JOZUWÉ

1 Kyoso Mozé, o selevende ya Jihova kyafu, Jihova wambela Jozuwé* mon’â Nune, mukwatekexi wa Mozé, wixi: 2 “Selevende yami Mozé wafu. Kindala disokejeke uzauke o ngiji ya Njolodá kumoxi ni mundu, ndé mu ixi i nganda bhana ku mundu wa Izalayele. 3 Kabasa kididi bhu mutula o inama yenu, nganda mibhana-yu kala ki ngakanena kwa Mozé. 4 O mbambe yenu, yanda mateka mu kikangalakata kya Libanu kate ku ngiji yadikota, o ngiji ya Ewufalate ni ixi yoso ya akwa Hiti, kate mu Musanza* Wadikota ku mbandu ku fwila o dikumbi. 5 Ku mwenyu wé woso, séku muthu wanda tena ku kutolola. Eme nganda kukwatekesa kala ki ngakwatekesa Mozé. Kinganda kukwehelela, kinganda kubhana dikunda. 6 Swina, kala u kindanda. Kuma eye wanda bhangesa kwila o mundu yú utambule o ixi inga akanena ku abhana, kala ki ngakanena ku jikuku jenu.

7 “Kala u kindanda, uswine. Belesela kyambote o kitumu kyakubhana selevende yami Mozé. Kana kukixibhaka mu kuditela ku kadilu mba ku kyasu, phala wende ni unjimu kabasa kididi ki uditela. 8 O divulu didi dya kitumu, kwehe kuditangela ku akwenu. Watokala kuditanga ni kudixinganeka suku ni mwanya, phala u kumbidile kyambote yoso yasoneka mwenyomo. Kyenyiki, yoso i ubhanga ku mwenyu wé yanda ditunda kyambote, wanda bhanga o ima ni unjimu. 9 Ki ngikutangela kwila swina, kala u kindanda? Kana kuteketa mba kukala ni wôma. Kuma Jihova Nzambi yé wanda kukwatekesa kabasa kididi ki uditela.”

10 Kyenyiki, Jozuwé wambela o atwameni a mundu, wixi: 11 “Ndenu mutangele o mundu woso mwixi: ‘Bhongololenu kudya kwasoko, mukonda kwakambe ngo izuwa itatu twanda zauka o ngiji ya Njolodá, phala kutambula o ixi yanda mibhana Jihova, Nzambi yenu, kala ixi yenu.’”

12 Kyenyiki, Jozuwé wambela o kibuka kya Lubene, o kibuka kya Ngade ni mbandu ya mwiji wa Manasa, wixi: 13 “Lembalalenu ya mitangela Mozé o selevende ya Jihova, kyoso kya myambela, wixi: ‘Jihova Nzambi yenu wanda mibhana dinyohenu. Mwene wa mibhana o ixi yiyi. 14 O ibhaku yenu ni ahatu enu ni twana twenu, anda tunga mu ixi ya mibhana Mozé ku mbandu* yiyi ya Njolodá. Maji enu enyoso mu mazonda, mwatokala kuzauka ku sambwa ni kudisokejeka phala mutwamenene o jiphange jenu mu ita. Mwatokala ku akwatekesa, 15 kate Jihova kyabhana o dinyohenu ku jiphange jenu kala kya mibhana enu ni kutambula o ixi ya abhana Jihova Nzambi yenu. Kyene kiwa kimwanda vutuka mu ixi ya mibhana Mozé o selevende ya Jihova, ku mbandu ku fwila o dikumbi ya ngiji ya Njolodá.’”

16 Ene atambwijila Jozuwé, exi: “Twanda bhanga yoso i watutumu. Kabasa kididi ki ututumikisa, twandaya mwene. 17 Kala ki twabelesela yoso ya tutumu Mozé, twanda belesela we yoso i ututuma. Jihova Nzambi yé a kukwatekese kala kya kwatekesele Mozé. 18 Diyala dyoso-dyoso dibhukumukina o itumu yé, mba kabelesela yoso i u mutuma, atokala ku mujibha. Swina, kala u kindanda.”

2 Kyoso kyakexile ku Xitimi, Jozuwé mon’â Nune watumikisa alondi ayadi. Mwene wa atangela, wixi: “Ndenu mulonde o ixi, benge-benge, Jedikó.” Kyenyiki, ene ayi, ya abhixila ku dibhata dya muhatu wakexile kidyanzunga, a mwixanene Lahaba, anga akala kwenyoko. 2 O sobha ya Jedikó a mutangela exi: “Sayi mayala akwa Izalayele eza kuku mu usuku, phala kulonda o ixi.” 3 Mukyenyiki, o sobha ya Jedikó watumina kwambela Lahaba, wixi: “Tubhula bhu kanga o mayala eza m’onzo yé, mukonda ene eza mulonda o ixi yetu.”

4 Maji o muhatu wambata o mayala ayadi, yu wa asweka. Kyenyiki, mwene wambela o jiselevende ja sobha, wixi: “Kidi mwene, o mayala ejile muzwela n’eme, maji kingijidile se ene atundu kwebhi. 5 O mayala atundu ande dya kujika o dibhitu dya mbanza, kyoso kikwakexile muvunda kya. Kingejiya se ene aditela kwebhi. Se mwakayela ni lusolo lwoso, mwanda ku akwata.” 6 (Mwene wa ambata kuditala dya inzo, yu wa asweka mu ita ya linyu yakexile kwenyoko. 7 Kyenyiki, o mayala ayi mwa akayela mu ididi muzaukila o athu mu ngiji ya Njolodá. O dibhitu dya mbanza anga adijika kyoso kyatundu o mayala ayi mwakayela.

8 Ande dya alondi kuya muzeka, Lahaba wayi kuditala dya inzo muzwela nawu. 9 Lahaba wambela o alondi, wixi: “Ngejiya kwila Jihova wanda mibhana o ixi yiyi. Etu enyoso twala ni wôma wenu. O athu oso a ixi yiyi, a muteketa ni wôma wavulu mukonda dyenu. 10 Kuma twevu kyebhi Jihova kya kukutisa o menya a Kalunga Kakusuka ku pholo yenu, kyoso ki mwatundu ku Ijitu, ni ihi i mwabhange ku jisobha jiyadi ja akwa Mamodi, Sihone ni Hoge, mwa abwika ku sambwa* ya Njolodá. 11 Kyoso kitwevu o ima yiyi, wôma* watukwata, o nguzu yatubhu mukonda dyenu, kuma Jihova Nzambi yenu, mwéne ngo o Nzambi ku dyulu ni mu ixi. 12 Kyenyiki, nga midyondo, ngikanenyenu mu dijina dya Jihova kwila, kala ki nga mibhange o mbote,* enu we mwanda bhangela mbote* kwa yó atokala ku dibhata dya tat’etu. Ngibhanyenu kijimbwete kilondekesa kwila enu mwanda kumbidila o izwelu yenu. 13 Kanenu kujibha tat’etu ni mam’etu, ni jiphange jami ja mala ni ja ahatu, ni athu oso a atokala. Mu tubhulula ku kalunga.”*

14 Mukyenyiki, o mayala a mwambela: “Twanda bhana o myenyu yetu phala ku mibhulula!* Se ki uzwela kima kyalungu ni kima kitweza mubhanga, kyoso Jihova kyanda tubhana o ixi yiyi, twanda mibhanga mbote* ni ku milondekesa ufiyele.” 15 Mukusuluka, mwene wa abhangesa kutuluka ni mukolo wakusuka bhu njanena, mukonda o inzo yê yakexile ku mbandu ya ilumbu ya mbanza. Mukidi, o inzo yê yakexile ku thandu a ilumbu. 16 Mukyenyiki, mwene wa ambela, wixi: “Ndenu mudisweke ku milundu, mukala kwenyoko mu izuwa itatu, phala o yó a mu misota, kamisange. Kyoso ene kyanda vutuka, enu mutena kusuluka ni njila yenu.”

17 O mayala a mwambela: “Kitwanda kala ni kikuma mu kima kiki ki wa tubhingi, 18 se kyoso kitwanda vutuka mu ixi yiyi, ukamba kukuta o mukolo wakusuka mu njanena mu wa tubhangesa kutulukila. Watokala kukala mu inzo yé ni tat’é ni mam’enu, ni jiphange jê ni athu oso atokala ku dibhata dya tat’enu. 19 Kyenyiki, se bhukala muthu utunda bhu kanga dya inzo yê, mwéne wanda kala ni kikuma kya manyinga, etu kitwanda kala ni kikuma. Maji se kubhita kima kyayibha ku muthu wala mu inzo yê, etu twanda kala ni kikuma kya manyinga. 20 Maji se ukitangela muthu yalungu ni kima kitweza mubhanga, etu kitwanda kala ni kikuma mu kikutu ki wabhange n’etu.” 21 Mwene wa atambwijila, wixi: “Kibhite kala ki mwazwela.”

Mukyenyiki, mwene wa atumina kuya, ene anga abhanga o njila yâ. Ku pholo dya kwenda, mwene wakutu o mukolo wakusuka mu njanena. 22 Ene alengela ku milundu ya adisweka kwenyoko mu izuwa itatu, kate o mayala akexile mwasota kyavutuka. O mayala a asota mu ikoka yoso, maji ka asange. 23 O mayala ayadi atundu ku milundu, ya azauka o ngiji. Ene ayi kwa Jozuwé mon’â Nune, ya a mutangela yoso yabhiti ni ene. 24 Kyenyiki, atangela Jozuwé, exi: “Jihova wa tubhana o ixi yoso yiyi. Mukidi o athu oso atungu mu ixi yiyi, a muteketa ni wôma mukonda dyetu.”

