi ngibhanga o ima yiyi yayibha, maji o kituxi kyatungu moxi dyami. 18 Ngejiya kwila moxi dyami, mu mukutu wami wa ituxi, kimwala kima kyambote. Sumbala ngamesena kubhanga o ima yambote, maji ki ngitena ku ibhanga. 19 Eme ki ngibhange o ima yambote i ngi mesena, maji o ima yayibha ki ngi imesena, yéne i ngibhanga. 20 Se ngibhanga o ima ki ngi imesena, k’eme dingi nga mu ibhanga, maji o kituxi kyatungu moxi dyami.
21 Ngamono kwila moxi dyami mwala o kitumu kiki: Kyoso ki ngimesena kubhanga o ima yawabha, o ima yayibha yéne i ngi zukama. 22 Ngejiya kwila moxi dyami, ngawabhela mwene o kijila kya Nzambi. 23 Maji moxi dyami,* mwala kijila kyengi kya mubhânga ni kijila kya kilunji kyami, kyene kya mu ngikutila mu ubhika wa kijila kya kituxi kyala mu mukutu wami.* 24 Kokolo dyami! Nanyi wanda ngi bhulula ku mukutu yú wa mu ngyambata mw’alunga? 25 Ngisakidila Nzambi, mukonda mwene wa ngibhulula bhukaxi ka Ngana yetu Jezú Kidistu! Kyenyiki, mu kilunji kyami ngala ngi mubhika wa kijila kya Nzambi, maji mu mukutu wami ngala ngi mubhika wa kijila kya kituxi.