Jobe
14 “O muthu a muvwala ku mona muhatu,
Mwenyu wê ki unange, wezala ni malamba.
2 Mukwa ni kithulu kibwingita, maji ki kinange kulela,
Mukwa ni kilembeketa kibhita ni lusolo.
3 Eye wene mu mutonginina,
U mubheka mu inzo ya kufundisa, phala kufunda-nê.
4 O kwila o mukwa ituxi* utena kuvwala muthu wayuka?
Kana!
5 O izuwa ya mwenyu wê yoxinde,
Eye wejiya mwene o dyalwilu dya jimbeji jê,
Wa muxindila mbambe, mwene katena ku isomboka.
6 Katula o mesu mê kwa mwene, a nyohe,
Kate kyanda zubha o kikalakalu kyê kya kizuwa, mukwa ni mukalakadi abakana o ku mufuta.
7 Se muxi a ukoka, tutena kudyelela kwila,
Wanda sabhuka dingi.
O jithangu jê janda suluka ni kukula.
8 Né mwene se o jindanji ni kixinji kyê,
Kikukutila mu mavu,
9 Kabasa kwanoko bhofele, usabhuka dingi,
Ubhana jithangu mukwa ni kixina kya ubhe.
10 Maji o muthu ufwa, katena kubhanga kima!
Kyoso muthu kyatula o mwenyu uya kwebhi?
11 O menya a musanza wa kalunga a kukuta,
O menya a jingiji a kunguluka, anga a kukuta.
12 Kyene we kimoxi ni muthu, kyoso kyafwa kabalumuka dingi.
Kala o dyulu kiditena kujimuka, mwene we katena dingi kubalumuka.
Kyene mwene! Kanda mufundumuna ku kilu.
13 Tamanu wa ngiswekele mu Mbila,*
Tamanu wa ngiswekele kate kibhita o njinda yê,
Tamanu wasolele kizuwa phala ku ngilembalala.
14 O muthu se ufwa wa kà kala dingi ni mwenyu?
Nganda kingila izuwa yoso ya ubhika wami,*
Kate kiza o ubhulukilu wami.
15 Eye wanda ngixana,
Kuma éye wa ngibhange, wanda kala ni ngunzu yami.
16 Maji kindala, wa mutonginina kabasa kima ki ngibhanga,
Wa musota ngo o ikuma yami.
17 O ikuma yami wa ibhake kala kima kyobhake mu dibunda dyokute kyambote,
Kyene mwene, eye wabhake o ikuma yami.
18 Kala o mulundu ubotomoka anga usendumuka,
O ditadi disondoloka bhu kididi kyê,
19 Kala o menya kyaya ni kwoza o matadi,
Anga ambata o mavu,
Kyene kimoxi n’eye, o kidyelelu kya muthu u kijikinisa.
20 Utolola o muthu kate kyafwa,
Kyoso kyaya mu mbila mukutu wê ubola.
21 O an’ê a ajingisa, maji mwene kakijiya dingi,
A atolesa, maji mwene katongolola dingi.
22 Mwene wívwa ngo ndolo se wala hanji ni mwenyu,
Kyene mwene, udila ngo se wala hanji ni mwenyu.