Hozeya

3 Jihova wa ngambela, wixi: “Kala Jihova kyazolo o mundu wê wa Izalayele, sumbala ene avutuka mu kubheza jinzambi jengi ni kujibhakwila jibolo jobhange ni jiuva,* eye nde dingi lwamukwa, zola o muhatu wene mubhanga o undumbu, a muzolo ku diyala dyengi.”

2 Mukyenyiki, eme nga musumbu mu dikwinyi ni kitanu kya mabele a phalata ni homele* imoxi ya Sevada ni kaxaxi. 3 Eme nga mwambela ngixi: “Eye wanda kala u muhatu wami mu izuwa yavulu. Kana kukala dingi u kiwaya, kana kuzeka ni diyala dyengi. Eme we kinganda zeka n’eye.”

4 Mu mivu yavulu, o mundu wa Izalayele kanda kala ni sobha, kanda kala ni kilamba, kanda bhakula jisata, kanda kala ni jiphiladi phala ku jibheza. Kanda kala ni efode, kanda kala ni iteka mu jinzo jâ. 5 Kyoso kyanda bhita o ima yiyi, o mundu wa Izalayele wanda vutuka mu kusota Jihova Nzambi yâ, ni Davidi, sobha yâ. Ene anda teketa ni wôma, anda vutuka kwa Jihova mu kubhinga o dibesá dyê mu izuwa isukidila-ku.