Ku akwa Jihebelewu
7 Kuma o Melekizedeke mwenyú sobha ya mbanza ya Saleme ni mukunji wa Nzambi Muteni wa Yoso, wayi mudisanga ni Mbalahamu kyoso mwene kyakexile muvutuka mu ita mukutolola o jisobha, mwene anga wa mu besowala. 2 Mbalahamu wa mubhana* o mbandu ya kakwinyi ya ima yoso yakexile nayu. Kya dyanga o dijina dyê, dilombolola “sobha ya kuyuka,” o kya kayadi mwene we sobha ya mbanza ya Saleme dilombolola “sobha ya paze.” 3 Mwene kamoneka tata né mama né mwiji. O dimatekenu dyê ka dijiya né o disukilu dyê, maji wa difwangana ni Mon’a Nzambi, mwene mukunji katé ku hádya ni hádya.
4 Talenu o ukota wa diyala didi, kukwetu* Mbalahamu wa mubhana mbandu ya kakwinyi ya ima yoso yambote yambatele ku ita. 5 Mu kidi, o Kijila kya Mozé kilonga kwila, o an’a Levi atambwile o ukunji, ene atokalele kutambula madijimu ku mundu mba ku jiphange jâ, sumbala ene atokalele kumwiji wa* Mbalahamu. 6 Melekizedeke-phe, katokalele ku mwiji wa Jilevita, maji Mbalahamu wa mubhana o dijimu anga mwene ubesowala yó a mubhangele o ikanenu kwa Nzambi. 7 Kikwala phata kwila o muthu ubesowala wala kota, o yó utambula o dibesá ndenge. 8 O Jilevita jexile mutambula o madijimu, athu akexile mufwa, maji o muthu wene mutambula o madijimu, o Mikanda Ikôla ilondekesa kwila mwene muthu katena kufwa. 9 Tutena kuzwela kwila bhukaxi ka Mbalahamu katé mwene Levi yó utambula o madijimu, wafutu we o madijimu. 10 Mukonda Levi ka mu vwalele luwa* kyoso Melekizedeke kyadisange ni kukwê.
11 Kyenyiki se o athu ejisanga o kuyuka bhukaxi ka ukunji wa Jilevita (kuma kiki kyabhangele mbandu ku Kijila kya Mozé kyabhana ku athu), mukonda dyahi kwabhingile dingi kumoneka mukunji wengi, mukunji “kala kyakexile Melekizedeke” kana “kala kyakexile Alá?” 12 Se o kikalakalu kya ukunji akilungulula, o Kijila atokala ku kilungulula we. 13 Mukonda o diyala di twa mutanga bhabha mwene watundu ku mwiji wengi, ku mwiji wê kana-ku muthu wa sidivila kala mukunji bhu kalatódyu. 14 Mukonda twejiya kwila o Ngana yetu watokalele ku mwiji wa Judá, maji Mozé kazwelele yalungu ni akunji kutunda ku mwiji wenyó.
15 Kindala o maka yá twa ejiya dingi kyambote, mukonda kweza mukunji wengi wadifwangana ni Melekizedeke. 16 Mwene mukunji ki mukonda dya mwiji kwatundu maji mukonda mwene wala ni kutena kwa kukala ni mwenyu sé dizubhilu. 17 Yalungu ni mwene o Mikanda Ikôla yambe: “Eye wala u mukunji katé ku hádya ni hádya kala kyexile Melekizedeke.”
18 Kyenyiki, o kitumu kya dyangeleku kyajimuka mukonda kikyala dingi ni kutena, kikyala dingi ni valolo. 19 Kuma o kitumu ki kyayukisa kima, maji o kidyelelu kya kidi kyayukisa o ima, kyenyiki bhukaxi ka kidyelelu kiki tutena kuzukama kwa Nzambi. 20 Kuma kiki akibhange ni kuloka, 21 (maji sayi athu akituka akunji sé kuloka, maji Jezú wakituka mukunji bhukaxi ka kuloka, kyoso Nzambi kya lokele yalungu ni mwene, wixi: “Jihova waloka, mwene kanda lungulula o kixinganeku kyê kwila: ‘Eye wala u mukunji katé ku hádya ni hádya.’”) 22 Kyenyiki Jezú wakituka o kijimbwete kya kikutu kyabetakota. 23 Kyenyiki kwabhingile we kukala akunji avulu mu ku dibhinganesa, mukonda o kufwa kwexile mwafidisa kunangenena mu kukalakala kala akunji. 24 Maji, kuma Jezú wala ku mwenyu katé ku hádya ni hádya, o ukunji wê katena ku ubhinganesa. 25 Kyenyiki mwene wala ni kutena kwa kubhulula yó azukama kwa Nzambi bhukaxi ka mwene, mukonda mwene wala ku mwenyu katé ku hádya ni hádya phala kwa dyondela jinga.
26 Kima kyambote kukala ni mukunji wabetakota wala ni idifwa yiyi: Muthu wa fiyele, wakambe kikuma, kala ni dixaka,* ka difwangana ni akwa ituxi, amuzangeleka katé ku dyulu. 27 Mwene ka difwangana ni akunji amukwa abetakota, mukonda mwene kabhingi kubhana jisata izuwa yoso, kya dyanga phala o muloloki wa ituxi yê mwene, kya kayadi phala o muloloki wa mundu, mukonda mwene wabhange kiki lumoxi katé ku hádya ni hádya, kyoso kya bhakula o mwenyu wê. 28 Mukonda mu Kijila kya Mozé asola athu akwa ituxi phala kukala akunji abetakota, maji kyoso kyabhiti o Kijila Nzambi waloko yu wasolo Mona wayuka katé ku hádya ni hádya.