Jobe
42 Kyenyiki Jobe wavutula Jihova, wixi:
2 “Kindala ngejiya kyambote kwila, utena kubhanga o ima yoso.
Yoso i uxinganeka kubhanga, u ibhanga mwene!
3 Kala kiwambe, wixi: ‘Nanyi mwene wa musweka o ima i ngasolo phala ki itetulukile o athu mu kuzwela sé kuxinganeka?’
Kidi mwene, ngazwela sé kuxinganeka,
Ngazwela ima ya madiwanu ya ngitundu, ima i ngakambe kwijiya.
4 Eye wambe: ‘Eme nganda zwela, ngakudyondo, ngivwe.
Nganda kwibhwidisa ni u ngitambwijile.’
5 Ngexile mu kwivwa ngo yalungu n’eye,
Maji kindala nga mu kumona mwene ni mesu mami.
6 Ngadyela mukonda dya ima yoso i ngazwela,
Kyene ki ngaxikamena mu fufutila ni mu uthôkwa.”
7 Kyoso Jihova kyazubha kuzwela ni Jobe, Jihova wambela Elifaji o mukwa Temane, wixi:
“Eye ni makamba mé nga mikwatela njinda, mukonda kimwazwela o kidi kyalungu n’eme kala kyabhange selevende yami Jobe. 8 Kwatenu-phe sambwadi dya tungombe ni sambwadi dya jindumbe jambudi, ndenu kwa selevende yami Jobe, mubhakule sata ya kwoha mukonda dya ikuma yenu. Selevende yami Jobe wanda mitumbula mu musambu. Eme-phe nganda xikina o kudyonda kwê kwalungu ni kukamba ku mikastikala kala kyafwama o ibhangelu yenu, mukonda kimwazwela o kidi kyalungu n’eme kala kyabhange o selevende yami Jobe.”
9 Bhenyobho, Elifaji mukwa Temane, Bidade mukwa Suwá ni Zofale mukwa Nahama, ayi, abhange yoso kala kya atendelesa Jihova. Kyenyiki, Jihova wevu o musambu wa Jobe.
10 Kyoso Jobe kyatumbula o makamba mê mu musambu, Jihova wazubha o hadi ya Jobe yu wa muzediwisa. Jihova wa mubhana mu luyadi o ima yoso yexile-nayu kya m’ukulu. 11 O jindandu jê joso ni makamba mê okulu ayi mu mukunda ya adi kumoxi ku dibhata dyê. A mukwatela henda, a mukondo o malamba mukonda dya wíndwa woso wa mwehela kubhita-nawu Jihova. Kala muthu mudyâ, wa mubhana kitadi ni nela ya ulu.
12 Kyenyiki, Jihova wazediwisa kyavulu Jobe m’ukulu ndenge, mukonda wakexile ni dikwinyi ni kiwana kya midi ya jimbudi, midi jisamanu ja jikamelu, midi ya makaza a jingombe ni midi ya jijumendu ja akaji. 13 Mwene wavwala dingi sambwadi dya an’a mala ni kitatu kya an’a ahatu. 14 O mona wa dyanga wa muhatu wa muluku Jemima, o wa kayadi Keziya, o wa katatu Kele-Hapuke. 15 Mu ixi yoso, o an’a Jobe ene abetele kota mu kuwabha o pholo. Tata yâ wa abhana undundu kumoxi ni jiphange jâ ja mala.
16 Kyabhiti o ima yiyi, Jobe wabhange dingi hama ni makwinyi awana a mivu ku mwenyu. Wamono an’ê ni alawul’ê kate ku mwiji wa kawana. 17 Jobe wabhange mivu yavulu ku mwenyu, wazediwile. Mu kusuka-ku wafu.