Ku akwa Jihebelewu
9 O kikutu kya dyanga kyakexile ni ijila yê phala kubhanga o kikalakalu mu kididi kikôla mu ixi. 2 Mukonda mu balaka atungile-mu o mbandu ya dyanga, mwakexile o kandeya, o meza, ni jimbolo ja sata. O mbandu yiyi a ixana Kididi Kikôla. 3 Maji kwema dya kulutina ya kayadi, kwakexile mbandu ya balaka a ixana Kididi Kikôla Kinene. 4 Mwenyomo, mwexile o kyenga kya ulu ni Álaka ya Kikutu yovunge ni ulu, mwexile o kitutu kya ulu ni maná ni mbangala ya Alá yasabhukile mafe, ni matadi mosoneke o kikutu. 5 O jixelube jakexile mubhenya jexile kuthandu dya kivunginu kyexile kuthandu dya álaka. Maji kindala, ki kithangana kya kulombolola o ima yiyi.
6 Kyazubha kutunga o ima yoso yiyi, o akunji akexile mubokona mu mbandu ya balaka phala kubhanga-mu o ikalakalu ya Nzambi. 7 Maji o mukunji wabetakota mwéne ngó wakexile mubokona mu mbandu ya kayadi ya balaka lumoxi ku muvu ni kwambata-mu manyinga phala kuloloka o ituxi yê mwene, ni ituxi yatele o mundu sé kukijiya. 8 O nzumbi ikôla ya tu lombolwela kwila, ki kwakexile luwa o njila phala kubhixila mu kididi kikôla kyoso o balaka ya dyanga ki yexile mwaxaxi ka mundu. 9 O balaka yiyi, kijimbwete phala o izuwa yetu, kala kyakexile mubhanga o athu akexile mubhana maujitu ni jisata. Maji o maujitu yá ni jisata jiji, ki jakexile muzelesa ni kuyuka kwoso o kitongolwelu kya muthu wa mubheza Nzambi. 10 O ima yoso yiyi yalungile ngó ni makúdya ni makunwa ni ijila ya kudizelesa.* O itumu yiyi ya kudizelesa o mikutu, yeji nangenena ngó katé kyoso Nzambi kyeji yudika o ima yoso.
11 Maji kyoso Kidistu kyeza kala mukunji wabetakota wa ima yambote yabhitile kyá, mwene wabokona mubalaka ya beta dingi kota, yayuka dingi, ka ibhange ku athu, ki yatokala mu ngongo mumu. 12 Mwene wabokona mu kididi kikôla kana ni manyinga a jihombo ni a jingombe, maji ni manyinga mê mwene. Mwene wakibhange mu lumoxi ngó kwabhu, yu watubhana o kubhuluka kunangenena. 13 Mukonda se o manyinga a jihombo ni a jingombe, ni uthôkwa wa kangombe a azunzumwina ku athu akwa ituxi, phala kwa zelesa o mukutu, 14 o manyinga a Kidistu-phe abetakota. Kuma bhu kaxi ka kutena kwa nzumbi ikalelaku, wadibhakula kwa Nzambi sé kituxi. Mwene wanda zelesa o kitongolwelu kyetu ku ikalakalu yakambe valolo,* phala tubhange o kikalakalu kya Nzambi ya mwenyu!
15 Kyenyiki Kidistu mwene o mukwatekexi wa kikutu kya ubhe, phala o yó oso a asolo kwa Nzambi atambule o mabesá akalelaku a akanena. Kuma Kidistu wafwile phala kwa bhulula mu kwa kula ku ituxi yatele mu thembu ya kikutu kya dyangeleku. 16 Mukonda kyoso muthu kyata kikutu ni Nzambi, kubhinga kwila o muthu wate o kikutu ufwa. 17 Mukonda o kikutu kikyala ni valolo se o muthu wate o kikutu wala hanji ku mwenyu, maji kyene ki kala ngó ni valolo kyoso o muthu wate o kikutu wafu kyá. 18 Kyenyiki o kikutu kyokulu kyamateka we ni manyinga. 19 Mukonda kyoso Mozé kyazwela o itumu ya Kijila ku mundu woso, mwene wakwata o manyinga a jingombe ni a jihombo, ni menya ni ndemba yakusuka ya jimbudi, ni hisopo, anga u a zunzumuna kuthandu dya divulu* ni kuthandu dya mundu woso, 20 kyoso kyambe, wixi: “Yá ene o manyinga a kikutu kya mi tumu Nzambi kutumaka.” 21 Kyene we kimoxi, Mozé wazunzumuna o manyinga kuthandu dya balaka ni kuthandu dya ima yoso yexile mu bhanga nayu o sidivisu ya Nzambi. 22 Mukonda o Kijila kilondekesa kwila, o ima yoso a izelesa bhu kaxi ka manyinga ni kwila, phala kuloloka o ituxi kubhinga kuzunzumuna manyinga.
23 Mukonda dya kiki, o ifika ya ima yala ku dyulu atokalele ku izelesa mu ukexilu yú, maji o ima yene ku dyulu ibhinga jisata ja beta dingi kota. 24 Mukonda Kidistu kabokona mukididi kikôla akibhange ku athu kyexile kifika kya kididi kya kidi. Maji mwene wabokona ku dyulu, kindala mwene watwimanena bhu pholo ya Nzambi mu ku tu dyondela. 25 Mwene kakexile mubhanga kiki phala kudisatela lwavulu kala kyakexile mubhanga o mukunji wabetakota wakexile mubokona muvu ni muvu mu kididi kikôla, ni manyinga a yama.* 26 Se kikyene, mwene watokalele kutala hadi yavulu tunde kyabhange o ngongo. Maji kindala mu disukilu dya mundu,* mwene watukuluka lumoxi kwabhu, phala kujimuna o kituxi mu ku di satela. 27 Kyene we kimoxi, kala o athu kya a xindi kufwa lumoxi, anga kudisukilu a afundisa, 28 kyene we ni Kidistu kya mubhakula ngó lumoxi phala kwambata o ituxi ya athu avulu. Kyoso kyanda tukuluka lwa kayadi kana dingi phala kufwila akwa ituxi, maji mwene anda mumona kwa yó amukingila ni hânji yoso kwabhulula.