Jobe
3 Mu kubhita o ima yiyi, Jobe wamateka kuzwela kyayibha yalungu ni kizuwa* kya muvwala. 2 Jobe wambe:
3 “Tamanu o kizuwa kya ngivwala kya jimukine!
Tamanu wa jimukine we o usuku wambe o athu exi: ‘Avwala-ku mona diyala!’
4 O kizu’okyo ki kituke kitombe,
O Nzambi ku dyulu a kijimbe,
Kikukale mukengeji mu kizu’okyo.
5 Ehela o kitombe kyadikota kubwika o kizu’okyo,
Kukale dituta dya mvula mu kizu’okyo,
Ehela o kitombe kuvungina o mukengeji wê.
6 Kukale kitombe kyadikota mu usuku wenyó,
Kikukale kusanguluka mu kizu’okyo
Mu kukwata o konda ya jimbeji, a kikatule-ku
7 Kyene mwene! O usuku wenyó, wile mukwa ni muhatu wa mbaku,
Kikukale we kusanguluka.
8 Akwa kubhubhidila, abhubhidile o kizu’okyo,
Yó ejiya kufundumuna o ngandu.
9 Jithéthembwa ja usuku wenyó jifuwetele,
O usuku wenyó wile kingile o kukya, maji o kukya kikumoneka,
Kyene mwene! O usuku wenyó ki umone o kukya.
10 Eme ngamutala hadi yavulu,
Mukonda mam’etu wa ngivwala mu kizuwa kyenyokyo.
11 Ki ngifwila’hi mu divumu dya mam’etu?
Ki ngifwila’hi kyoso kya ngivwala?
12 Mukonda dyahi ngasange homba i ngondeleka,
Ni mele a ngamwisa?
13 Se ngafwili’ami mu kithangana kyenyokyo,
Kikweji kala dingi kima ki ngitandanganyesa.
14 Kyene mwene! Hinu ngamunyoha’mi kya kumoxi ni jisobha ja ngongo ni yó abhana jindunge ku jisobha,
O ididi ya ditungila, kindala yakituka ngundu.
15 Mba hinu nga munyoha’mi kya ni ilamba yexile ni ulu,
Ezalesele o jinzo jâ ni phalata.
16 Ki ngikala’hi mukwa ni kiselu?
Ki ngikala’hi mukwa ni tubwetele, nuka twamwene mwanya?
17 O hadi ya athu ayibha ibhwa kyoso kyafwa,
Ene asanga kunyoha mu mbila.
18 O yó a akutu, akala-mu ni kutululuka,
Séku muthu u ajijidika kukalakala.
19 Momo, o ngadyama ni mvwama, asoko ngo,
O mubhika kabhingi dingi kubelesela ngana yê.
20 Mukonda dyahi Nzambi wehela yó atala hadi,
Ni yó abhondalala kukala ni mwenyu?
21 Mukonda dyahi ene amesena kufwa, maji kafu?
O vondadi yâ ya kufwa yabeta kota, o ya muthu wa musota jimbongo josweke ndenge.
22 Ene asanguluka kyavulu,
Kyene mwene! Asanguluka mu kusanga kididi phala ku afundila-mu.
23 Mukonda dyahi o muthu k’ejiya kwebhi kwaditela, Nzambi u mwehela kukala ni mwenyu,
Se mwene wa mukondela mu jimbandu joso?
24 Mukonda muveji dya kudya, nga muditenda,
O masoxi mami a kunguluka mukwa ni menya mu ngiji.
25 Mukonda o kima kyexile mu ngikwatesa o wôma kya ngiza,
O kyexile mu ngibhekela o héle, kya ngibhiti mwene!
26 Ki ngitululuka, o muxima ki u ngikala kididi, héle mu héle bhu ngala-bha,
O ibhidi ya mudibandekesa.”