Ku akwa Jihebelewu
8 Kiki, kyene o kima kyabetakota ki twa muzwela, kwila: Etu twala ni mukunji wabetakota. O mukunji wetu wabetakota waxikama ku kadilu ka kyandu kya Nzambi Muteni wa Yoso ku dyulu. 2 Mwene ukalakala mu kididi kikôla ni mu balaka yakidi yatungu Jihova, kana o athu. 3 Mukonda mukunji woso wabetakota amusola phala kubhana maujitu ni jisata. Kyenyiki, kwabhingile we kwila, o mukunji yú wabetakota ukala ni kima phala kusatela. 4 Se mwene wakexile mu ixi kejikala mukunji, mukonda mu ixi sayi kyá akunji ene mubhana maujitu kala kituma o Kijila. 5 O athu yá o kikalakalu kyakexile mubhanga kyedile kala kifika ni kizuzumbya kya ima yala ku dyulu, kala o kitumu kyabhana Nzambi kwa Mozé, kyoso mwene kyakexile phala kutunga o balaka. Nzambi wa mwambelele, wixi: “Aluka phala o ima yoso u ibhange kala kyoso ki nga kwidikisa ku mulundu.” 6 Kindala Jezú watambula kikalakalu kya katunda, mukonda mwéne o mukwatekexi wa kikutu kyabetakota, o kyokulu ndenge. O kikutu kiki, kyobhange ni ikanenu yabetakota, o ikanenu yokulu ndenge.
7 Se o kikutu kya dyanga kyexile kikutu kyayuka, kikweji bhinga dingi kikutu kya kayadi. 8 Mukonda Jihova wamono itondalu mwaxaxi ka mundu kyoso kyambe, wixi: “Talesenu! Izuwa iyiza, ngandata kikutu kya ubhe ni dibhata dya Izalayele ni dibhata dya Judá.” 9 Jihova wambe dingi, wixi: “O kikutu kiki, ki kyanda sokela ni kikutu kingatele ni jikuku jâ, mu kizuwa ki nga akwatele mu maku phala kwakatula mu ixi ya Ijitu. Kuma ene ka kolokotele mu kikutu kyami, eme ki nga asuwile dingi.”
10 Jihova wambe, wixi: “Mukonda, kiki kyene o kikutu ki ngandata ni dibhata dya Izalayele kyoso kyanda bhita o izuwa yiyi, eme ngandata o ijila yami mu ilunji yâ, ni ku isoneka mu mixima yâ, eme nganda kala ngi Nzambi yâ, ene andakala mundu wami.
11 “‘Kikwanda kala dingi muthu ulonga mukwa dyembu dyê mba phang’yê, wixi: “Ejiya Jihova,” mukonda ene oso anda ngijiya, tunde ku mona ndenge katé ku mwadyakime. 12 Mukonda nganda kwaloloka o ibhangelu yâ yayibha, kinganda lembalala dingi o ituxi yâ.’”
13 Nzambi mu kuzwela yalungu ni “kikutu kya ubhe,” walondekesa kwila o kikutu kya dyanga kyokulu kyá. Se o kima kyokulu kyá anga kikuka, kyene kijimuka.