Dya Kayadi Dya Malunda
5 Kyenyiki, sobha Solomá wazubha o kikalakalu kyoso kyakutunga o inzo ya Jihova. Mukusuluka, wambata mu tembulu o ima yoso yabhakwile tat’ê Davidi kala ima ikôla, yu wambata we o phalata ni ulu ni imbamba yoso, mu kididi mwene mubhakela o ima yavalolo mu inzo ya Nzambi yakidi. 2 Mu izuwa yenyoyo, Solomá wongeka o adyakime a Izalayele, o atwameni a miji ni atwameni a mabhata a jitata ja akwa Izalayele, ene eza mu Jeluzaleme phala kukatula o Álaka ya Kikutu kya Jihova mu Mbanza ya Davidi, kifwa, ku Ziyone. 3 O mayala oso a Izalayele adyongeka bhwexile o sobha mu fesa.* O fesa yiyi ene mu ibhanga mu mbeji ya kasambwadi.
4 Kyoso o atwameni oso a Izalayele kyeza, o Jilevita azangula o Álaka. 5 O akunji ni Jilevita* ambata o Álaka ya Nzambi, o balaka ya kudyongekela ni ima yoso ikôla yakexile mu balaka. 6 Sobha Solomá ni mundu woso wa Izalayele a exanene phala kudyongeka ni mwene, akexile ku pholo ya Álaka. Ene abhakula jimbudi javulu ni jingombe, katenene kujikwata konda. 7 Mukusuluka, o akunji ambata o Álaka ya Kikutu kya Jihova bhu kididi kyê, mu dixilu dya inzo, kifwa mu Kididi Kikôla Kinene. Ene atula o Álaka moxi a mabhabha a jikelubini. 8 Kyenyiki, o mabhabha a jikelubini exile ku thandu dya kididi bhwexile o Álaka. O jikelubini anga jivungina o Álaka ni mikambu. 9 O mikambu yalebhele kyavulu, ejitena ku imona mu Kididi Kikôla, bhwa lungila o dixilu, maji kejitena ku imona bhu kanga. O mikambu yala kwenyoko kate mu izuwa ya lelu. 10 Mu Álaka mwexile ngo o matadi ayadi atudile-mu Mozé ku Holebe, kyoso Jihova kyabhange o kikutu ni akwa Izalayele mu kutunda ku Ijitu.
11 Mukusuluka, o akunji atundu bhu Kididi Kikôla (o akunji a ibuka yoso exile bhenyobho adizelesele). 12 O Jilevita joso, o jingimbidi atokalele ku kibuka kya Azafe, Hemane, Jedutune ni an’ê ni jiphange jê, emanene ku mbandu ku tundila o dikumbi dya kalatódyu, ene atele izwatu yafwama, akwatele iselekete ya kwimba kala o tumbánza, tungoji ni misaxi. Ene akexile kumoxi ni hama ni makwinyi ayadi a akunji exile muxika o jikoloneta. 13 O akexile muxika o jikoloneta ni jingimbidi, exile muximana ni kusakidila Jihova kumoxi. O athu exile mu kwivwa o jibuya ja jikoloneta, ja tumbánza ni ja iselekete yamukwa ya kuxika, kyoso ene kyexile muximana Jihova, ni izwelu yiyi: “Mwene muthu wambote, o henda yê inangenena kate ku hádya ni hádya.” Mu kithangana kyenyokyo, kwamoneka dituta dyavungina o inzo ya Jihova. 14 O akunji katenene kwimana bhenyobho phala kubhanga o kikalakalu kyâ mukonda dya dituta, kuma o kubhenya kwa Jihova, kwavungina o inzo ya Nzambi yakidi.