Hozeya
4 Ivwenu o kizwelu kya Jihova, enu mu mundu wa Izalayele,
Jihova wanda kastikala o athu atungu mu ixi yiyi.
Mukonda o mundu wa ixi yiyi, kene muzwela o kidi, kene ni henda, kejiya we Nzambi.
2 Mu ixi yoso, o athu aloka, atanga makutu,
Ajibha, anyana, ata jiphanda.
Muthu ni muthu ujibha mukwa, ithangana yoso.
3 Mukonda dya kiki, o athu atungu mu ixi yiyi, anda dila,
Enyoso anda kumbama.
O yama, o jinjila ni jimbiji mu musanza wa kalunga,
Janda fwa.
4 “Mukonda dya kyenyiki, kibhukale muthu udikwata-nawu mba u abazela,
Mukonda o mundu wa mbanza yiyi, wedi kala yó azoka ni mukunji.
5 Mukiki-phe, eye wanda dibhala mu mwanya watu.
Kala kidibhala o muthu mu usuku, kyene we ki wanda dibhala eye ni polofeta.
Eme nganda bwika mam’enu.
6 Nganda bwika o mundu wami mukonda kangijiya.
Kuma mwaditunu kungijiya, nganda midituna we,
Phala kimukale dingi mu akunj’ami.
Kuma mwajimbi o kijila kya Nzambi yenu,
Eme we nganda jimba o twana twenu.
7 Kyoso ene kyakexile mudisokolola, exile mu ngibhukumukina dingi.
O kijingu kyâ, nganda kikitula lusebhu.*
8 Ene a muneta mukonda dya ituxi ya mundu wami.
Ene amesena kwila, o mundu usuluka ni kuta ituxi.
9 O yanda bhita ni mundu yú, yene we yanda bhita ni akunji.
Nganda ku afundisa mukonda dya wendelu wâ wayibha.
Nganda bhangesa kwila, atala hadi mukonda dya ibhangelu yâ.
10 Ene anda dya, maji kanda kwikuta.
Anda dibhakula mu kubhanga undumbu, maji kanda sokoloka,
Mukonda kasuwu Jihova.
11 O undumbu, o vinyu yokulu ni vinyu ya ubhe,
Ya akatula o kilunji kya kubhanga ima yambote.
12 O mundu wami, usota o kikwatekesu kya iteka yobhange ni mabaya,
Hé abhanga o ima ya atangela o mbangala, yene muzambula-nayu.
O hanji yâ ya kubhanga o undumbu, ya abhangesa kubhanga ima yayibha.
Mukonda dya undumbu, ene adituna kubelesela Nzambi.
13 Ene abhakula jisata ku thandu a milundu,
Oha jisata ku tumilundu ni bhoxi dya mixi ya kaluvalu
Ni mixi ya xitolake ni bhoxi dya mixi yoso yamakota,
Mukonda dya ilembeketa yambote ya mixi yiyi.
Mukonda dya kiki, o ana ahatu adita mu undumbu,
O jimbalakaji jâ, ata jiphanda.
14 Sumbala o twana twenu abhanga undumbu, kinganda ku akastikala.
Kinganda kastikala we, o jimbalakaji jenu, sumbala ate jiphanda.
Mukonda o mayala enda kumoxi ni iwaya.
Abhakula jisata kumoxi ni iwaya ya tembulu,
O mundu wala kiki, wakambe o kilunji, anda ku ubwika.
15 Eye u Izalayele, sumbala wa mubhanga undumbu, Judá kalé ni kikuma.
Kanenu kuya ku Jidingale mba ku Bete-Avene.
Kanenu kulôka mu kwamba:
‘Kala Jihova kyene ku mwenyu!’
16 Izalayele wahuku, kala kibaluka o ngombe ya mukaji.
O kwila Jihova wanda kwa inga kala kyene mu kwinga o kambudi mu mukáwu?
17 Efalayíme wa mubheza iteka.
Mwehyenu ubheka-wê.
O atwamen’yâ,* a wabhela kubhanga ima ibhekela jisonyi.
19 O kitembu kyanda kwa nyinga ni kwa ambata.
Sonyi janda ku akwata mukonda dya jisata jâ.”