Jobe
37 “Ki ngibanza mu ima yiyi, phumbulu i ngititidila.”
Kyene! I ngititidila mwene kyavulu.
2 Ivwidilenu kyambote o jibuya ja dízwi dyê,*
Ni kinuminu ki tunda mu kanu dyê.
3 Mwene ubhangesa o jinzaji kubaza ku dyulu,
O jibuya jê ajivwa mu ngongo yoso.
4 O dízwi dya Nzambi, dyedi kala kinuminu kya nzaji,
Udikola ni dízwi dyaswina.
Kyoso kyaya ni kuzwela, o nzaji isuluka ni kusedima.
5 O dízwi dya Nzambi dyedi kala nzaji, dibhangesa o athu kudiwana.
Mwene ubhanga ima ya madiwanu kitutena ku itongolola.
6 Mwene ubhangesa o neve kulawuka mu ngongo,
Ubhangesa o mvula kunoka ni nguzu mu ixi.
7 Nzambi ufidisa o ikalakalu ya athu oso mu ngongo,
Phala athu oso ejiye o ima yabhange Mwene.
8 O yama ya muxitu ibokona mu makungu,
Anga idisweka mwenyomo.
9 O kitembwe kyadikota, kitunda bhu kididi kyé,
O kitembwe kya thunda, kibheka o mbambi.
10 Nzambi mwéne utalalesa o menya,
Anga akituka matadi a jelu.
11 Mwene wizalesa o matuta ni mabebe a menya,
Umwanga o jinzaji jê ku matuta.
12 O matuta aya ni kujinguluka, kala kya endesa mwene,
Abhanga yoso ya atumina mwéne o kubhanga mu ixi.
13 Mwene ukibhanga phala kubheka kastiku mba phala kubheka mbote mu ngongo.
Ukibhanga we mukonda dya henda yê yakalelaku.
14 Jobe, ivwa kyambote.
Imana hanji! Xinganeka mu ima ya madiwanu ya bhange Nzambi.
15 O kwila wejiya kyebhi Nzambi kyalanga o matuta,
Ni kyebhi kyatundisa o kusedima kwa jinzaji ku matuta?
16 Eye wejiya ihi yendesa o matuta?
Yá éne o madiwanu abhange yó wejiya yoso.
17 Eye wejiya se mukonda dyahi o kitembwe kya lwiji kitululukisa o ixi,
Ni mukonda dyahi o izwatu yé itema?
18 Mwene wazale o dyulu yu wadikolesa kala felu.
O kwila eye we utena ku kibhanga?
19 Tutangele kyebhi kitutena ku mutambwijila.
Kitwanda tena ku mutambwijila, mukonda kitwejiyetu kima.
20 O kwila sayi muthu utena kuzwela kuma ngamesena kuzwela ni Nzambi?
O kwila sayi muthu wazwela kima kyabhingi ku kitangela kwa Nzambi?
21 O athu katena kumona o mwanya,
Kyoso kya uxita ku matuta,
Sumbala yu ubhenye mwene ku dyulu.
22 O kubhenya kwa kidifwa kya ulu, kwijila ku mbandu ya thunda,
O unene wa Nzambi ukwatesa wôma.
23 Kitutena kwijiya yoso yalungu ni Muteni wa Yoso,
Ima yoso u ibhanga ni kuyuka,
Mu kufundisa, k’ene mu lungulula o kidi.
24 Kyenyiki, o athu atokala ku mukwatela wôma,
Mukonda Nzambi kaxikina o athu afika kwila, jinjimu.”