3 Jozuwé ni Izalayele yoso* abalumuka mu kamene kaselu, atundu ku Xitimi ya ayi kate ku ngiji ya Njolodá. Ene anga abhita o usuku kwenyoko ande dya kuzauka o ngiji.

2 Mukubhita izuwa itatu, o atwameni anyungu ku jibalaka joso. 3 Ene atendelesa o mundu mukwamba: “Kyoso kimwanda mona o akunji atokala ku mwiji wa Levi kwambata o Álaka ya Kikutu ya Jihova, Nzambi yenu, mwatokala kutunda bhwoso bhu mwala phala kwakayela. 4 Maji kanenu kuzukama kyavulu ku Álaka, mu disandula midi jiyadi ja jikovadu.* Kyenyiki, mwanda kwijiya o njila i mwatokala kuditela, mukonda enu nuka mwabhitile mu njila yiyi.”

5 Kyenyiki, Jozuwé wambela o mundu, wixi: “Dizelesyenu, mukonda mungu Jihova wanda mibhangela madiwanu.”

6 Mukusuluka, Jozuwé wambela o akunji, wixi: “Kwatenu o Álaka ya Kikutu, mu twamenene o mundu.” Kyenyiki, ene akwata o Álaka ya Kikutu, ya atwamenena o mundu.

7 Jihova wambela Jozuwé, wixi: “Tunde mu kizuwa kyalelu, eme nganda kuzangeleka ku pholo ya mundu wa Izalayele, phala ene ejiye kwila nganda kala n’eye kala ki ngexile ni Mozé. 8 Watokala kubhana o kitumu kiki ku akunji ambata o Álaka ya Kikutu: ‘Kyoso kyanda bhixila mu ngiji ya Njolodá, atokala kwimana mu menya a ngiji.’”

9 Jozuwé wambela o akwa Izalayele wixi: “Zenu! Ivwenu o izwelu ya Jihova Nzambi yenu.” 10 Kyenyiki Jozuwé wambe, wixi: “Bhukaxi ka ima yiyi mwanda kwijiya kwila, sayi-ku Nzambi ya mwenyu mwaxaxi kenu, ni kwila mwene wanda kaya o akwa Kanana ni akwa Hiti ni akwa Mahivi, akwa Mapelezi, akwa Jidingaze, akwa Mamodi ni akwa Jebuze. 11 Talesenu! O Álaka ya Kikutu ya Ngana wavu o ngongo yoso, ya mu mi twamenena mu ngiji ya Njolodá. 12 Kindala solenu dikwinyi ni kiyadi kya mala, ku miji yoso ya Izalayele, kala mwiji solenu-ku diyala dimoxi. 13 Kyoso o Akunji a mu kwambata o Álaka ya Jihova o Ngana ya ngongo yoso, kyanda dyota mu menya a ngiji ya Njolodá, o menya a Njolodá a mukwijila ku thunda, anda kwimana anga akala kala ilumbu.

14 Kyoso o mundu kyatundu mu jibalaka jâ, o akunji exile mu kwambata o Álaka ya Kikutu, a twamenena ande dya mundu kuzauka o ngiji ya Njolodá. 15 Kyoso o akunji akexile mu kwambata o Álaka kyatula mu ngiji ya Njolodá, ya adyota mu menya a ngiji (Kuma o ngiji ya Njolodá yexile mu kwizala ni kubobesa o sambwa ni sambwa ya ngiji, mu izuwa ya kubhongolola), 16 o menya akexile mu kwijila ku thunda, emana. Emanene dikanga kala ilumbu mu mbanza ya Adá, o mbanza ya zukamene ni mbanza ya Zeletane. O menya akexile mu kunguluka ku lwiji mukuya ku musanza wa kalunga wa Halabá o musanza wa Môngwa, akukuta. O menya adiwanuna, o mundu anga uzauka bhwa zukama ni mbanza ya Jedikó. 17 Kyoso o Akunji exile mukwambata o Álaka ya Kikutu ya Jihova kyemana mu mavu a kukuta, bhukaxi ka ngiji ya Njolodá, o mundu woso wazauka ku mavu akukuta kate kifuxi kyoso kyazubha kuzauka o ngiji ya Njolodá.

4 Kyoso o kifuxi kyazubha kuzauka o ngiji ya Njolodá, Jihova wambela Jozuwé, wixi: 2 “Solenu dikwinyi ni kiyadi kya mayala bhukaxi ka mundu, kala mwiji solenu-ku diyala dimoxi. 3 Watangela kiki: ‘Katulenu dikwinyi ni kiyadi kya matadi mukaxi ka ngiji ya Njolodá bhu kididi bhwemanene o akunji. Mwambata o matadi, anga mwatula bhu kididi bhu mwanda zekela o usuku walelu.’”

4 Kyenyiki, Jozuwé wexana o dikwinyi ni kiyadi kya mayala a asolele bhukaxi ka akwa Izalayele, kala mwiji diyala dimoxi. 5 Jozuwé watangela o mayala wixi: “Bhitenu ku pholo ya Álaka ya Jihova, Nzambi yenu, kate bhukaxi ka ngiji ya Njolodá, kala muthu mudyenu watokala kukatula ditadi ni kudita bhu kisuxi, kala mwiji ditadi dimoxi. 6 O matadi enyá akale kijimbwete bhukaxi kenu. Se ku hádya anenu a mibhula: ‘Mukonda dyahi o matadi yá ala bhabha?’ 7 Enu mwatokala ku atambwijila: ‘Mukonda o menya a Njolodá abatukile ku pholo ya Álaka ya Kikutu kya Jihova. Kyoso ene kyazauka nayu mu ngiji ya Njolodá, o menya a Njolodá abatukile. O matadi yá anda bhangesa akwa Izalayele ku dilembalala jinga.’”

8 Mukyenyiki, akwa Izalayele abhange kala kya atendelesa Jozuwé. Akatula dikwinyi ni kiyadi kya matadi mukaxi ka ngiji ya Njolodá, kala kyatumu Jihova kwa Jozuwé. Kala mwiji wa Izalayele ditadi dimoxi. Ambata o matadi bhu kididi bhweji bhitila o usuku anga a atula kwenyoko.

9 Jozuwé wemanesa we kwinyi ni kiyadi kya matadi mukaxi ka Njolodá, bhu kididi bhwemanene o akunji ambatele o Álaka ya Kikutu. O matadi ala bhenyobho kate mu izuwa yalelu.

10 O akunji exile mukwambata o Álaka emana mwene bhukaxi ka ngiji ya Njolodá, kate kyabhange o ima yoso yatumu Jihova bhukaxi ka Jozuwé, kala kyatangele Mozé kwa Jozuwé. Kyoso kyexile mubhanga o ima yiyi, o mundu wexile muzauka ni lusolo. 11 Kyoso o mundu woso kyazubha o kuzauka, o akunji azauka we ni Álaka ya Jihova. O mundu woso wexile mu atala kyoso ene kyexile muzauka. 12 O akwa Lubene ni akwa Ngade ni mbandu ya mwiji wa Manasa azauka wa, ya a disokejeka phala o ita, n’a kale ku pholo ya kibuka kyamukwa kya Izalayele kala kyatumine Mozé. 13 Makwinyi awana a jimidi ja masoladi a diyudika phala o ita, azauka ku pholo ya Jihova mukuya mu kikangalakata kya Jedikó.

14 Mu kizuwa kyenyokyo, Jihova wazangeleka Jozuwé ku pholo ya Izalayele yoso. Ene akexile mu muxila kyavulu* ku mwenyu wê woso, kala kyakexile muxila Mozé.

15 Jihova wambela Jozuwé, wixi: 16 “Tumina o akunji a mukwambata o Álaka ya Umbangi phala atunde mu Njolodá.” 17 Kyenyiki, Jozuwé wambela o akunji: “Tundenu kya mu ngiji ya Njolodá.” 18 Kyoso o akunji exile mukwambata o Álaka ya Kikutu ya Jihova, kyatundu mukaxi ka ngiji ya Njolodá, ya adyota mu mavu akukuta, o menya a ngiji ya Njolodá avutuka mu kukunguluka, ya ezalesa o jimbandu ja ngiji kala kyakexile kudimatekenu.

19 O mundu watundu mu Njolodá mu kizuwa kya kakwinyi ya mbeji ya dyanga, ya akexile mu Jidingale ku mbandu ya thunda ya Jedikó.

20 O dikwinyi ni kiyadi kya matadi akatwile mu ngiji ya Njolodá, Jozuwé wa emika ku Jidingale. 21 Kyenyiki, mwene wambela akwa Izalayele, wixi: “Ku hádya, se o ana ebhwidisa o jitata, exi: ‘O matadi ya alombolola ihi?’ 22 Enu mwatokala kwatambwijila: ‘O kifuxi kya Izalayele kyazauka o Njolodá mu mavu akukuta. 23 Kyoso Jihova Nzambi yenu kyakukutisa o menya a ngiji ya Njolodá ku pholo yâ, kate o mundu ki wazauka, kala kyabhangele Jihova Nzambi yenu mu musanza wa Kalunga Kakusuka. Kyoso kyakukutisa o musanza wa kalunga ku pholo yetu, kate etwenyoso ki twazauka. 24 Mwene wabhange kiki phala o athu mu ngongo yoso ejiye o kutena kwa Jihova, enu wenu ni mukale jinga ni wôma wa Jihova Nzambi yenu.’”

