Jobe
35 Elihu anga uzwela dingi, wixi:
2 “Eye wa muzwela kwila, wayuka dingi Nzambi ndenge.
‘O kwila eye walungu mwene mu kuxinganeka kiki?’
3 Eye wa muzwela: ‘Tamanu ngatele mwene kituxi.
Mbote yahi i ngimona mu kubhanga o ima yayuka?’
4 Eme nganda kutambwijila,
Nganda tambwijila we o makamba mé.
5 Bhetula o mesu, utale ku dyulu,
Tala o matuta adileka kinene.
6 Se uta kituxi, Nzambi wanda mubhanga phulu yahi?
Né se wate ituxi yavulu, o kwila kyanda mubhanga kyayibha?
7 Né mwene se ubhanga ima yambote, ki wa mukwatekesa Nzambi.
Mwene kabhindamena o kikwatekesu kyé.
8 O ima yayibha i ubhanga, i bhekela ngo dilamba ku muthu kala eye,
O ima yambote i ubhanga ikwatekesa ngo muthu mu xitu.
9 O mundu udikola kyoso kya mu atatesa,
Adikola phala ku abhulula bhu maku a yó ala ni kutena.
10 Maji kibhwala ngo muthu wamba, wixi: ‘Tu dyondelenu kwa Nzambi, o Mubhangi wetu wala ni kutena,
Yó u tubhangesa kwimba o mimbu ya kuximana mu usuku.’
11 Mwene utulonga ni tukale dingi ni unjimu, o yama mu ngongo ndenge,
Mwene watubhana dingi unjimu o jinjila ndenge.
12 O athu adikola, maji mwene ketaye,
Mukonda dya kudizangeleka kwa athu ayibha.
13 Nzambi k’evu o kudikola kwa yó atanga makutu,
O Muteni wa Yoso ka asuwu.
14 Kyoso ki udikalanganza kwila ki wa mu mumona, mwene kakwivu mwene!
O dimanda dyé dyala bhu maku mê, mukonda dya kiki, weji kingila mwene ku kufundisa.
15 Mukonda mwene ka kukwatela njinda, ka kukastikala we,
Mwene we kasuwu o ima i uzwela sé kuxinganeka.
16 Jobe wa muzwele ngo,
Mwene wa muzwela kyavulu, maji o ima ya muzwela ka ijiya.”