Jobe
13 “Yoso i ngamuzwela, nga imono mwene ni mesu ami,
Nga ivu mwene ni mátwi ami, ya ngitetulukila.
2 O ima i mwejiya, eme we nga ijiya.
Enu ki mwa ngitundu kana.
3 Mudyami, kota ngazwela ni Muteni wa Yoso.
Ngamesena kudizokela bhu pholo ya Nzambi.
4 Maji enu mwa mu ngitatela makutu,
Enu enyoso mu asaki a makutu, kimusakyenu muthu.
5 Tamanu mwadixibhilyenu,
Mweji beta kota kukala ni unjimu.
6 Ngamidyondo, ivwenu o izwelu yami,
Ivwenu mwene kyambote kyoso ki ngiya ni kuzwela.
7 O kwila mu kuzokela Nzambi mwanda tanga makutu?
O kwila mwanda tanga makutu phala ku mulungisa?
8 Enu mwala ku mbandu yê,
O kwila mwa musota kubatula o dimanda dya Nzambi yakidi?
9 Se Nzambi utonginina o mixima ni ibhangelu yenu, o kwila mwene wanda sanguluka ni ima yanda mona?
O kwila mweji munganala, kala ki mweji nganala o muthu mu xitu?
10 Se mwabhingi ku ngitatela phala kuzokela Nzambi,
Mwene wanda mibazela.
11 O unene wê kiwanda mikwatesa wôma?
O wôma yú kiwanda miteketesa?
12 O izwelu yenu ya unjimu kiyala ni valolo, yedi kala thuku.*
O ima i mwazwela phala kudizokela kiyala ni valolo, yedi kala ngubu yobhange ni mavu.
13 Dixibhyenu hanji ni ngizwele.
Kyoso kyambe o kubhita n’eme, kwabhu! Kibhite kya mwene!
14 Mukonda dyahi mwenyu wami wala mu kilwezu?
Mukonda dyahi o mwenyu wami wala mu kanjila kajokota?
15 Né mbe u ngijibha, ngeji mudyelela hanji,
Ngeji mulondekesa kwila, kingala ni kikuma.
16 Mu kubhanga kiki, Nzambi weji ngibhulula,
Mukonda o muthu wayibha,* katena kwiza bhu pholo yê.
17 Ivwenu o izwelu yami, ngamidyondo.
Ivwenu kyambote o maka u nganda zwela.
18 Talenu! Eme ngadisokejeka kya phala kufunda,
Ngejiya kwila, anda ngilungisa.
19 Nanyi wanda ngitatela kima kyayibha?
Se ngadixibhile, ngejifwa* mwene!
20 Nzambi yami, phala ki ngi kulenge dingi,
Ngamesena ngo ku kubhinga ima iyadi:
21 Ku hadi yami, kana kubandekesa-ku dingi,
Kusuluke mu ku ngikwatesa wôma.
22 Ngixane ni ngi kutambwijile,
Mba-phe ngehele kuzwela, ni u ngivutwile.
23 Yebhi o ituxi ni ikuma yami?
Ngitangele o kikuma kyami ni bhwebhi bhu ngalweza.
24 Ngana tata, waswekela-hi o pholo yé?
Wa ngikwatela-hi unguma?
25 Eme ngi difwe dyahatu, adyambata kwal’o kitembwe.
Ngedi kala ngi yangu yakukuta. Wa mu ngizukutisila-hi?
26 Eye wa musuluka ni ku ngitatela ima yayibha,
Ni ku ngifundisa mukonda dya ituxi i ngate mu unzangala wami.
27 Inama yami wa ikutila ku kibunji,
O jinjila jami joso ujitonginina,
Wejiya bhwoso bhu ngidyotela,
28 Sumbala ngedi* kala ngi kima kyabolo,
Kala kizwatu kyodye ku swalala.