5 O jisobha joso ja akwa Mamodi exile ku Njolodá ku mbandu ku fwila o dikumbi,* ni jisobha joso ja akwa Kanana atungile ku mbandu a musanza wa kalunga, evwile kwila Jihova wa kukutisile o menya a ngiji ya Njolodá ku pholo ya akwa Izalayele, kate kyazauka. Mu kwijiya o ima yiyi, wôma wa akwata* anga o nguzu yâ ya kubhânga ni akwa Izalayele, ibhwa.

2 Mu kithangana kyenyokyo Jihova wambela Jozuwé, wixi: “Bhanga jiphoko ja matadi anga usaya o mayala akwa Izalayele.” 3 Kyenyiki, Jozuwé wabhange o jiphoko ja matadi yu wasaye o mayala akwa Izalayele, ku Ngibeyate-Halalote.* 4 Kiki kyene kyabhangesa Jozuwé ku asaya: Mukunda o mayala atundile ku Ijitu ni mazonda,* afwile mu kikangalakata mu njila yabhangele mu kutunda ku Ijitu. 5 Enyoso atundile ku Ijitu a asayele kya. Maji oso a avwalele mu kikangalakata kyoso kyexile mubhanga o njila mu kutunda ku Ijitu, ka asayele luwa. 6 O akwa Izalayele anyungile mu kikangalakata mu makwinyi awana a mivu, kate kyafu o kifuxi kyoso. Kifwa, afwile o mazonda atundile ku Ijitu abhukumukine o itumu ya Jihova. Jihova wa alokele kwila, keji kwa ehela kutala o ixi ya kanene Jihova kubhana ku jikuku jâ, o ixi ikunguluka lete ni wiki. 7 O ana akulu, abhingana mu ididi ya jitata jâ a asaye kwala Jozuwé, kuma ka asayele luwa, mukonda mu njila mwejila kakibhangele hanji.

8 Kyoso kyazubha o kusaya o kifuxi kyoso, ene anga akala mu ididi yâ mu balaka kate kyadisanze.

9 Kyenyiki, Jihova wambela Jozuwé, wixi: “Lelu nga mikatula o lusebhu lwa akwa Ijitu.” Mukonda dyakiki, kate mu izuwa yalelu o kididi kyokyo akixana Jidingale.*

10 O akwa Izalayele atunga jinga mu jibalaka ku Jidingale. Mu kizuwa kya dikwinyi ni kiwana kya mbeji, kyoso o dikumbi kidyexile mufwa, abhange o fesa ya Phasu mu kikangalakata kya Jedikó. 11 Mu kizuwa kyakayela kya Phasu, amateka kudya o idima ya ixi, o jimbolo jakambe o felemendu ni jimbutu jokange. 12 Tunde o kizuwa kyadi o idima ya ixi, kikwexile mulawuka dingi maná. Kikwexile dingi maná phala akwa Izalayele. Maji ku muvu wenyo, amateka kudya o idima ya ixi ya Kanana.

13 Kyoso Jozuwé kyexile bhwa zukama ni Jedikó, wabhetula o mesu yu wamono diyala wemana ku pholo yé ni xibhata bhu maku. Jozuwé wa muzukama yu wa mwibhwidisa: “Eye wala ku mbandu yetu inga wala ku mbandu ya jinguma jetu?” 14 Mwene watambwijila, wixi: “Eme ngala bhabha kala ngi kilamba kya kifuxi kya Jihova.” Mukonda dyakiki, Jozuwé wa mufukamena ni pholo bhoxi yu wa mwibhwidisa: “Ngana yami, ihi i wamesena kuzwela ku selevende yé?” 15 O kilamba kya kifuxi kya Jihova wambela Jozuwé, wixi: “Katula o jihayi mu inama, mukonda o kididi kiki ki wadyota, kididi kikôla.” Jozuwé anga ukatula o jihayi ni lusolo lwoso.

6 O akwa Jedikó ajikile kyambote o mabhitu a mbanza, mukonda dya wôma wa akwa Izalayele. Séku muthu wexile mutunda mba kubokona mu mbanza.

2 Kyenyiki, Jihova wambela Jozuwé, wixi: “Talesa, nga kubhakwila o mbanza ya Jedikó, o sobha yê ni mazonda mê moso. 3 Enu enyoso mu mazonda a ita mwatokala kukondoloka o mbanza ni ku inyunga muveji imoxi. Mwatokala kubhanga kiki mu izuwa isamanu. 4 Solenu sambwadi a akunji phala kwambata sambwadi dya jikoloneta jobhange ni jingela ja ndumbe ya jimbudi, atwamenene ku pholo dya Álaka. Maji mu kizuwa kya kasambwadi, enu mwatokala kunyunga o mbanza mu sambwadi dya jiveji. O akunji atokala kuxika o jikoloneta. 5 Kyoso kyanda xika o jikoloneta, mu kwivwa jikoloneta, o mundu woso watokala kudikola ni dizwí dyaswina kala amuya mubhanga ita. Kyenyiki, o ilumbu ya mbanza yanda lundumuka, o mundu watokala kubokona mu mbanza.”

6 Kyenyiki, Jozuwé mon’â Nune, wongeka o akunji yu wa ambela: “Zangulenu o Álaka ya Kikutu, sambwadi dya akunji atokala kwambata sambwadi dya jikoloneta jobhange ni jingela ja jimbudi bhu pholo ya Álaka ya Jihova.” 7 Kyenyiki, mwene wambela o mundu, wixi: “Ndenu mu nyunge o mbanza. O masoladi ala ni mawuta atokala kutwamenena o Álaka ya Jihova.” 8 Kala kyatumu Jozuwé, o akunji exile mukwambata o sambwadi dya jikoloneta ku pholo ya Jihova, atwamenena ku pholo, ya axiki o jikoloneta. O akunji exile mu kwambata o Álaka ya Jihova exile mwakayela kudima. 9 O masoladi exile ni mawuta atwamenene ku pholo ya akunji exile muxika o jikoloneta, o akexile kudima exile mu kayela o Álaka, kyoso o akwa kuxika o jikoloneta kyayi ni kuxika.

10 Jozuwé wambela o mundu, wixi: “Kanenu kudikola. Kimwehele o athu kwivwa o dízwi dyenu. Mu kanu dyenu kimutokala kutunda kizwelu kate mu kizuwa ki nganda mitangela: ‘Dikolyenu!’ Kyene kiwa ki mwanda dikola.” 11 Mwene wabhangesa o Álaka ya Jihova kunyunga o mbanza mu lumoxi, mukusuluka ene avutuka mu jibalaka jâ anga azeka mwenyomo.

12 Mu kizuwa kyakayela, Jozuwé wabalumuka mu kamene kaselu, o akunji anga azangula o Álaka ya Jihova. 13 O sambwadi dya akunji exile mu kwambata o sambwadi dya jikoloneta akexile ku pholo dya Álaka ya Jihova mu kuxika o jikoloneta. O mayala akexile mu kwambata o mawuta, akexile ku pholo ya yó exile mu xika o jikoloneta. O akexile kudima exile mu kayela o Álaka ya Jihova, kyoso o akwa kuxika kyayi ni kuxika o jikoloneta. 14 Mu kizuwa kya kayadi, ene anyungu o mbanza mu lumoxi anga avutuka mu jibalaka jâ. Ene abhange kiki mu izuwa isamanu.

15 Mu kizuwa kya kasambwadi abalumuka mu kamene, anga anyunga o mbanza mu sambwadi dya jiveji. Kizuwa kyenyokyo, kyene ngo o kizuwa kya nyungu o mbanza mu sambwadi dya jiveji. 16 Muveji ya kasambwadi, kyoso o akunji kyaxiki o jikoloneta, Jozuwé wambela o mundu, wixi: “Dikolyenu, mukonda Jihova wa mibhakula o mbanza! 17 Mwatokala kubwika* o mbanza ni yoso yala-mu, mukonda yatokala kwa Jihova. O atokala kukala ngo ku mwenyu, Lahaba, o kidyanzunga, ni oso ala-nê kumoxi kubhata dyê, mukonda mwene waswekele o alondi u twa tumikisa. 18 Enu alukenu, kimukwate ku ima yatokala ku ibwika,* phala kimukale ni hânji ya kumesena kima kyatokala kukibwika ni mu kikatule. Kiki kyeji bhekela kibwika ku Izalayele yoso ni ku mibhekela we divuwa dyadikota.* 19 Maji o phalata yoso ni ulu, ni ima yoso ya ngondo ni felu, ima ikôla yatokala kwa Jihova. Atokala ku yambata mu kididi mwene mubhaka o ima ya valolo ya inzo ya Jihova.”

20 Kyoso kyaxiki o jikoloneta, o mundu wadikola. Kyoso o mundu kyevu o jikoloneta, ene adikola ni dízwi dyaswina kala amuya mu ita, o ilumbu anga ilundumuka bhoxi. Mukusuluka, o mundu wabokona mu mbanza, ya a itolola. 21 Yoso yexile mu mbanza ene a ibwika ni xibhata. Kikale mayala, ahatu, minzangala ni adyakime, jingombe, jimbudi ni jijumendu.

