Jobe
32 Mukiki, o makamba atatu a Jobe kamuvutwila dingi, mukonda Jobe wexile mubanza kwila, mwene kexile ni kikuma.* 2 Maji Elihu mon’a Balakele mukwa Buze, watokala ku mwiji wa Lame, ukala ni njinda yavulu. Mwene ukwatela njinda yavulu kwa Jobe, mukonda dya kufika kwila wabeta kota mu kuyuka, Nzambi ndenge. 3 Mwene wafutuluka we ni makamba atatu a Jobe, mukonda katena ku mutambwijila, maji ambe kwila Nzambi mwéne wala ni kikuma. 4 Elihu wa kingila phala kutambwijila Jobe, mukonda enyoso exile adyakime. 5 Kyoso Elihu kyamono kwila, o mayala atatu kexile ni kima kya kuzwela phala ku mutambwijila, o njinda ya mukwata. 6 Bhenyobho, Elihu mon’a Balakele mukwa Buze, wamateka kuzwela, wixi:
“Eme ngi munzangala,
Enu mu adyakime, mwa kuka kya.
Ngadixibha mukonda dya ku mixila,
Ki ngadikakela ku mitangela o ima i ngejiya.
7 Ngadyambela mudyami, ngixi: ‘O adyakime a kuka kya azwele,
O yó ala ni mivu yavulu, alondekese o unjimu wâ.’
8 Maji o nzumbi ikôla ya Nzambi, o kutena kwa Muteni wa Yoso,
Kwene kubhana o kutululuka ku athu.
9 O kitala kikyene kibhana o unjimu ku muthu,
O athu akuka k’ene ngo atongolola o ima yambote.
10 Kyenyiki, ngi kwambela: ‘Ngivwe,
Eme nganda kutangela we o kixinganeku kyami.’
11 Kyoso ki mwexile muxinganeka ihi i mweji zwela,
Nga kingila kate ki mwazubha o kuzwela
Ngevu mwene o maka oso.
12 Ngedile mwene swí ni ku mitala,
Maji séku muthu watena kubazela kyambote Jobe,
Né ngo ku mutambwijila.
13 Kyenyiki-phe, kimwambe mwixi: ‘Etu tu jinjimu;
Nzambi mwene ngo utena kubazela Jobe, o muthu kana.’
14 Kuma Jobe kexile muzwela n’eme,
Eme kinganda mutambwijila kala ki mwa mutambwijila enu.
15 Mwa kakukaze!* Mwalembwa ni kya kuvutwila;
Kimwala dingi ni kya kuzwela.
16 Nga kingila, maji kimwazwela kima;
Emanenu mwene bhenyobho, kimuzwele dingi kima.
17 Kyenyiki, eme nganda tambwijila we;
Nganda zwela we o ima i ngaxinganeka,
18 Mukonda ngala ni ima yavulu phala kuzwela;
O nzumbi ikôla yene yanda ngibhangesa o kuzwela.
19 Mu mala mwa nginane kala vinyu ya ubhe, yakambe kididi bhutundila o muha,
Mukwa ni jimbinda ja ubhe janda baza.
20 Ngehelyenu kuzwela ni ngitululuke.
Nganda jikula o dikanu dyami ni ngitambwijile.
21 Kinganda kala ni katombo ka muthu;
Mba ngikala ku mbandu ya muthu,
22 Kingejiya kuximana muthu mu mangonya.
Se ngabhangele kiki, o Yó wa ngibhange weji ngibwika.