Mukanda wa Kayadi ku Akwa Kolindu
1 Eme Phawulu, ngi poxolo ya Kidistu Jezú, mu vondadi ya Nzambi, kumoxi ni phang’yetu Timote. Nga mu soneka o mukanda yú phala o kilunga kya Nzambi mu mbanza ya Kolindu, ni ku athu oso a asolo* kwa Nzambi ala mu jimbanza joso ja Akaya:
2 O ngalasa ni kutululuka kwa Nzambi Tat’etu, ni kwa Ngana Jezú Kidistu, kukale ni enu.
3 Aximane Nzambi Tata ya Ngana yetu Jezú Kidistu, Tata ya jihenda. O Nzambi mukwa kukonda o malamba a athu, 4 mwene u tukonda o malamba* mu jiphaxi* jetu joso, phala ni kikwatekesu ki tutambula kwa Nzambi, tutene we kukonda o malamba a akwetu mu jiphaxi joso jibhita naju. 5 O jiphaxi ji tubhita naju mwa Kidistu, javulu. Kyene we kimoxi, o kikwatekesu ki tutambula mwa Kidistu kyavulu we. 6 Se tutala hadi,* twa mu mitalela-yu enu, phala ku mikonda o malamba ni ku mibhulula. Se a mu tukonda o malamba, kiki kya mubhita phala ku mikonda we o malamba m’enu, phala o kiswinisu kiki, ki mi kwatekese we kukolokota mu jihadi ja difu ni jetu. 7 O kidyelelu kyetu kokwenu kya kolo, mukonda twejiya kwila, mwa mu tala hadi kala etu. Kyenyiki anda mikonda we o malamba kala etu kya mu tukonda o malamba.
8 Jiphange jami, ki nga mesena kwila mu kamba kwijiya o ibhidi i twa bhitile nayu mu kibatu kya Azya. A tuxinine kya túndu o nguzu yetu, ki twa tenene kukolokota, ki twejidile se tweji fwa mba tweji bhuluka. 9 Mu kidi, twadivu kwila a tuxindile o kufwa. Kiki kyabhiti, phala ki tudyelele mu nguzu yetu, maji tudyelele Nzambi, yó ufukununa o madifundu. 10 Mwene wa tubhulula, wanda tubhulula we ku kalunga, etu twadyelela kwila, mwene wanda suluka mu ku tubhulula. 11 Enu wenu mutena ku tukwatekesa mu ku tusambela kwa Nzambi. Mukonda se mubhinga mu misambu phala o mbote yetu, Nzambi wanda kwívwa ni ku tukwatekesa, mukonda dya kiki, athu avulu anda sakidila Nzambi.
12 Tu dinanza mukonda twala ni kitongolwelu kyazele. Kuma twala ni wendelu wazele mu ngongo mumu, kitwala tu akwa mangonya, benge-benge mwaxaxi kenu. Tu akwa henda kala Nzambi, ki tudyelela mu unjimu wa athu. 13 Mukonda ki twa mu mi sonekena ima ki mutena ku itanga ni ku itendela,* maji nga mesena kwila mu suluka mu kutendela kyambote o ima yiyi, 14 kala amoxi mudyenu kya tendela kwila, enu mwa mu dinanza mukonda dyetu, ku hádya mu kizuwa kya Ngana yetu Jezú, etu we twanda dinanza mukonda dyenu.
15 Ni kidyelelu kiki, kya dyanga nga mesenene ku mikunda, phala o kusanguluka kwenu kuvule dingi;* 16 mukonda nga mesenene ku mikunda mu kuya, ni mu kuvutuka ku Masedonya, phala mu ngi xinjikile mu njila ya kuya ku Judeya. 17 Kyoso ki nga xinganeka kubhanga kiki, o kwila o maka nga amono kwila kala ni valolo? Inga nga mesenene kubhanga o ima kala kixinganeka o athu? Kyenyiki ngi zwela ngixi, “kyene, kyene,” anga ngi zwela “kana, kana”? 18 Kuma Nzambi fiyele, o ima i tu mi tangela, mu kithangana kimoxi ki ilombolola “kyene” ni “kana”. 19 O Mon’â Nzambi Jezú Kidistu, yó twa mu mi bokela-nê, eme, Sidivanu* ni Timote, mu kithangana kimoxi kadibhange “kyene” ni “kana”, maji o “kyene” kya dibhange “kyene” mwa mwene. 20 Né mwene se o ikanenu ya Nzambi ivula, yene yanda kituka “kyene” mwa Jezú. Kyenyiki, bhukaxi ka mwene tuzwela “Kyene”* kwa Nzambi, phala o fuma ya Nzambi. 21 Maji yó u tu ijidisa kwila twatokala kwa Kidistu, yu wa tu undu, mwéne Nzambi. 22 Mwene wate we o kidimbu kuthandu dyetu, yu wa tuxikinisa ku mixima yetu o kima kyanda kwiza,* o nzumbi ikôla.
23 Kindala, Nzambi wala mbangi yami, kuma eme ki ngayi luwa ku Kolindu mukonda ki nga mesenene ku mi luwalesa dingi. 24 Kiki ki kilombolola kwila twala tu jingana ja kixikanu kyenu, maji twala tu akalakadi ni akwenu phala o kusanguluka kwenu, kuma enu mwemana mukonda dya kixikanu kyenu.