22 Jozuwé wambela o mayala ayadi ayile mulonda o ixi, wixi: “Bokonenu mu inzo ya kidyanzunga, mubheke-nu bhu kanga kikale mwene ni athu oso a mutokala, kala ki mwa mukanena.” 23 Kyenyiki, o alondi abokona, abheka bhukanga Lahaba ni tat’ê, ni mam’ê ni jiphange jê ni oso a mutokalele. Abheka bhu kanga o mwiji woso, anga a ambata bhwakexile o kifuxi kya Izalayele.

24 Kyenyiki, o mbanza a ite túbhya anga ajokotesa o imbamba yoso yexile-mu. Maji o phalata ni ulu ni imbamba ya ngondo ni felu, ayambata mu kididi mwene mubhaka o ima ya valolo mu inzo ya Jihova. 25 Lahaba ngo, o kidyanzunga ni oso atokalele mu inzo ya tat’ê ni oso a mutokalele, ene ngo akambele kwa jibha kwa Jozuwé. Mwene watungu mu ixi ya Izalayele kate mu izuwa ya lelu, mukonda mwene waswekele o alondi atumikisile Jozuwé, phala kulonda o mbanza ya Jedikó.

26 Mu kithangana kyenyokyo, Jozuwé waloko* mu kwamba: “Lamba dya yó utunga dingi o mbanza yiyi ya Jedikó ku pholo ya Jihova. Mukuta o kaboko kwanda fwa o mon’ê wadyanga, mukuta o mabhitu kwanda fwa o kasule kê.”

27 Jihova wexile ni Jozuwé, o fuma yê ya dimwangene mu jixi joso.

7 Maji o akwa Izalayele kalondekesa ufiyele mu imbamba yatokalele ku ibwika,* kuma Akane mon’â Kalumi, mon’â Zabedi, mon’â Nzelá watokala ku mwiji wa Judá, wakatula ima mu imbamba atokalele ku ibwika. Mukonda dya kiki, o njinda ya Jihova yeza ku thandu dya akwa Izalayele.

2 Kyoso kyexile mu Jedikó, Jozuwé watumikisa mayala ku ixi ya Hayi, yazukamene ni Bete-Avene ku mbandu ya thunda ya Betele, yu wa ambela wixi: “Ndenu mulonde o ixi.” Kyenyiki, o mayala ayi, ya alondo o ixi ya Hayi. 3 Kyoso kyavutuka kwa Jozuwé, a mwambela, exi: “Kikubhingi kutuma o mundu woso kuya-ku. Midi jiyadi mba midi jitatu ja mayala asoko phala kubwika o ixi ya Hayi. Kana kubhangesa o kifuxi kutohoka* mu kwatuma enyoso. Mukonda o athu atungu mwenyomo atolo.”

4 Kyenyiki, midi jitatu ja mayala ayi kwenyoko. Maji ene alenge o mayala akwa Hayi. 5 O mayala akwa Hayi, ajibha makwinyi atatu ni samanu a mayala akwa Izalayele. Akaye akwa Izalayele tunde bhu mwelu wa mbanza kate ku Xebadimi.* Ayi ni ku ajibha mu kukulumuka o mulundu. Mukiki o muxima wa mundu wabotomoka yu wakituka kala menya.

6 Mukiki-phe Jozuwé watandula o izwatu yê, wafukama ni pholo bhoxi, ku pholo ya Álaka ya Jihova kate mu ngoloxi, yu waditakula mavu ku mútwe. O adyakime a Izalayele kyene we kyabhange. 7 Jozuwé wambe wixi: “Ayiwe, Ngana Sukeku Jihova, mukonda dyahi wabhange o mundu kuzauka o ngiji ya Njolodá? Wakibhange phala kutubhakula bhu maku a akwa Mamodi n’a tujibhe? Tamanu se twaxalele ku mbandu* yamukwa ya ngiji ya Njolodá! 8 Jihova tata, ihi i nganda zwela? Se o akwa Izalayele alenge o jinguma jâ. 9 Kyoso akwa Kanana ni athu oso atungu mu ixi yiyi kyanda kwivwa o ima yiyi, anda kwiza mubhânga n’etu, ni kujima o mbutu yetu. Ihi-phe i wanda bhanga phala kuzokela o dijina dyé dikôla?”

10 Jihova watambwijila Jozuwé, wixi: “Balumuka! Mukonda dyahi wafukama ni pholo bhoxi? 11 Izalayele wate kituxi. Ene kakumbidila o kikutu ki ngabhange ni ene. Akatula ima yatokalele ku ibwika.* A inyana ya a isweka bhukaxi ka imbamba yâ. 12 Mukonda dyakiki, o akwa Izalayele anda kwabwika ku jinguma jâ. Anda bhana dikunda ni kulenga o jinguma jâ, kuma ene atokala kwabwika. Se mukamba kukatula o ima yatokala ku ibwika* mukaxi kenu, eme kinganda kala dingi mwaxaxi kenu. 13 Balumuka uzelese o mundu. U wambela: ‘Mungu mu dizelesa! Kuma Jihova o Nzambi ya Izalayele wambe kiki: “Enu mu Izalayele, sayi kima mukaxi kenu atokala kukibwika. Enu kimwanda tena kutolola o jinguma jenu kate ki mukatula o kima kyatokala ku kibwika,* kyala mwaxaxi kenu. 14 Mu kamene mwatokala kudilondekesa, kifuxi ni kifuxi, o kifuxi kyanda sola Jihova kyatokala kuzukama, mwiji ni mwiji. O mwiji wanda sola Jihova, watokala kuzukama, nzo ni inzo. O inzo yanda sola Jihova yatokala kuzukama, diyala ni diyala. 15 O yó anda mukwata ni kima kyatokalele kukibwika,* atokala ku muta mu túbhya ni yoso ya mutokala. Mukonda, kakumbidila o kikutu kya Jihova ni kwila o kima kyabhange kyabhekela jisonyi mu Izalayele.”’”

16 Mu kizuwa kyakayela mu kamene, Jozuwé wabalumuka selu, yu wexana akwa Izalayele ku pholo ya Nzambi, kifuxi ni kifuxi. O kifuxi kya Judá ene a asolo. 17 Wexana o mwiji wa Judá, ya a solo-bhu o mwiji wa Nzelá. Mukusuluka, wexana o mwiji wa Nzelá, diyala ni diyala, ya asolobhu Zabedi. 18 Mukusuka-ku, mwene wexana o dibhata dya Zabedi, diyala ni diyala. Akane mon’â Kalumi, mon’â Zabedi, mon’â Nzelá watokala ku mwiji wa Judá, mwéne a musolo. 19 Jozuwé wambela Akane, wixi: “Mon’ami ngakudyondo, jingisa Jihova o Nzambi ya Izalayele difisale kwa mwene. Ngakudyondo ngitangele, ihi i wabhange? Kana kusweka kima.”

20 Akane wambela Jozuwé, wixi: “Mukidi, éme mwene ngate kituxi kwa Jihova o Nzambi ya Izalayele. O kima ki ngabhange kyenyiki: 21 Kyoso ki ngamono bhukaxi ka ima, o divunga dya disoladi dya Xinale dyexile munema hama jiyadi ja jixikulu ja phalata, ni ulu yexile munema makwinyi atanu a jixikulu,* nga jiwabhela, éme nga jikatula anga nga jisweka mu balaka yami. Ngakande dikungu, éme nga ilámbe kumoxi ni kitadi.”

22 Mu kithangana kyenyokyo, Jozuwé watumikisa o akunji. Ene ayi ni lusolo kate mu balaka, kwenyoko kwene kwaswekele o divunga kumoxi ni kitadi. 23 Kyenyiki, akatula o ima yoso mu balaka, a yambata kwa Jozuwé ni ku Izalayele yoso anga a itula ku pholo ya Jihova. 24 Jozuwé ni Izalayele yoso, ambata Akane mon’â Nzelá ni phalata, ni divunga dya disoladi, ni ulu ni twana twê twa mala ni twa ahatu, jingombe, jijumendu ni jimbudi, ni balaka yê ni yoso ya mutokalele, a yambata kate mu honga ya Akole. 25 Jozuwé wa mwambela wixi: “Mukonda dyahi watubhekela o divuwa didi?* Lelu, Jihova wanda bheka o divuwa didi kokwé.” Kyenyiki, Izalayele yoso ya mububa ni matadi. Mukusuluka, mwene ni oso a mutokala a oha mu túbhya. Mukiki-phe, enyoso a abuba ni matadi. 26 Atungu ku thandu dyê mulundu wa matadi, wala kwenyoko kate mu izuwa ya lelu. Kyenyiki, o njinda ya Jihova yasosoloka. Mukonda dyakiki, o kididi kyokyo a kixana Akole* kate mu izuwa yalelu.

8 Jihova wambela Jozuwé, wixi: “Kana kukala ni wôma, kana kuthandanganya. Ndé ni mayala oso a ita mubhânga ni akwa Hayi. Tala, ngabhakula bhu maku mé o sobha ya Hayi ni mundu wê, ni mbanza yâ, ni ixi yâ. 2 Bwikenu o ixi ya Hayi ni sobha yê, kala ki mwabwika o mbanza ya Jedikó ni sobha yê. Muveji yiyi, mutena kukatula o imbamba yâ yoso ni ibhaku. Mu abatamena kudima dya mbanza.”

