Jobe
9 Jobe-phe wavutula, wixi:
2 “Ngejiya kwila kidi ki wa muzwela.
Maji kyebhi o mukwa ituxi utena kuzwela kwila wayuka bhu pholo ya Nzambi?
3 Se bhukala muthu umesena kufunda ni Nzambi,
Mwene kejitena kutambwijila né ngo kibhwidisu kimoxi ku midi ya ibhwidisu yeji mubhanga Nzambi.
4 Mwene njimu,* wala ni kutena kwadikota.
Nanyi utena kuzoka-nê n’akale ni kutululuka?
5 Mwene usondolola o milundu sé muthu kukijiya,
Mu njinda yê, o milundu u ilundumuna.
6 Mwene utungutisa o ixi, u isondolola bhu kididi kyê,
O ixi itunguta tunde bhu yamatekena.
7 Mwene ufidisa o dikumbi kubhenya,
Uxita o mukengeji wa jithéthembwa.
8 Mwene o dyulu udizala ubheka wê, kala mulele wadikota,
Udyota o mabhuku amakota a musanza wa kalunga.
9 Mwene wabhange ibuka ya jithéthembwa a ixana Axi,* Kezili,* Kimahe,*
Wabhange we o jithéthembwa ja lwiji.
10 Ubhanga ima yonene ibhonza ku ijiya,
Ima ya madiwanu katena ku ikwata konda.
11 Mwene u ngibhita mwene bhu pholo yami, maji kingitena ku mumona,
Ubhita mwene bhu mbandu yami, maji ngilembwa ku kijiya.
12 Kyoso mwene kyatambula kima, nanyi utena ku mufidisa?
Nanyi utena ku mwibhula: ‘Mukonda dyahi wa mubhanga kiki?’
13 Nzambi kanda sweka o njinda yê.
Kate mwene o akwatekexi a Lahabe,* anda fukama bhu pholo ya Nzambi,
14 Kwambe dingi se nga mutambwijile.
Mu kuzwela-nê, ngeji bhinga kusola kyambote o izwelu!
15 Né mwene se ngalungili’ami, kingeji mutambwijila,
Ngeji dyondela ngo ku mufundixi* wami phala ku ngikwatela henda.
16 Se ngimwixana, o kwila wanda ngitambwijila?
Ngafika kwila, mwene kanda kwivwa o dízwi dyami.
17 Mukonda mwene wa ngikastikala ni ibhidi ya ngiza kala kiza o kitembwe kyanguzu,
Sumbala kingexile ni kikuma, ku hadi yami wate-ku dingi.
18 Mwene ka mungehela kubhwima,
Ku hadi yami wamuta-ku dingi.
19 Se twamesena kuzwela yalungu ni kutena, Nzambi mwéne wala ni kutena.
Se twamesena kuzwela yalungu ni kuyuka, Nzambi wamba: ‘Nanyi utena ku ngitangela kwila ngalweza?’
20 Se ngalungile, o dikanu dyami dyéne mwene dyeji ngibelesa,
Né mwene se kingexili’ami ni kikuma, mwene weji ngibelesa.
21 Né mwene se ngexile fiyele, ki ngejiya yeji bhita n’eme,
O mwenyu yú wa ngikumu kya.
22 Yoso yasokwe ngo! Kiki kyene ki ngibhangesa kuzwela ngixi:
‘Mwene ubwika o athu ambote, ubwika we o athu ayibha.’
23 Se kwejile dibhebhu* dijibha ni lusolo,
Mwene weji sebhulula o muthu wabhondalala, wakambe o kikuma.
24 Mwene wabhana o ixi ku athu ayibha,
Waxiti o mesu a afundixi phala kafundise ni kuyuka.
Se ki mwene, nanyi-phe wa mubhanga o ima yiyi?
25 O izuwa ya mwenyu wami yabhiti ni lusolo kala kibhita o mukwa kulenga,
O kuzediwa nga kulembwa.
26 Ya mubhita ni lusolo mukwa ni ulungu wobhange ni jimbamba,
Mukwa ni holokoko ituluka phala kukwata kima.
27 Se ngamba ngixi: ‘O kuditenda kwami ngi kujimba hanji,
O pholo yami yaluwala, ngi ilungulula ni ngisanguluke,’
28 Eme ngeji kala hanji ni wôma mukonda dya jindolo jami joso,
Ngejiya kwila weji ngimona hanji ni kikuma.
29 Eji ngimona kala ngi muthu wayibha.
Ngeji zokela’hi ngo phala kulondekesa kwila kingala ni kikuma?
30 Né mwene ngadisukwile ni menya azele,*
Anga ngisukula o makwami ni nzabá,
31 Weji ngidimbula mu malowa,
O izwatu yami yeji ngi ibhila,
32 Mukonda mwene ki muthu mu xitu ni ngi mutambwijile,
Mba kufunda-nê.
33 Kibhwala muthu utena kumona kwila eme ngalungu mba Nzambi walungu,
Kibhwala muthu utena kufundisa o mulonga wetu.
34 Se mwene ka ngibetele,
Se ka ngi sasumukisine ni ima yê ikwatesa wôma,
35 Kingeji kala ni wôma wa kuzwela-nê,
Mukonda kingala ni kifwa kya kuzwela ni wôma.