Ku Akwa Ngalásya
1 Eme poxolo Phawulu nga mu misonekena. Kana muthu wa ngisolo kala ngi poxolo, maji o wa ngisolo Jezú Kidistu kumoxi ni Nzambi Tat’etu, yó wa mu fukununa mw’alunga. 2 Eme Phawulu kumoxi ni jiphange ala n’eme, twa mu misonekena, enu mwala mu ilunga mu mbanza ya Ngalásya:
3 Mu kale ni ngalasa ni kutululuka kutunda kwa Nzambi Tata yetu, ni kwa Ngana Jezú Kidistu. 4 Kidistu wa dibhakula ku ituxi yetu, phala ku tubhulula ku mundu yú* wayibha, kala kyamesenene Nzambi Tat’etu. 5 Nzambi atambule o fuma katé ku hádya ni hádya. Kyene!*
6 Ngi diwana kyavulu mukumona kwila mwa mu disondolola ni lusolo kwa Nzambi, yó wa m’ixana bhukaxi ka ngalasa ya Kidistu, enu-phe mwa mubhana mátwi ku njimbu yengi yambote. 7 Kikwene njimbu yengi yambote, maji sayi athu amesena ku mi landukisa mu ku mitangela makutu alungu ni njimbu yambote ya Kidistu. 8 Né mwene se muthu mudyetu mba anju itunda ku dyulu, u mibokela njimbu yengi yambote, o i twa mibokela ki yene, mwenyó a muloke. 9 Kala ki twazwela kyá, ngi mitangela dingi: Woso u mibokela njimbu yengi yambote, o i mwaxikina ki yene, mwenyó atokala ku muloka.
10 O kwila nga musota kusangulukisa athu, inga nga musota kusangulukisa Nzambi? Se nga musota kusangulukisa athu, kingala ngi mubhika wa Kidistu. 11 Phange jami, ngamesena mwijiya kwila, o njimbu yambote i nga mibokela, ki ya athu kana, 12 mukonda ki nga itambula ku muthu, sé-ku muthu wa ngilongo-yu, maji nga itambula kwa Jezú Kidistu bhukaxi ka kisumwa.
13 Enu mwevu kyá o ima ingexile mubhanga kyoso kingexile mu kayela o ilongesu ya Jijudé. Ngexile muzukutisa o kilunga kya Nzambi ni kuswina kwoso, ni ku ki mwangununa. 14 Mu ilongesu ya Jijudé, éme ngakexile ku pholo dya yó akexile mu kitala kyami. Mukonda ngakexile mukayela o ijila ya jitata jami ni kuswina kwoso. 15 Maji Nzambi yó wabhangesa ku ngi vwala, wa ng’ixana bhukaxi ka ngalasa yê, wa ngisolo 16 phala kuboka o njimbu yambote ku athu akwa jixi jengi, n’ejiye Mon’ê. Kyoso mwene kya ngisolo phala kubhanga o kikalakalu kiki, ki ng’ebhula kima ku muthu. 17 Ki ngayi we ku Jeluzaleme mubhinga itendelesu kwa yó exile jipoxolo ande dyami. Maji ngayi ku Alábya, anga nga vutuka ku Damasku.
18 Kyoso kyabhiti mivu itatu ngabande ku Jeluzaleme phala kukunda Sefa,* anga ngikala-nê kwinyi ni kitanu kya izuwa. 19 Ku jipoxolo joso ngamono ngó Tiyaku phange ya Ngana, o jipoxolo ja mukwá ki nga amono. 20 Yalungu ni maka oso u nga mu misonekena, ngi mitangela bhu pholo ya Nzambi kwila, ki nga mutanga makutu.
21 Mu kusuluka ngayi mu jimbanza ja Sídya ni ja Silisya. 22 O jiphange mu ilunga ya Jikidistá mu Judeya, ka ngijidile. 23 Ene akexile ngó mu kwívwa o jiphange kuzwela kwila: “O muthu wamesenene kubhwisa o ubhezelu wetu, wexile mu tuzukutisa, kindala wa muboka o njimbu yambote yalungu ni ubhezelu wetu.” 24 Ene anga akala mu ximana Nzambi mukonda dyami.