Kisumwa Kyalondekesa Kwa Nzwá

22 O anju ya ngi londekesa ngiji ya menya a mwenyu, azele kala kidistalu, yakexile mutunda ku kyandu kya Nzambi ni ku kyandu kya Kambudi. 2 O ngiji yakexile mu kunguluka mukaxi ka kikoka kya mbanza. Ku sambwa jiyadi ja ngiji kwakexile mixi ya mwenyu, yakexile mu kwima ibundu kwinyi ni kiyadi kya jiveji ku muvu. Kiki kilombolola kwila yakexile mu kwima ibundu, lumoxi ku mbeji. O máfwe a mixi exile phala kusaka nawu o akwa ifuxi.

3 Sé-ku muthu mu mbanza anda muloka dingi. Maji o kyandu kya Nzambi ni kya Kambudi kyanda kala mu mbanza. O abhik’ê anda ku mubheza, 4 ene anda mona o pholo ya Nzambi. O dijina dya Nzambi dyanda kala bhu mabhômo mâ. 5 Mu mbanza kimwanda kala dingi usuku, ene kanda bhindamena o mukengeji wa tundeya, né we o mukengeji wa mwanya, mukonda o Jihova Nzambi wanda kwabhana o mukengeji, ene anda tumina katé ku hádya ni hádya.

6 Mwene wa ngyambela dingi: “O maka yá a kidi, a fiyele.* Kyene, Jihova, o Nzambi wazwela bhukaxi ka jipolofeta jê, watumikisa o anju yê phala kulondekesa ku abhik’ê, o ima yanda bhita kindala. 7 Ivwa! Nga mu kwiza ni lusolo. Wazediwa yó woso utumaka o izwelu ya kikanenu kya mukanda yú.”

8 Éme mwéne Nzwá, ngakexile mumona ni kwívwa o ima yiyi. Kyoso kingevu ni kumona o ima yiyi, ngafukama bhu inama ya anju ya ngi londekesele o ima yenyiyi, phala ku mubheza. 9 Kyenyiki, yene ya ngyambela, wixi: “Aluka! Kana kubhanga kiki! Eme wami ngi mubhika kala eye, ni wa jiphange jé o jipolofeta, ni wa yó ene mutumaka o maka osoneke mu mukanda yú. Bheza ngó Nzambi.”

10 O anju ya ngyambela dingi: “Kana kujika o maka a upolofeta ala mu mukanda yú, mukonda o thembu ya kubhita o ima yiyi ya zukama kyá. 11 O muthu wa bhukumuka a suluke mu kubhukumuka kwê, o kifusa a suluke mu ufusa wê, maji o muthu wayuka a suluke mu kuyuka kwê, o muthu ukôla a suluke mu kuzela kwê.

12 “‘Ivwa! Eme ngiza ni lusolo. O futu i nganda bhana yala n’eme, phala kuvutwila ku muthu mu ibhangelu yê yoso. 13 Éme ngi Álafa ni Omeka,* éme nga dyanga éme nga sukidila-ku, ngi dimatekenu, ngi disukilu. 14 Azediwa yó asukula o izwatu yâ yalebha, n’a tene kuya ku mixi ya mwenyu, phala atene we kubhita mu mabhitu, n’a bokone mu mbanza. 15 Bhu kanga dya mbanza bhene bhwala o jimbwa,* ni aloji, ni akwa kubhanga o undumbu,* ni ijibhangânga, ni abhezi a iteka, ni yó a wabhela o makutu ni kwa tanga.’

16 “‘Eme Jezú, nga tumikisa o anju yami phala ku mitangela o ima yiyi phala o mbote ya ilunga. Eme ngi lundanji ni mbutu ya Davidi, ngi thethémbwa imwika mu kamene.’”

17 O nzumbi ikôla ni dibhanga a muzwela: “Zá!” Woso wívwa o maka enyá azwele: “Zá!” Woso wala ni dinyota eze, woso wamesena atambule mu kingoho, o menya a mwenyu.

18 “Yó woso wa mu kwívwa o maka a upolofeta osoneke mu mukanda yú, ngi mwambela kwila: Se muthu ubandekesa kama mu ima yiyi, Nzambi wanda mu bandekesa we o mabhebhu osoneke mu mukanda yú. 19 Se muthu ukatula kama ku izwelu yósoneke mu mukanda yú wa upolofeta, Nzambi kanda mwehela kudya o ibundu ya mixi ya mwenyu, né ngó kukala mu mbanza ikôla.

20 “O yó ubhana umbangi walungu ni ima yiyi, uzwela: ‘Kyene, eme ngiza ni lusolo’”

“Kyene mwene!* Zá, Ngana Jezú.”

21 O ngalasa ya Ngana yetu Jezú ikale ni athu osole.*