Jobe
11 Zofale Mukwa Nahama wa muvutwila, wixi:
2 “Eye wazwela ima yavulu, o kwila tu dixibhetu ngo?
O kwila kuzwela kyavulu kulungisa o muthu?
3 Wafika kwila o athu anda dixibha mukonda dya izwelu yé yakambe valolo?
Inga wafika kwila séku muthu u kubazela mukonda dya kusebhulula kwé?
4 Eye wa muzwela, wixi: ‘O izwelu* yami yakidi,
Nzambi wejiya kwila kingala ni kikuma.’
5 Tamanu Nzambi wazwelele,
N’a kwambela.
6 Weji kujimbulwila o ima yosweke, mukonda mwene njimu.
Mukonda o njimu utena kutongolola ima yavulu.
Kyeji kutetulukila kwila, sayi itondalu yé, Nzambi u ijimba.
7 Wafika kwila utena kwijiya o unjimu woso wa Nzambi?
Mba kutungununa yoso yalungu ni Muteni wa Yoso?
8 Wene* wadileka dingi, o dyulu ndenge. Ihi i utena o kubhanga?
Wene wazongo dingi, o mbila* ndenge. Ihi i utena o kwijiya?
9 Mu kulebha kota, ixi yoso ndenge,
Mu kuzanza we kota, o musanza wa kalunga ndenge.
10 Se mwene wamesena kukuta muthu, phala ku mwambata mu inzo ya kufundisa,
Nanyi utena ku mufidisa?
11 Mukonda mwene wejiya akwa mangonya.
Kyamona o phulu, ulembwa kubhanga kima?
12 O kyowa kyanda mu tetulukila ngo,
Kyoso o jumendu ya mukáwu ki yanda vwala muthu.
13 Eye watokala kulungulula o ibanzelu yé,
Samba* kwa Nzambi!
14 Se wa mubhanga kima kyayibha, eha-kyu.
Mu jibalaka jé, kwehele kubhita-mu kima kyayibha.
15 Eye-phe, kiwanda kala ni jisonyi ja kubhetula o mútwe,
Wanda kwimana mwene, kiwanda kala ni wôma.
16 Kyenyiki, o malamba mé kiwanda ku alembalala dingi,
Wanda kwajimba mwene, kala o menya a kunguluka.
17 O izuwa ya mwenyu wé yanda bhenya, o kumbi dya mediya ndenge,
O kuvunda kwa kela mukwa ni mukengeji wa kamene.
18 Eye kiwanda kala ni wôma, mukonda wala ni kidyelelu,
Wanda tala mu jimbandu anga uzeke mwene ni kutululuka.
19 Eye wanda zeka mwene kyambote, kibhwanda kala muthu u kukwatesa wôma,
Athu avulu a keza mu dibhomba kokwé.
20 O mesu a athu ayibha anda fwefwetela,
Ene kanda mona kididi kya kudisweka,
Anda kinga kyango o kufwa.”