3 Kyenyiki, Jozuwé ni mayala a ita ayi mubhânga ni akwa Hayi. Jozuwé wasolo makwinyi atatu a midi, yu wa atumikisa mu usuku. 4 Mwene wa atendelesa, wixi: “Mu abatamena kudima dya mbanza. Kanenu kukala dikanga dya mbanza, kalenu polondo. 5 Eme ni mundu woso u ngala nawu, twanda zukama mu mbanza, kyoso ene kyanda kwiza mubhânga n’etu kala kyabhangele, etu twanda kwila kala twa mu alenga. 6 Kyoso kyanda kwiza kudima dyetu, twanda kwa ambata dikanga dya mbanza. Kyenyiki, ene anda zwela: ‘Ene a mutulenga kala kyabhangele muveji yatundu-mu.’ Mukiki-phe etu twila mwene kala twa mu alenga. 7 Kyenyiki, mwatokala kutunda mu ididi mu mwabatamena, ni kutolola o mbanza. Jihova Nzambi yenu wanda mibhakula-yu. 8 Mukiki kyoso ki mwanda tambula o mbanza, mwatokala kuyoha ni túbhya. Mwatokala kubhanga kala kyambe Jihova. Yiyi yene o itendelesu i nga mibhana.”

9 Mukusuluka, Jozuwé wa atumikisa, ene anga ayi bhu kididi kya ku abatamena. Ene akexile bhukaxi ka mbanza ya Betele ni mbanza ya Hayi, ku mbandu ku fwila o dikumbi ya Hayi. Jozuwé wabhiti o usuku kumoxi ni mundu.

10 Kyoso Jozuwé kyabalumuka mu kamene kaselu, yu wongeka o masoladi, mwene ni adyakime a Izalayele ayi kumoxi ni mundu, kate ku mbanza ya Hayi. 11 O mayala oso a ita exile ni Jozuwé, abande ya azukama kate ku pholo ya mbanza ya Hayi. Anga akala ku mbandu ya thunda ya Hayi, o honga yakexile bhukaxi ka ene ni Hayi. 12 Mukyenyiki, mwene wasolo makwinyi atanu a midi a mayala, yu wa atula bhu ididi ya kubatamena, bhukaxi ka Betele ni Hayi, ku mbandu ya mbanza ku fwila o dikumbi. 13 Kyenyiki, o mundu watula o jibalaka jâ, ku mbandu ya thunda ya mbanza. O akexile kudima, axala ku mbandu ya mbanza ku fwila o dikumbi. Mu usuku wenyo, Jozuwé wayi kate mukaxi ka honga.

14 Kyoso o sobha ya Hayi kya kimono, mwene watundu ni mayala a mbanza, ya ayi mu kamene kaselu mubhânga ni akwa Izalayele bhu kididi bhwa zukamene ni mbanza ya Hayi. Maji o sobha kejidile kwila sayi-ku dingi athu a mubatamena kudima dya mbanza. 15 Kyoso o mayala kyayi mubhânga ni ene, Jozuwé ni Izalayele yoso, alengela mu kikoka kiya mu kikangalakata. 16 Kyenyiki, o mundu woso wakexile mu mbanza a exana phala kukaya Jozuwé. Mu kukaya-phe Jozuwé, a abhangesa kukala dikanga dya mbanza. 17 Enyoso ayi mukaya akwa Izalayele, kikwaxalele muthu mu mbanza ya Hayi ni Betele. Kaxisa alangidi mu mbanza, mukonda enyoso ayile mukaya akwa Izalayele.

18 Mukyenyiki, Jihova wambela Jozuwé, wixi: “Sununa o sosa i wakwata bhu maku mé, mu ku ilungila ku mbanza ya Hayi. Kuma nganda kubhakula-yu bhu maku mé.” Mukiki, Jozuwé wasununa o sosa yakexile bhu maku mê, mu ku ilungila ku mbanza ya Hayi. 19 Kyoso kyasununa o lukwaku, o mayala abatamene atundu mu ididi yâ, ayi ni kulenga mu mbanza anga a ibwika. Mu kithangana kyenyokyo, o mbanza a ite túbhya.

20 Kyoso o mayala a Hayi, kyasakuka kudima, ya amono o dixi mu mbanza kubanda bhulu, ene kexile ni nguzu yakulengela kididi kyoso-kyoso. Mukyenyiki o mundu wakexile mulengela mu kikangalakata, anga avutuka phala kubhânga ni jinguma jâ. 21 Kyoso Jozuwé ni Izalayele yoso kyamono kwila o mayala abatamene abwika o mbanza ni kumona o dixi dya mubanda bhulu, a lungulukila o mayala akwa Hayi. 22 O yó abwika o mbanza, atundu phala kudisanga nawu, o mayala akwa Hayi akexile bhukaxi ka akwa Izalayele, kuma o mayala akwa Izalayele akexile ku pholo ni kudima dyâ, ene kakexile ni dilengelu. Akwa Izalayele ajibha enyoso, séku muthu wasubhuka-ku mba walenge. 23 Maji o sobha ya Hayi a mukwata, ya amwambata kwa Jozuwé.

24 Kyoso akwa Izalayele kyazubha o kujibha o athu oso a Hayi, ayile mwa akaya kate mu kikangalakata, avutuka mu mbanza ya Hayi, ya ajibha o athu ni xibhata. 25 O athu afu mu kizuwa kyenyokyo mu mbanza ya Hayi, kikale mayala ni ahatu, atenesa dikwinyi ni kiyadi kya midi. Kifwa o athu oso atungile mu mbanza ya Hayi. 26 Jozuwé wasulukile ni kusununa lukwaku lwê ni sosa bhu maku, kate kyazubha kubwika* o athu oso a mbanza ya Hayi. 27 Kyenyiki, akwa Izalayele akatula o ibhaku ni ima yakexile mu mbanza phala ene, kala kyatendelesele Jihova kwa Jozuwé.

28 Jozuwé anga uta túbhya mu mbanza ya Hayi. Kyenyiki, o mbanza ya Hayi, yaxala kiphulungunzu kyahatu kate mu izuwa yalelu. 29 Jozuwé wanyenga o sobha ya Hayi ku muxi, kate mu ngoloxi. Kyoso o dikumbi kidyakexile muboba kya, Jozuwé watumina kukatula o kimbi ku muxi. Akitakula bhu mwelu wa mbanza, o ku thandu dyê, atungu-ku mulundu wa matadi. O mulundu wenyú, wala kwenyoko kate mu izuwa yalelu.

30 Kyenyiki, Jozuwé utunga kalatódyu phala Jihova o Nzambi ya Izalayele, ku mulundu wa Ebalo. 31 Kala kyatendelesele Mozé, o selevende ya Jihova, ku akwa Izalayele, kala kyakisoneka mu divulu dya Kitumu kya Mozé, kyambe: “Atungu kalatódyu ka matadi atenena, ka abatula ni falamenda ya felu.” Bhu kalatódyu abhakula-bhu jisata ja kwoha phala Jihova ni jisata ja paze.

32 Kyenyiki, mwene wasoneka ku matadi o Kijila kya Mozé kyabhanene ku akwa Izalayele. 33 O Izalayele yoso, o adyakime, o jikabhitangu ni afundixi, emanene bhu mbandu ya Álaka ku pholo ya akunji exile o Jilevita, exile mukwambata o Álaka ya Kikutu kya Jihova. Kwenyoko kwexile we akwa Izalayele ni athu akwa jixi jengi atungile mwaxaxi kâ. Sayi yá akexile ku mulundu wa Ngedizine, amukwa akexile ku mulundu wa Ebalo, (kala kyatendelesele kya Mozé, o selevende ya Jihova), phala o mundu wa Izalayele n’a abesowale. 34 Mukubhita o ima yiyi, mwene watange ni dízwi dyaswina o izwelu ya Kitumu, o mabesá ni mabhebhu, kala kyosoneke mu divulu dya Kitumu. 35 Jozuwé watange o izwelu yoso yatumu Mozé ni dízwi dyaswina ku pholo ya mundu woso wa Izalayele, kikukambe né ngo kizwelu kimoxi. Bhwakexile ahatu, ana ndenge ni athu akwa jixi jengi atungile kumoxi ni ene.

9 Kyoso o njimbu ki yatula ku jisobha joso jakexile ku mbandu ku fwila o dikumbi ya Njolodá, oso exile ku milundu ku Sefelá, ku mbandu yoso ya musanza wa Kalunga ka Dikota* ku pholo ya Libanu, akwa Hiti, akwa Mamodi, akwa Kanana, akwa Mapelezi, akwa Mahivi ni akwa Jebuze, 2 enyoso abhange kikutu phala kuya mubhânga ni Jozuwé ni Izalayele yoso.

