Ku akwa Jihebelewu

13 Sulukenu mu kudizola ni jiphange. 2 Kimujimbe kuzalela o asonyi, kuma amoxi mu kubhanga kiki azalela jianju sé ku kijiya. 3 Lembalalenu yó oso ala mu jikaleya,* kala amikutu nawu kumoxi. Lembalalenu we yó a mwatalesa hadi, kuma enu enyoso mwala mu mukutu umoxi ngó. 4 Athu oso atokala kubhana ujitu ku ukaza, o mala ni ahatu adikale jifiyele mudyâ, mukonda Nzambi wanda fundisa o jindumbu* ni akwa jiphanda. 5 Ki muzole o kitadi maji sangulukenu ni ima i mwala nayu, mukonda Nzambi wambe: “Eme nuka nganda kuxisa, ki nganda kubwazeka we, kana.” 6 Phala tuswine ni tuzwele, twixi: “Jihova mwene o mukwatekexi wami, kinganda kala ni wôma. Ihi itena kungibhanga o muthu?”

7 Xinganekenu o athu amikala kupholo, yó amitudila o mak’â Nzambi. Mu kumona o wendelu wâ wambote, kayelenu o phangu yâ ya kixikanu.

8 Jezú Kidistu mwene umoxi, maza, lelu ni ku hádya.

9 Kanenu kwehela ku mi nganala ku maulongelu mavulu a makutu. Muveji dya kuswinisa o mixima yenu ni makúdya,* mu iswinisa ni kima kyabetakota, o ngalasa ya Nzambi.

10 Etu twala ni kalatódyu ketu, maji o yó abhanga o sidivisu ya Nzambi mu balaka kala ni ujitu wa kúdya o ima yala ku kalatódyu. 11 O mukunji wabetakota wene mubokona ni manyinga ayama mu kididi kikôla kinene, o xitu ya yama ene mu ibhana kala sata ya kituxi, anga ayohela dikanga dya kididi mwatungile o athu. 12 Kyenyiki Jezú watale we hadi kukanga dya mwelu wa mbanza phala kuzelesa o mundu ni manyinga mê. 13 Mu kyenyiki, twendyenu mu disanga-nê dikanga dya kididi mwatungu o athu ni mu kwambata o kixongwenu kyambatele mwene, 14 mukonda etu bhabha kitwala ni mbanza inangenena maji twamusota ni hânji yoso o mbanza ya keza-ku. 15 Bhukaxi ka mwene, tu bhakulyenu jinga kwa Nzambi o sata ya kiximanu. O sata yiyi, yene o kiximanu kitunda ku dikanu dyetu, kijidisa o dijina dyê ku athu. 16 Ki mu jimbe we kubhanga o mbote ni kuwana ni akwenu o ima imwala nayu mukonda Nzambi usanguluka ni jisata jiji.

17 Beleselenu yó amikala kupholo, atumakyenu, mukonda ene a milanga, kuma ene akabhakula jikonda, phala o kikalakalu akibhange ni kusanguluka, kana ni kuluwala. Mukonda se akibhanga ni kuluwala, kukala kuxixima kwenu.

18 Kolokotenu mu ku tu sambela, mukonda twejiya kwila, twala ni kitongolwelu kyazele, kuma twamesena kukala tu athu a kidi mu ima yoso. 19 Maji ngi mi tendelesa benge-benge phala mu ngi sambele ni ngitene kwiza ku mi kunda ni lusolo.

20 Bhukaxi ka manyinga a kikutu kya kalelaku, o Nzambi ya kutululuka, wa balumuna mwaxaxi ka madifundu o kafunga ka dikota ka jimbudi, Ngana yetu Jezú. 21 O Nzambi ya paze amibhane o ima yoso yambote i mwa bhindamena phala kubhanga o vondadi yê! Bhukaxi ka Jezú Kidistu ubhanga momwenu yoso i mu sangulukisa, mwene atambule o kijingu katé ku hádya ni hádya. Kyene!*

22 Ngi mitendelesa enu jiphange jami, phala mwivwe ni mwanyu woso o izwelu yiyi yanda mi swinisa mukonda nga mi sonekena o kamukanda kenyaka. 23 Ngamesena kumitangela kwila o phang’yetu Timote amujituna kyá. Se mwene wiza kumikunda, nganda kwiza-nê kumoxi.

24 Menekenenu o jiphange joso amikala kupholo ni athu oso osole.* O jiphange akwa Itálya a mi menekena.

25 O ngalasa ya Nzambi ikale ni enu enyoso.