Kisumwa Kyalondekesa Kwa Nzwá
7 Kyabhiti o ima yiyi, ngamono jianju jiwana jemana ku hota jiwana ja ngongo, ene akwata o kitembu kitunda ku mbandu jiwana ja ngongo, phala yene ki ibhuke mu ngongo, mu musanza wa kalunga, ni ku mixi. 2 Ngamono dingi anju ya mukwá ya mu banda kwa mu tundila o dikumbi. Yene ya kwatele kidimbu kyatambwile kwa Nzambi ya mwenyu, anga udikola ni dízwi dya swina ku jianju jiwana a abhele o kikalakalu kya kubheka jiphaxi mu ngongo ni ku musanza wa kalunga, wixi: 3 “Kanenu kubheka jiphaxi mu ngongo, né ku musanza wa kalunga, né ku mixi, katé ki tuzubha kuta o idimbu ku mabhômo a abhika a Nzambi yetu.”
4 Anga ngivwa o konda ya yó a ate o idimbu, ene atenesa hama ni makwinyi awana ni kiwana kya midi, atokala ku miji yoso ya an’â Izalayele:
5 Ku mwiji wa Judá, kwinyi ni kiyadi kya midi a ate o idimbu;
ku mwiji wa Lubene, kwinyi ni kiyadi kya midi;
ku mwiji wa Ngade, kwinyi ni kiyadi kya midi;
6 ku mwiji wa Azele, kwinyi ni kiyadi kya midi;
ku mwiji wa Nafitali, kwinyi ni kiyadi kya midi;
ku mwiji wa Manasa, kwinyi ni kiyadi kya midi;
7 ku mwiji wa Ximinyá, kwinyi ni kiyadi kya midi;
ku mwiji wa Levi, kwinyi ni kiyadi kya midi;
ku mwiji wa Izakale, kwinyi ni kiyadi kya midi;
8 ku mwiji wa Nzebulone, kwinyi ni kiyadi kya midi;
ku mwiji wa Zuze, kwinyi ni kiyadi kya midi;
ku mwiji wa Bejamí, kwinyi ni kiyadi kya midi a ate o idimbu.
9 Kyabhiti o ima yiyi, ngamono mundu wavulu, kana muthu utena ku ukondala. Ene atundu mu jixi joso, ku miji yoso, ku madyembu moso, ni ku madimi moso, emana bhu pholo ya kyandu ni bhu pholo ya Kambudi, azwata izwatu yalebha, yazele. Ene akwata isalale ya maye bhu maku mâ. 10 Akexile mudikola ni dízwi dya swina, exi: “O kubhuluka kwetu kutunda kwa Nzambi yetu waxikama bhu kyandu ni ku Kambudi!”
11 O jianju joso jemana ja kondoloka o kyandu, o tufunga ni jianju jiwana. O jianju joso ja fukama ni jipholo bhoxi, bhu pholo ya kyandu, anga jibheza Nzambi, 12 jambe: “Kyene!* Nzambi yetu atambule o kiximanu, o fuma, o unjimu, o kisakidilu, o kijingu, ni kutena ni nguzu katé ku hádya ni hádya. Kyene!”*
13 Kyenyiki, kafunga kamoxi wa ngi ibhwidisa: “A nanyi yá azwata o izwatu yalebha yazele? Ene atundu kwebhi?” 14 Mu kithangana kyenyókyo nga mu tambwijila: “Ngana yami, éye wakijiya.” Mwene wa ngambela: “Yá ene o athu atundu ku hadi yadikota, ene asukula o izwatu yâ yalebha ni ku izelesa mu manyinga ma Kambudi. 15 Mukonda dya kiki, ene emana bhu pholo ya kyandu kya Nzambi, a mu sidivila usuku ni mwanya mu tembulu yê. O Yó waxikama bhu kyandu wanda kwalanga ni balaka yê. 16 Ene kanda kala dingi ni nzala, kanda kala dingi ni dinyota, o mwanya watu ni kutema kiwanda kwa kwama dingi. 17 Mukonda o Kambudi wala mwaxaxi ka kyandu, wanda kwa inga ni kwa endesa bhu jihotho* ja menya a mwenyu. Nzambi wanda kwa kondona o masoxi ku mesu mâ.”