3 O akwa Ngibiyone evwile we yabhangele Jozuwé ku Jedikó ni ku Hayi. 4 Mukonda dyakiki, ene afunyu ndunge. Ate makudya mu jisaku jokulu, ya ajite ku thandu a jijumendu kumoxi ni jimbinda jabudika joyudike dingi. 5 Azwata jihayi jakuka kya, ya ate we izwatu yakuka kya. O jimbolo jexile mukwambata jakukutile, jexile musekumuka. 6 Mukusuluka, ayi muzwela ni Jozuwé mu balaka yê ku Jidingale, anga ambela Jozuwé ni mayala oso akwa Izalayele, exi: “Etu twatundu mu ixi ya dikanga, kindala bhangenu kikutu n’etu.” 7 Kyenyiki, o mayala akwa Izalayele ambela akwa Mahivi,* exi: “Nange enu mwatungu bhwazukama ni mbanza yetu. Kyebhi-phe kitutena kubhanga kikutu n’enu?” 8 Ene atambwijila Jozuwé, exi: “Etu tu jiselevende jé.”*

Mukusuluka, Jozuwé wa ebhwidisa: “Enu ananyi? Mwatundu kwebhi?” 9 Ene atambwijila, exi: “O jiselevende jé atundu ku ixi yadikanga mukonda dya dijina dya Jihova Nzambi yé, kuma twevu o fuma ni yoso yabhange mwene ku Ijitu, 10 ni yoso yabhange ku jisobha jiyadi ja akwa Mamodi ku mbandu yamukwa* ya Njolodá, ni kwa Sihone sobha ya Hexebone, ni kwa Hoge, sobha ya Basane watungile ku Axitalote. 11 Mukonda dyakiki, o adyakime ni athu oso atungu mu ixi yetu, atwambela: ‘Ambatenu makudya phala mubhange njila, ni mwende muzwela nawu. Mu ambela, mwixi: “Twanda kala tu jiselevende jenu, kyenyiki bhangenu kikutu n’etu.’” 12 O jimbolo jiji jitweza naju phala kujidya, jatemene hanji mu kizuwa ki twatundu ku mabhata metu phala kwiza muzwela n’enu. Maji kindala, mutena kumona kwila o jimbolo jakukuta, ja mu sekumuka. 13 O jimbinda jiji ja vinyu, kyoso ki twajizalesa jexile ja ubhe, maji kindala jabudika. O izwatu yetu ni jihayi, jakuka mukonda dya njila ya dikanga itwabhange.

14 Kyenyiki, o mayala akwa Izalayele akwata* o makudya mâ, maji kasoto kwijiya o kixinganeku kya Jihova. 15 Jozuwé-phe anga ubhanga paze ni ene, yu wabhange we kikutu phala ene asuluke mukukala ni mwenyu. O adyakime akwa Izalayele axikina we o kikutu kiki mu kwalokela.

16 Mukubhita izuwa itatu kyoso kyabhange kikutu ni ene, eza mukwijiya kwila, ene atungile mu jimbanza ja azukamene. 17 O akwa Izalayele atundu anga abhixila mu jimbanza jâ mu kizuwa kya katatu. O jimbanza jâ jexile, Ngibiyone, Kefila, Behelote ni Kidyate-Jadimi. 18 Maji o akwa Izalayele ka abwika mukonda o atwameni a kifuxi abhangele kikutu mu dijina dya Jihova o Nzambi ya Izalayele. Kyenyiki, o mundu wamateka o kuditenda* mukonda dya adyakime. 19 Mukonda dyakiki, o atwameni oso a kifuxi ambe: “Kuma twabhange kya kikanenu mu dijina dya Jihova o Nzambi ya Izalayele, kitutokala dingi kwabhanga kima. 20 Twanda bhanga kiki: Twanda kwa eha kukala ni mwenyu, phala o njinda ya Nzambi ki ize ku thandu dyetu mukonda dya kikutu ki twabhange ni ene.” 21 O adyakime a kifuxi ambe dingi: “Ene akale ni mwenyu, maji anda kala muxanga o jihwinyi ni kuteka o menya phala o kifuxi.” Kiki kyene kyakanena o adyakime a kifuxi.

22 Jozuwé wa exana yu wa ebhwidisa: “Mukonda dyahi mwa tunganala mu kwamba: ‘Etu twatungu dikanga,’ maji mu kidi enu mwa tungu bhabha bhwa zukama n’etu? 23 Lamba dyenu! Mukonda tunde lelu kate ku hádya, mwanda kala mu abhika akuxanga jihwinyi ni kuteka menya phala o inzo ya Nzambi yami.” 24 Ene ambela Jozuwé, exi: “Twabhange kiki mukonda twevu ni kidi kyoso kwila, Jihova Nzambi yé, watendelesa Mozé o selevende yê kwila, watokalele kujibha o athu oso mu ixi yiyi, ni ku mibhana o ixi yoso yiyi. Mukonda dyakiki, twexile ni wôma wa kufwa bhu makwenu, kyene kyatubhangesa kubhanga o kima kiki. 25 Kindala twala bhu maku mé. Bhanga n’etu yoso yafwama, yoso yayuka.” 26 Kiki kyene kyabhange Jozuwé ku akwa Ngibiyone. Mwene wa abhulula bhu maku a akwa Izalayele, ene ka ajibha dingi. 27 Kyenyiki, mu kizuwa kyenyokyo Jozuwé wa abhange axangi a jihwinyi ni ateki a menya phala o mundu ni kalatódyu ka Jihova, mu kididi mweji sola mwene. Ene asuluka mukubhanga kiki kate mu izuwa yalelu.

10 Kyoso Adonizedeke sobha ya Jeluzaleme kyevu kwila, Jozuwé wa bwika o mbanza ya Hayi yu wajibha o sobha yê, kala kyabhangele ni sobha ya Jedikó, ni kwila o akwa Ngibiyone abhange paze ni ene ya atungile kumoxi, 2 wôma wa mukwata, mukonda o mbanza ya Ngibiyone yexile mbanza yadikota, exile mu itumina ku sobha. Yene yabetele-kota o mbanza ya Hayi ndenge, o mayala oso a mbanza exile masoladi. 3 Mukonda dya kiki, Adonizedeke sobha ya Jeluzaleme, watumikisa njimbu kwa Hohame, sobha ya Hebolone, ni ku sobha ya Philama ni ku sobha ya Jalemute ni ku sobha ya Jafiya ni ku sobha ya Lakiji ni ku sobha ya Ndebile ni ku sobha ya Engolone, mukwamba: 4 “Zenu mu ngikwatekese kubhânga ni akwa Ngibiyone, kuma ene abhange paze ni Jozuwé ni akwa Izalayele.” 5 Mukiki, o kitanu kya jisobha ja akwa Mamodi, o sobha ya Jeluzaleme, o sobha ya Hebolone, o sobha ya Jalemute, o sobha ya Lakiji ni sobha ya Engolone, ayi atula o jibalaka jâ kwenyoko, phala kubhânga ni akwa Ngibiyone.

6 Kyenyiki, o mayala akwa Ngibiyone, atumina kutangela Jozuwé wakexile ku Jidingale, exi: “Kana kubhana dikunda ku abhik’é, zá ni lusolo u tukwatekese. Kuma o jisobha joso ja akwa Mamodi, jatungu ku milundu, adibhongolola phala kubhânga n’etu.” 7 Kyenyiki, Jozuwé watundu ku Jidingale ni masoladi oso ni mazonda a ita.

8 Jihova wambela Jozuwé, wixi: “Kana kwa akwatela wôma, kuma nga abhakula bhu maku mé. Séku muthu mudyâ wandatena kubhânga n’eye.” 9 Jozuwé watundu ku Jidingale, wende o usuku woso, wayi mubhânga ni jinguma jê. Mu kithangana kyenyokyo o jinguma jê kakifikile. 10 Jihova wa abhangesa kukala mu kavwanza ku pholo ya Izalayele. O akwa Izalayele ajibha athu avulu ku Ngibiyone, mu kwakaya mukubanda ku Betolone ni ku ajibha mu njila yoso, tunde ku Azeka ndu ku Makeda. 11 Kyoso o jinguma ki jakexile mulenga akwa Izalayele, ya akexile mu kulumuka ku Betolone, Jihova wabhangesa kunoka mvula ya matadi amakota ku thandu dyâ, kate ku Azeka, ene anga afwa. Mukidi, o athu afu ku matadi avudile dingi, o afu ku xibhata ya akwa Izalayele ndenge.

12 Mu kizuwa kyoso Jihova kyakwatekesa akwa Izalayele kutolola akwa Mamodi, Jozuwé wasambe kwa Jihova, ku pholo ya akwa Izalayele, mukwamba:

13 Kyenyiki, o dikumbi dyemana mwene, o dyeji we dyemana, kate kyoso o kifuxi kya Izalayele kyajibha o jinguma jâ. O maka yá, a asoneka mu divulu dya Jexele. O dikumbi dyemanene bhukaxi ka dyulu mu kizuwa kya muvimba, dyalembwa o kuboba ni lusolo. 14 Nuka kwakexile kizuwa kala kyokyo, né mukulu né mu izuwa ku pholo, kuma Jihova wevu o dizwí dya muthu, mukonda Jihova wakexile mubhângela akwa Izalayele.

15 Mukubhita o ima yiyi, Jozuwé wavutuka ni Izalayele yoso ku Jidingale.

16 Maji o jisobha jitanu, alenge, ya adisweka mu dikungu ku Makeda. 17 Kyenyiki, ambela Jozuwé, exi: “O jisobha jitanu alenge, ya adisweka mu dikungu ku Makeda.” 18 Kyenyiki-phe Jozuwé wa ambela, wixi: “Lundumunenu o matadi onene bhu dibokwenu dya dikungu, anga mutula mayala phala kulangidila o dikungu. 19 Maji yó anda xala kudima, katokala kwimana. Kayenu o jinguma jenu ni ku ajibha. Kanenu kwa ehela kubokona mu jimbanza jâ, kuma Jihova Nzambi yenu wa abhakula bhu maku menu.”

