Daniyele

3 Sobha Nabukodonozolo watumu kubhanga kiteka kyexile ni makwinyi asamanu a jikovadu mu kulebha,* ni kovadu jisamanu mu kuzanza,* a kimika mu honga ya Dula mu mbanza ya Babilonya. 2 Sobha Nabukodonozolo watumu-phe kwongeka o jikabhitangu, o jinguvulu, o atwameni, o akwa kubhana jindunge, o akwa kubhaka o kitadi, o afundixi ni akwatekexi a afundixi ni akwatekexi a jinguvulu mu jimbanza, n’eze mu fesa yeji bhanga mukonda dya kiteka kyabhange sobha Nabukodonozolo.

3 Bhenyobho, o ilamba ni jinguvulu, o atwameni, o akwa kubhana o jindunge, o akwa kubhaka o kitadi, o afundixi ni akwatekexi a afundixi ni akwatekexi a jinguvulu mu jimbanza, a dibhongolola phala kubhanga o fesa mukonda dya kiteka kyabhange o sobha Nabukodonozolo, ya emana bhu pholo ya kiteka kyemika sobha Nabukodonozolo. 4 O mukunji wa sobha wabhana o ngolokela ni dízwi dyaswina, wixi: “Enu mu athu a jixi joso ni madimi moso, o sobha watumu ku mitangela kwila, 5 kyoso ki mwanda kwivwa o jibuya ja koloneta, ja mbendu, ja kangoma, ja tungoji, ja kisánji, ja ngayeta ni iselekete yoso ya kuxika-nayu o mimbu, mwatokala kufukama ni kubheza o kiteka kya ulu kyemika sobha Nabukodonozolo. 6 Woso yó ukamba o kufukama ni kubheza o kiteka, anda mutakula mu dijiku dya túbhya twamuzukuta mu kithangana kyenyokyo.” 7 Kyoso kyevu o jibuya ja koloneta, ja mbendu, ja kangoma, ja tungoji, ja kisánji ni iselekete yoso ya kuxika-nayu o mimbu, o athu a ifuxi ni madimi moso, afukama anga abheza o kiteka kya ulu kyemika sobha Nabukodonozolo.

8 Mu kithangana kyenyokyo, amoxi ku akwa Kaladeya ayi muxitala* o Jijudé kwa sobha. 9 Ene ambela sobha Nabukodonozolo, exi: “Ngana yetu u sobha, kola mwenyu! 10 Eye ngana u sobha, wabhana o kitumu kya kwila, muthu woso wívwa o jibuya ja koloneta, ja mbendu, ja kangoma, ja tungoji, ja kisánji ni iselekete yoso ya kuxika-nayu o mimbu, watokala kufukama ni kubheza o kiteka kya ulu. 11 Wabhana we o kitumu kya kwila, woso yó ukamba o kufukama ni kubheza o kiteka, anda mutakula mu dijiku dya túbhya twamuzukuta. 12 Maji sayi Jijudé, ngana yami, jiwasolo phala kutumina o mbanza ya Babilonya, kamuxila o kitumu kya ngana yetu, o sobha. O mayala yá, enyá: Sadalake, Mizake ni Abedeneku. Ene kamubheza o jinzambi ja ngana yetu, aditunu we kubheza o kiteka kya ulu ki wemika eye, u ngana.”

13 Bhenyobho Nabukodonozolo njinda ya mukwata, watumu kwixana Sadalake, Mizake ni Abedeneku, ya a ambata kwa sobha. 14 Nabukodonozolo wa ebhula, wixi: “Sadalake, Mizake ni Abedeneku, kidi kwila, enu ki mwa mubheza o jinzambi jami, mwaditunu we kubheza o kiteka kya ulu ki ngemika? 15 Se kindala kiki, mu kwívwa o jibuya ja koloneta, ja mbendu, ja kangoma, ja tungoji, ja kisánji ni iselekete yoso ya kuxika-nayu mimbu, mu xikina kufukama ni kubheza o kiteka ki ngabhange, kima kyambote. Maji se mudituna ku kibheza, anda mitakula mu dijiku dya túbhya twamuzukuta. Nzambi yebhi yanda mibhulula bhu maku mami?”

