Mikeya
7 Kokolo dyami! Mukonda ngedi kala,
O muthu wala ni nzala,
Kasange kisaka kya jiuva phala kudya,
Mba kasange jifiku phala kudya,
Kyoso kibhita o kithangana kya kubhongolola o ibundu.
2 Akwa kubhanga o mbote, mu ngongo ajimuka-mu,
Kibhwala muthu wayuka mwaxaxi ka athu.
Ene abatamena akwa phala ku ajibha.
Kala muthu uta mubhetu phala kukwata phang’yê.
3 Ene ala jihete mukubhanga ima yayibha,
O mutwameni ubhinjika akwa,
O mufundixi ubhinga kitadi phala kulungisa muthu,
O diyala dyafuma, wijidisa o ima yandala mwene,
Ene abakana kubhanga o ima yiyi kumoxi.
4 O muthu wabeta-kota mu kuyuka mudyâ, wasokela ngo ni minya.
O wabeta o kuwabha o muxima, wayibha dingi o minya yavulu ndenge.
O kizuwa kya kufundisa kyotange ku alangidi’ê, kyanda bhixila.
Kyenyiki, enyoso anda tandanganya.
5 Kana kudyelela ku muzukami* wé,
Kana kudyelela kudikamba dyé dya muxima,
Dilange ni ima i uzwela ku muhatu wé.
6 Mukonda o mon’a diyala ubhukumukina tat’ê,
O mon’a muhatu udikwata ni manyâ,
O mbalakaji udikwata ni ukowê,
O jinguma ja muthu, yó atokala ku dibhata dyê mwene.
7 Maji eme-phe, nganda kingila kwa Jihova ni hanji yoso.
Nganda kinga ni mwanyu woso kwa Nzambi ya ubhulukilu wami.
O Nzambi yami wanda ngivwa.
8 Eye u nguma yami, kana kusanguluka mukonda ngamubhita mu ibhidi.
Sumbala ngadibhale, nganda balumuka,
Sumbala ngala mwavundu, maji Jihova mwéne wanda kala o mukengeji wami.
9 Kuma ngate kituxi kwa Jihova,
Nganda xikina o kastiku kê,
Kate mwene kyanda batula o mulonga wami ni kuyuka.
Mwene wanda ngambata mu mukengeji,
Eme nganda mona o kuyuka kwê.
10 O nguma yami wanda mona o ima yiyi,
O jisonyi janda mukwata, mukonda mwene wambe:
“Kwebhi kwala Jihova Nzambi yé?”
O mesu ami anda mumona.
Kyenyiki, mwene anda mudyota-dyota kala malowa mu ikoka.
11 Mu kizuwa kyenyokyo, anda tunga o ilumbu yé ya matadi,
Mu kizuwa kyenyokyo, o mbambe ya ixi yenu anda ikudisa dingi.
12 Mu kizuwa kyenyokyo, o athu anda kwiza kokwe,
Anda tunda ku Asídya ni mu jimbanza ja Ijitu,
Tunde ku Ijitu kate ku ngiji ya Ewufalate,
Tunde ku musanza wa kalunga, kate ku musanza wa mukwa wa kalunga, tunde ku mulundu yú kate ku mulundu yuná.
13 O ixi yanda xala ngundu mukonda dya athu atungu-mu,
Mukonda dya ima yabhangele ene.*
14 Ni mbasá yé, inga o mundu wé, o jimbudi jiwatambula kala undundu,
Jatungile ubheka wâ ku muxitu, kwexile mixi ima ibundu yambote.
Jene jisuluke ni kudya ku Basane ni ku Ngiliyade, kala kyexile mubhanga mu ukulu.
15 “Nganda kulondekesa ima ya madiwanu,
Kala mu kizuwa ki watundu ku Ijitu.
16 O ifuxi yanda mona o ima yiyi, jisonyi janda ku akwata sumbala ni kutena kwala-naku.
Anda xita o makanu mâ ni maku,
Ene anda fwa o matwí.
17 Ene anda dya fufuta kala o jinyoka,
Anda tunda mu ididi yâ ya kudiswekela kala o yama idihuha ni mala bhoxi.
Anda kwiza kwa Jihova Nzambi yetu ni wôma wavulu,
Ene anda kukwatela wôma wavulu.”
18 Nzambi yebhi wasokela n’eye,
Uloloka o ituxi, ujimba o itondalu ya mundu* wê?
Mwene kanda ku akwatela njinda kate ku hádya ni hádya,
Kuma mwene wawabhela kyavulu kukwatela henda.*
19 Mwene wanda tukwatela dingi henda, wanda zubha o itondalu yetu.
O ituxi yetu, eye wanda itakula koxi a musanza wa kalunga.
20 Jakobo eye wanda mukala fiyele,
Mbalahamu wanda mukwatela henda.*
Kala ki wakanena ku jikuku jetu tunde ukulu.