20 Jozuwé ni akwa Izalayele ajibha athu avulu, asubhuka ngo yó atena o kulenga anga adisweka mu jimbanza jakexile ni ilumbu. 21 Mukiki, o mundu woso wavutuka ni mwenyu kwa Jozuwé, ku Makeda. Séku muthu watenene kuzwela kima kyayibha ku akwa Izalayele. 22 Mukusuluka, Jozuwé wa ambela, wixi: “Jikulenu o dibokwenu dya dikungu, bhekenu o kitanu kya jisobha bhu kanga.” 23 Kyenyiki, ene abheka bhu kanga o jisobha jitanu. O sobha ya Jeluzaleme, o sobha ya Hebolone, o sobha ya Jalemute, o sobha ya Lakiji ni sobha ya Engolone. 24 Kyoso kyabheka o jisobha jiji kwa Jozuwé, mwene wexana o mayala oso a Izalayele, yu wambela o jikabhitangu ja ita ayile ni mwene, wixi: “Zukamenu. Tulenu o inama yenu kumakoxi a jisobha jiji.” Kyenyiki, ene azukama, ya atula o inama yâ kumakoxi a jisobha. 25 Mukusuluka, Jozuwé wa ambela dingi, wixi: “Kanenu kukala ni wôma, kanenu kuthandanganya, kalenu mu indanda muswine, kuma kiki kyene kyanda bhanga Jihova ku jinguma jenu joso janda kwiza mubhânga n’enu.”

26 Kyenyiki, Jozuwé wa ajibha yu wa anyenge ku mixi itanu. Ene axala kwenyoko kate mu ngoloxi. 27 Kyoso o dikumbi kidyexile muboba, Jozuwé watumu kukatula o imbi ku mixi, ni ku itakula mu dikungu mwa diswekele o jisobha jenyiji. Mukusuluka, atula matadi bhu dibokwenu dya dikungu. O matadi ala kwenyoko kate mu izuwa yalelu.

28 Mu kizuwa kyenyokyo, Jozuwé watolola o mbanza ya Makeda, yu wajibha o athu ni xibhata. Mwene wajibha o sobha ni oso atungile mwenyomo, kaxisa-ku muthu ni mwenyu. Mwene wabhange kwa sobha ya Makeda kala kyabhangele kwa sobha ya Jedikó.

29 Kyenyiki, Jozuwé watundu ku Makeda ni Izalayele yoso ayi kate ku Libina, yu wabhânge ni akwa Libina. 30 Jihova wabhakula we o mbanza ni sobha yê bhu maku a Izalayele, ene ajibha o athu oso, kaxisa muthu ni mwenyu. Bhenyobho ene abhange we kwa sobha yâ, kala kyabhangele kwa sobha ya Jedikó.

31 Mukusuluka, Jozuwé ni Izalayele yoso, atundu ku Libina, ya ayi ku Lakiji. Mu kubhixila kwenyoko, abhânge ni akwa Lakiji. 32 Jihova wabhakula o mbanza ya Lakiji bhu maku a akwa Izalayele, ene anga a ibwika mu kizuwa kyakayela. Atolola o mbanza ni xibhata, ni athu oso atungile-mu kala kyabhangele ni Libina.

33 Holane sobha ya Ngezele wayi mukwatekesa o sobha ya Lakiji, maji Jozuwé wa mujibha mwéne ni mundu wê woso, kikusubhuka né ngo muthu umoxi ni mwenyu.

34 Kyenyiki, Jozuwé ni akwa Izalayele atundu ku Lakiji, ya ayi kate ku Engolone. Mu kubhixila kwenyoko, abhânge ni akwa Engolone. 35 Atambula o mbanza mu kizuwa kyenyokyo, ya a ibwika ni xibhata. Ajibha athu oso atungile mwenyomo, kala kyabhangele ni akwa Lakiji.

36 Mukusuluka, Jozuwé watundu ni Izalayele ku Engolone, ya ayi kate ku Hebolone. Mukutula kwenyoko, abhânge ni akwa Hebolone. 37 Atambula o mbanza, ya a ibwika ni xibhata. A bwika kikale o sobha, kikale o jisanzala jâ ni athu oso atungile-mu, kaxisa-mu né ngo muthu umoxi ni mwenyu. Kala kyabhangele ni Engolone, ene abwika kikale o mbanza ya Hebolone, kikale o athu atungile-mu.

38 Mu kyenyiki-phe, Jozuwé ni Izalayele ayi kate ku Ndebile ya abhânge ni ene. 39 Mwene wabwika o mbanza ni sobha yê ni jisanzala joso ja atokalele, yu wajibha o athu atungile-mu, kikuxala né ngo muthu umoxi. Mwene wabhange ku akwa Ndebile, kala kyabhangele ku akwa Hebolone ni ku akwa Libina ni sobha yê.

40 Jozuwé watolola o ixi yoso. O jimbanza ja kexile ku milundu, ku Nengebe, ku Sefelá ni mu jihonga ni jisobha jâ joso. Kaxisa-ku muthu ni mwenyu. Mwene wajibha o athu oso kala kyatumine Jihova, o Nzambi ya Izalayele. 41 Jozuwé watolola o jimbanza joso, tunde ku Kadexi-Balaneya, kate ku Ngaza ni ixi ya Ngozene, ndu ku Ngibiyone. 42 Jozuwé watundu ngo lumoxi yu watolola o jisobha joso ni jixi jâ, mukonda Jihova o Nzambi ya Izalayele, mwéne wakexile mubhângela akwa Izalayele. 43 Mukiki-phe, Jozuwé wavutuka ni Izalayele yoso bhu kididi kyâ, ku Jidingale.

11 Kyoso Jabine sobha ya Hazole kyevu o maka yá, watumikisa akunji kwa Jobabe, sobha ya Mandone, ni kwa sobha ya Ximilone, ni kwa sobha ya Akezafa. 2 Watumikisa we akunji ku jisobha jatungile ku mulundu ku mbandu ya thunda, ni ku mbandu ya lwiji ku jihonga* ja Kinelete, ni ku Sefelá, ni ku mbandu ku fwila o dikumbi, ku honga ya Ndole. 3 Ni ku akwa Kanana ku tundila o dikumbi, ni ku akwa Mamodi ku fwila o dikumbi, ni ku akwa Hiti, ni ku akwa Mapelezi, ni ku akwa Jebuze ku mulundu, ni ku akwa Mahivi ku mulundu wa Helemone, mu ixi ya Mixipa. 4 Kyenyiki, o jisobha joso jiji atundu ni ifuxi yâ, exile mundu wavulu kala o museke ku mbandu a kalunga. Ene atundu ni jikabalu javulu ni makalu a ita. 5 O jisobha joso jiji, a dibakana ya a dibhongolola anga ayi mubhânga ni akwa Izalayele, mukuta o jibalaka jâ bhwa zukama ni menya a Melone.

6 Kyenyiki, Jihova wambela Jozuwé, wixi: “Kana kukala ni wôma mukonda dya ene, kumamungu mu ola yenyiyi, nganda kwabhakula bhu maku a Izalayele. Batula o mixibha ya jikabalu jâ, oha o makalu mâ mu túbhya. 7 Jozuwé ni mayala a ita, ayi mubhânga nawu bhwa zukama ni menya a Melone sé ene kukijiya. 8 Jihova anga wa abhakula bhu maku a Izalayele. Ene a atolola, ya ayi ni kwakaya tunde ku Sidónya Yadikota ni ku Mijilefote-Mayine ndu ku honga ya Mixipa ku mbandu kutundila o dikumbi, ya a ajibha. Kaxisa-ku muthu ni mwenyu. 9 Jozuwé anga ubhanga kala kya mutumu Jihova, wabatula o mixibha ya jikabalu jâ, yu woha o makalu mu túbhya.

10 Kyazubha kubhita o ima yiyi, Jozuwé wavutuka yu watolola Hazole. Mwene wajibha o sobha ya Hazole ni xibhata, kuma mukulu Hazole yene yexile o mbanza yabetele kota mu mautuminu oso yá. 11 Ene ajibha ni xibhata oso atungile mwenyomo, mu kubwika* o mbanza yoso. Ki kwasubhukile muthu ni mwenyu. Mwene wate túbhya mu mbanza. 12 Jozuwé watolola o jimbanza joso jiji ni jisobha jâ. Watolola o jisobha jiji mu kwajibha ni xibhata. Mwene wa abwika* kala kyatumine Mozé, o selevende ya Jihova. 13 Maji o akwa Izalayele kate túbhya mu jimbanza joso jakexile ku milundu. Jozuwé wate ngo mu túbhya o mbanza ya Hazole. 14 O akwa Izalayele akatula o imbamba yoso ni yama yoso ya jimbanza jiji, maji ajibha o athu oso ni xibhata. Kaxisa-mu muthu ni mwenyu. 15 Kala kyatumine Jihova kwa selevende yê Mozé, kyene we Mozé kyatendelesa Jozuwé. Jozuwé anga ubhanga kyenyiki, mwene wa kumbidila yoso ya mutumine Jihova bhukaxi ka Mozé. Kikukambe kima.

16 Jozuwé watolola o ixi yoso yiyi, o milundu, o mbandu ya Nengebe, o ixi yoso ya Ngozene, Sefelá, Halabá, o mulundu wa Izalayele kumoxi ni Sefelá.* 17 Tunde ku mulundu wa Hakila wala bhu mbandu ya Seyile, kate ku Bahale-Ngadi mu honga ya Libanu ndu ku mulundu wa Helemone, mwene wakwata o jisobha joso yu wa ajibha. 18 Jozuwé wabhânge ni jisobha jiji mu thembu yavulu. 19 Séku mbanza yengi yabhangele kikutu kya paze ni akwa Izalayele, kikale ngo akwa Mahivi atungile mu mbanza ya Ngibiyone. Ene atambula o jimbanza joso bhukaxi ka ita. 20 Jihova mwéne wabhangesa kwila o mixima yâ ikole, phala kubhânga ni akwa Izalayele ni kwabwikisa sé kwa kwatela henda. Ene atokalele kwabwika,* kala kyatumine Jihova kwa Mozé.