16 Sadalake, Mizake ni Abedeneku atambwijila o sobha, exi: “Sobha Nabukodonozolo, kitubhingi ku kutambwijila kindala. 17 Se atutakula mu dijiku dya túbhya twamuzukuta, o Nzambi yetu u twa mu mubheza utena ku tubhulula. Mwene utena ku tubhulula bhu lukwaku lwé eye, u sobha. 18 Maji né mwene se katubhulula, ejiya-kyu eye u sobha kwila, kitwanda bheza o jinzambi jé, kitwanda bheza we o kiteka kya ulu ki wemika eye ngana.”

19 Nabukodonozolo-phe wafutuluka mukonda dya Sadalake, Mizake ni Abedeneku. O ukexilu wê wa ku atala wa lunguluka. Kyenyiki, watumu kutemesa o dijiku mu lusambwadi. 20 Mu kusuluka, watumu mayala a nguzu atokala ku kifuxi kyê kya masoladi kukuta Sadalake, Mizake ni Abedeneku ni ku atakula mu dijiku dya wama túbhya twamuzukuta.

21 Ene anga a akuta. Kyoso kya akutu, azwatele hanji o mavunga mâ, o jixapé ni izwatu yâ yoso, anga a atakula mu dijiku dya wama túbhya twamuzukuta. 22 Kuma o sobha wexile ni njinda yavulu kyoso kyabhana o kitumu, o dijiku dyatemene kyavulu. O mayala ambatele Sadalake, Mizake ni Abedeneku, éne afu mukonda dya mulengu wa túbhya. 23 Maji-phe, o mayala atatu, Sadalake, Mizake ni Abedeneku, abu mu dijiku dya túbhya ni mikolo ya akutile-nayu.

24 Sobha Nabukodonozolo ni wôma, wabalumuka ni lusolo yu webhula yó ene mubhana o jindunge, wixi: “Etu kitukutu ngo mayala atatu, étu twa atakula mu túbhya?” Ene atambwijila o sobha, exi: “Kyene mwene sobha yetu.” 25 O sobha wixi: “Talenu! Nga mumona mayala awana, a mukwenda mwene mukaxi ka túbhya. Ene kamujokota. O diyala dya kawana, wedi kala mon’a jinzambi.”

26 Nabukodonozolo wazukama bhu mwelu wa dijiku dya wama túbhya twamuzukuta, yu wambe: “Sadalake, Mizake ni Abedeneku, mu jiselevende ja Nzambi Sukeku, tundenu, zenu bhu kanga!” Sadalake, Mizake ni Abedeneku anga atunda mu dijiku dya túbhya. 27 O ilamba, o jinguvulu, o atwameni, o akwa kubhana o jindunge kwa sobha, abhongolokele bhu kididi kyenyokyo, amono kwila, o mayala atatu yó kajokotele, né lundemba lumoxi kilwawuka. O izwatu yá kiyajokota, ene we kexile munuha dixi.

28 Bhenyobho, Nabukodonozolo wambe, wixi: “Ximanenu o Nzambi ya Sadalake, Mizake ni Abedeneku, watumikisa o anju phala kubhulula o jiselevende jê. O jiselevende jê jamudyelela, kaxikina o kitumu kyami. Axikina kufwa, kaxikina kusidivila ni kubheza nzambi yengi, kikale ngo o Nzambi yâ. 29 Kyenyiki, nga mubhana o kitumu kya kwila, ku mundu woso, ku ifuxi yoso ni ku madimi moso, se kukala muthu uzwela kima kyayibha kyalungu ni Nzambi ya Sadalake, Mizake ni Abedeneku, anda musasujula, o inzo yê anda ikitula dixita, mukonda kikwala nzambi yengi itena kubhulula kala ki bhulula o Nzambi yiyi.”

30 Mu kubhita o ima yiyi, sobha wabhana dingi kwa Sadalake, Mizake ni Abedeneku o kikalakalu kyexile-nakyu kya kutumina o mbanza ya Babilonya.