Kisumwa Kyalondekesa Kwa Nzwá
19 Kyoso kyabhiti o ima yiyi, ngevu dízwi dya swina dya mundu wavulu ku dyulu, dixi: “Ximanenu Jihova!* O kubhuluka, o fuma ni kutena kwatokala kwa Nzambi yetu. 2 Mukonda o kufundisa kwê kwa kidi, kwa yuka. Kuma mwene wa kaxtikala o kidyanzunga kyadikota kyakexile mu nganala o athu mu ngongo ni undumbu wê,* Nzambi wa muvutwila phonzo mukonda dya manyinga a abhik’ê.” 3 Ene adikola lwa kayadi, exi: “Ximanenu Jihova!* O dixi dya kibwika dya kidyanzunga dya ndaya ni kubanda katé ku hádya ni hádya.”
4 Bhenyobho o makwinyi ayadi ni kiwana kya tufunga, ni jianju jiwana afukama ya abheza Nzambi waxikama ku kyandu. Ene ambe: “Kyene!* Ximanenu Jihova.”*
5 Ngevu we dízwi dyatundu ku kyandu, dyexi: “Ximanenu o Nzambi yetu, enu oso mu abhik’ê, ni jindenge ni makota mwa mu kwatela wôma.”
6 Anga ngivwa dízwi kala dya mundu wavulu ni dya menya avulu ni dya inuminu ya makota ya jinzaji, o dízwi didi dyambe: “Ximanenu Jihova!* Mukonda Jihova Nzambi yetu, o Muteni wa Yoso wamateka o kutumina! 7 Tu sanguluke, tu sangulukyenu kyavulu, Nzambi tu mu ximanyenu, mukonda o kithangana kya ukaza wa Kambudi kyabhixila kyá. O dibhanga dyê wa di yudika kyá. 8 Kyene, o dibhanga adibhana o ujitu wa kuzwata izwatu ya linyu ya fina, yazele, ya musedima, kuma o linyu ya fina ilombolola o ibhangelu yayuka ya athu a asolo.”*
9 O anju ya ngyambela: “Soneka: Azediwa yó oso a exana phala o fesa ya ukaza wa Kambudi.” Mwene wa ngyambela dingi: “Yá ene o maka a kidi a Nzambi.” 10 Kyenyiki nga mu fukamena bhu inama yê phala ku mubheza. Maji mwene wa ngyambela, wixi: “Aluka! Kana kubhanga kiki! Eme wami ngi mubhika kala eye ni jiphange jê, ala ni kikalakalu kya kubhana umbangi walungu ni Jezú. Bheza ngó Nzambi! Mukonda o kubhana umbangi walungu ni Jezú kwene kubhangesa o muthu kutanga o maka a upolofeta.”
11 Anga ngimona o dyulu dya jikuka, kwamoneka kabalu kazele. O wasambela ku kabalu amwixana Fiyele, mukwa Kidi, mwene ufundisa ni kuyuka, ulwa we o ita ni kuyuka. 12 O mesu mê edi kala mulengu wa túbhya, ku mútwe wê kwala itundu yavulu. Mwene a musoneka dijina, maji kana muthu wa dijiya, kikale mwene ngó. 13 Ku izwatu yê kwala manyinga, mwene amwixana Dyambu dya Nzambi. 14 O ifuxi ya masoladi a dyulu yakexile ku mu kayela, ya sambela ku jikabalu jazele yazwatele we linyu ya fina yazele, yayuka. 15 Mu dikanu dyê mwatundu xibhata yalebha yatu kyavulu, phala kujibha nayu o akwa ifuxi, mwene wanda kwatumina* ni mbasá ya felu. Mwene we wanda dyota-dyota mu ditangi dya kubhangela vinyu ya njinda ya Nzambi o Muteni-a-Yoso. 16 Ku kizwatu kyê, ku mbandu ya ditabela asoneka-ku dijina, dyexi: Sobha ya jisobha ni Ngana ya jingana.
17 Ngamono we anju yemana ku dikumbi, yene yadikola ni dízwi dya swina, i yambela o jinjila joso jakexile mutuka bhulu: “Zenu kuku, mu bhongoloke phala o fesa yadikota ya Nzambi. 18 Ni mudye o xitu ya jisobha, ya jikabhitangu ja masoladi, ya mayala ala mazonda, ya jikabalu, ni ya yó a sambela ku jikabalu, ni ya athu oso kikale o abhika, kikale o athu ala ni ufolo, ni ya jindenge ni ya makota.”
19 Ngamono we o kyama kya muxitu ni jisobha ja ngongo ni ifuxi yê, adyongeka phala kulwa ita ni yó wa sambela ku kabalu kazele ni kifuxi kyê. 20 O kyama kya muxitu a kikwata kumoxi ni polofeta ya makutu, wakexile mubhanga madiwanu bhu pholo yê, phala kunganala o athu atambwile o kidimbu kya kyama kya muxitu ni kunganala yó akexile mubheza o kiteka kyê. Kiyadi kyâ, a atakula ni mwenyu ku kizanga kya túbhya kya wama ni xôfidi. 21 Maji amukwa, a ajibha ni xibhata yalebha yatundile mu dikanu dya yó wasambela ku kabalu kazele. O jinjila joso anga jidya, jekuta ni xitu yâ.