Kisumwa Kyalondekesa Kwa Nzwá

14 Anga ngamono o Kambudi wemana ku Mulundu wa Ziyone kumoxi ni hama ni makwinyi awana ni kiwana kya midi, yó ala ni dijina dyê ni dijina dya Tat’ê dyosoneke bhu mabhômo mâ. 2 Ngevu mbimbi yatundu ku dyulu yedile kala mbimbi ya menya avulu ni mbimbi ya kinuminu kyadikota kya nzaji. O mbimbi i ngevu yedile kala jingimbidi ja muxika o jimbánza jâ. 3 O jingimbidi jakexile mu kwimba bhu pholo ya kyandu, ni bhu pholo ya jianju jiwana ni bhu pholo ya tufunga. O mwimbu wedile kala mwimbu wa ubhe, sé-ku muthu watenene kudilonga-u, kikale ngó o hama ni makwinyi awana ni kiwana kya midi a asumbu mu ngongo. 4 Ene ka dixidisa ni ahatu, ala kala o mizeletete. A mukayela o Kambudi kwoso kwaditela. Ene a asumbu mwaxaxi ka athu mu ngongo kala ibundu ya dyanga phala Nzambi ni Kambudi. 5 Ene katange makutu ku akwa, kala we ni dixaka.

6 Anga ngimona anju ya mukwa ya mutuka ku dyulu,* yene yexile ni njimbu yambote inangenena phala ku itudila athu oso atungu mu ngongo, atokala ku ifuxi yoso, mu miji yoso, mu madimi moso ni mu madyembu moso. 7 Yene yakexile mudikola ni dízwi dya swina: “Nzambi mu kwatelenu wôma, mu bhanyenu kijingu, mukonda o kithangana kyê kya kufundisa o athu kyabhixila. Kyenyiki bhezenu Yó wabhange o dyulu, o ngongo, o musanza wa kalunga ni jihotho* ja menya.”

8 Anga kwiza anju ya kayadi yazwela, yexi: “Yabu! Babilonya ya Dikota yabu, yakexile mubhangesa o ifuxi yoso kunwa o vinyu ya njinda yê ni ya undumbu* wê!”

9 Anga kwiza anju ya katatu yadikola ni dízwi dya swina, ixi: “Se muthu ubheza o kyama kya muxitu ni kiteka kyê, anga amuta o kidimbu bhu dibhômo mba ku lukwaku, 10 mwene wanda nwa we o vinyu ya njinda ya Nzambi, a ilundulula ya hatu ni nguzu yoso mu kopho ya njinda. Mwene anda mutalesa hadi ni túbhya ni xôfidi bhu pholo ya jianju jikôla ni bhu pholo ya Kambudi. 11 O dixi dya túbhya twatalesa hadi, dyanda nangenena katé ku hádya ni hádya. O athu a mubheza o kyama kya muxitu ni kiteka kyê ni yó atambula o kidimbu kya dijina dyê, anda tala hadi usuku ni mwanya. 12 Mukonda dya kiki, o athu a asolo, yó ene mutumaka o itumu ya Nzambi ni kudikwatenena mu kixikanu kyâ kwa Jezú, abhingi kukolokota.”

13 Ngevu dízwi dyatundu ku dyulu, dyambe: “Soneka: Azediwa o madifundu tundé kindala afwila mwa Ngana. Kyene, o nzumbi ikôla yamba, ene anyohe ku kikalakalu kyâ kya nguzu, mukonda Nzambi kanda jimba o ikalakalu yabhange.”

14 Anga ngimona dituta dyazele, o waxikama ku dituta wa difwanganene ni mon’a muthu. Ku mútwe wê kwakexile kitundu kya ulu. Bhu lukwaku wakwata kibhôlola* kyatu.

15 O anju ya mukwa yatundu mu tembulu yadikola ni dízwi dya swina, kwa yó waxikama ku dituta: “Katula o kibhôlola kyé ni ubhongolole, mukonda o kithangana kya kubhongolola kyabhixila kyá, kuma o idima ya ixi yabhi kyá.” 16 O waxikama ku dituta wabhitisa o kibhôlola kyê mu ixi, anga o idima ya ixi yoso a ibhongolola.

17 Ngamono anju ya mukwa yatundu mu tembulu yala ku dyulu, yene yakwata we kibhôlola kyatu.

18 Ku kalatódyu kwatundu anju yengi yakexile ni kutena ku túbhya, mwene wadikola ni dízwi dya swina kwa yó wakwatele o kibhôlola kyê kyatu, wixi: “Katula o kibhôlola kyé kyatu ni u kanze o isaka ya ji uva ya ixi, kuma o ji uva jabhi kyá.” 19 O anju yabhitisa o kibhôlola kyê mu ixi, yu wabhongolola o muxi wa midiva mu ixi, yu wa utakula mu ditangi dya dikota dya kubhangela o vinyu ya njinda ya Nzambi. 20 O ji uva mu ditangi a ji dyota-dyota bhukanga dya mbanza. Mu ditangi anga mutunda manyinga abhixila bhu makanu a jikabalu, o kuvula kwa manyinga atundu mu ditangi, kwatenesa hama jiyadi ni makwinyi avwa ni kisamanu kya jikilómetulu.*