21 Mu kithangana kyenyokyo, Jozuwé wabwika* o akwa Anake oso, ku milundu ya Hebolone, ku Ndebile ni ku Anabe ni mu milundu yoso ya Judá, ni mu milundu ya Izalayele. Jozuwé wabwika kikale ene ni jimbanza jâ. 22 Mu ixi ya Izalayele kimwasubhukile akwa Anake, a subhukile ngo amoxi ku ixi ya Ngaza, ku Ngate ni ku Ajidode. 23 Kyenyiki, Jozuwé watambula o ixi yoso kala kyakanene Jihova bhukaxi ka Mozé. Mukiki Jozuwé wabhana o ixi ku akwa Izalayele kala undundu phala ku iwana ku miji, kala mwiji kala kya mufwama. Mu kithangana kyenyokyo kukala kutululuka. Kikwexile dingi ita mu ixi.

12 Jiji jene o jisobha jatolola akwa Izalayele, a atambula o jixi jâ ku mbandu ku tundila o dikumbi ya Njolodá, tunde mu honga ya Anone kate ku mulundu wa Helemone, ni mbandu yoso ku tundila o dikumbi ku Halabá. 2 Sihone o sobha ya akwa Mamodi watungile ku Hexebone, wexile mutumina kate ku mbanza ya Alowele yexile ku mbandu ya honga ya Anone, tunde bhukaxi ka honga ni mbandu ya ixi ya Ngiliyade, kate mu honga ya Jaboke bhwasukile o mbambe ya akwa Amone. 3 Mwene we wexile mutumina ku Halabá kate ku mbandu ku tundila o dikumbi wa musanza wa kalunga wa Kinelete,* ndu ku mbandu ku fwila o dikumbi wa musanza wa kalunga wa Halabá, o Musanza wa Môngwa, mu kuditela ku Bete-Jeximote ku mbandu ya lwiji ni ku mbandu ya mulundu wa Pixika.

4 Watambula we o mbanza ya Basane exile mu itumina kwa sobha Hoge, wasubhukile ku mbutu ya akwa Lafayime watungile ku Axitalote ni ku Edileyi. 5 Wexile we mutumina ku mulundu wa Helemone, ku Sálaka ni Basane yoso, kate bhwasuku o mbambe ya akwa Jesule ni akwa Makata, ni mbandu ya Ngiliyade kate mu mbambe ya Sihone, o sobha ya Hexebone.

6 Mozé o selevende ya Jihova ni akwa Izalayele, atolola o jinguma jâ. Mukusuluka, Mozé o selevende ya Jihova wabhana o ixi yâ kala undundu ku akwa Lubene, ku akwa Ngade ni ku mbandu ya mwiji wa Manasa.

7 Jiji jene o jisobha jatolola Jozuwé ni akwa Izalayele ku mbandu ku fwila o dikumbi ya Njolodá, tunde ku Bahale-Ngadi, ni mu honga ya Libanu kate ku mulundu wa Hakila wayile kate ku Seyile. Yiyi yene o ixi yabhana Jozuwé ku miji ya akwa Izalayele kala undundu mu kwa wanena mudyâ, 8 ni mu jimbanza jexile ku milundu ku Sefelá, ku Halabá, mu jimbandu ja milundu ni mu kikangalakata kya Nengebe, o ixi ya akwa Hiti, o ixi ya akwa Mamodi, o ixi ya akwa Kanana, o ixi ya akwa Mapelezi, o ixi ya akwa Mahivi ni ixi ya akwa Jebuze.

13 Jozuwé wa kukile kya kyavulu. Kyenyiki, Jihova wa mwambela, wixi: “Eye wakuka kya kyavulu. Maji kwa mukamba hanji kutambula mbandu yadikota ya ixi. 2 O ixi yakambe-ku yeniyi: O ixi yoso ya akwa Fidíxa ni ixi yoso ya akwa Jesule. 3 (Tunde ku mbambe ya Nilu* yala ku mbandu kutundila o dikumbi dya Ijitu, kate ku mbambe ya Ekolone ku thunda, yexile o mbambe ya akwa Kanana), yalungu we ni jixi jatokalele ku jinguvulu jitanu ja akwa Fidíxa, kifwa, o ixi ya Ngaza, Ajidode, Axikilone, Ngate, Ekolone ni ixi ya Havime. 4 Ku mbandu ya lwiji, o ixi yoso ya akwa Kanana, Meyala yatokala ku akwa Sidónya, kate ku Afeke ndu mu mbambe ya akwa Mamodi, 5 o ixi ya akwa Jebale ni mbandu yoso kutundila o dikumbi ku Libanu, tunde ku Bahale-Ngadi kate ku mbandu ya mulundu wa Helemone ndu ku mbandu ya Hebo-Hamati,* 6 ni athu oso atungu ku mbandu ya mulundu tunde ku Libanu kate ku Mijilefote-Mayine ni akwa Sidónya. Eme nganda kwa akaya ku pholo ya Izalayele. Eye watokala ngo kuwanena o ixi phala akwa Izalayele kala undundu, kala ki nga kutumina. 7 Kyenyiki, wanena o ixi kala undundu phala o divwa dya miji ni mbandu ya mwiji wa akwa Manasa.”

8 O mbandu yamukwa ya mwiji wa Manasa, akwa Lubene ni akwa Ngade, atambula o undundu wa abhanene Mozé ku mbandu ku tundila o dikumbi ya Njolodá, kala kyaxindile Mozé, o selevende ya Jihova. 9 O mbambe yâ, ya matekene tunde ku Alowele yala ku mbandu ya honga ya Anone, ni mbanza yala bhukaxi ka honga, ni milundu yoso ya Mendeba kate ku Dibone. 10 Ni jimbanza joso ja akwa Sihone, o sobha ya akwa Mamodi, watumina ku Hexebone kate ku mbambe ya akwa Amone. 11 Ni mbambe we ya akwa Ngiliyade, ni ya akwa Jesule ni ya akwa Makata ni mbandu yoso ya mulundu wa Helemone ni Basane yoso, kate ku Sálaka, 12 kifwa o utuminu woso wa Hoge ku Basane. Watumina ku Axitalote ni ku Edileyi. (Mwéne wasukina ku akwa Lafayime.) Mozé wa atolola yu wa akaye. 13 Maji akwa Izalayele kakaye akwa Jesule ni akwa Makata. Kuma akwa Jesule ni akwa Makata, atungu mwaxaxi ka Izalayele kate mu izuwa yalelu.

14 O mwiji wa Levi wene ngo wakambe kutambula o undundu, mukonda o undundu wâ wexile o jisata ja kwoha, jexile mubhana kwa Jihova o Nzambi ya Izalayele kala kya akanene.

15 Mozé wabhana o undundu ku mwiji wa akwa Lubene kala kyatokalele. 16 O mbambe yâ, yamatekene tunde ku Alowele, yala ku mbandu ya honga ya Anone, ndu ku mbanza yala mukaxi ka honga, ni mulundu woso wa Mendeba. 17 Hexebone ni jimbanza jê joso jala ku milundu, Dibone, Bamote-Bahale, Bete-Bahale-Mehone, 18 Jahaze, Kedimote, Mefite, 19 Kidyatayimi, Sibima, Zefate-Sahale ku mulundu wa zukamene ni honga, 20 Bete-Peyole, o mbandu ya Pixika, o Bete-Jeximote, 21 o jimbanza joso ja mulundu, ni utuminu woso wa Sihone, o sobha ya Mamodi, watumina ku Hexebone. Mozé wa atolola, kikale ene kikale o makota a Midiyana, Evi, Lekeme, Zule, Hule, Leba, atungile mu ixi yenyonyo, ene exile jisobha maji exile mu atumina ku sobha ya Sihone. 22 Mwaxaxi ka yó a ajibha ku akwa Izalayele ni xibhata, mwakexile Balamu mukwa kuzambula, mon’â Bewole. 23 Mu ngiji ya Njolodá, bhwene bhwasukine o mbambe ya akwa Lubene. O mbambe yiyi ni jimbanza jê ni athu atungile-mu, yexile o undundu wa akwa Lubene, kala kya wanene ku miji yâ.

24 Mozé wabhana o undundu ku mwiji wa akwa Ngade, kala kyafwamene ku miji yâ. 25 O mbambe yâ, yalungile ni Jazele, o jimbanza joso ja Ngiliyade, ni mbandu ya ixi ya akwa Amone, kate ku Alowele, ku pholo ya Labá. 26 Ya matekene ku Hexebone kate ku Lamate-Mispa, ni Betomine ni ku Manayime kate ku mbambe ya Ndebile. 27 O honga yayile ku Bete-Alama, Bete-Halane, Sukote, Zafone, o jimbanza ja utuminu wa Sihone o sobha ya Hexebone, ku mbambe ya Njolodá, tunde ku mbandu ya lwiji wa musanza wa kalunga ya Kinelete, ku mbandu ku tundila o dikumbi ya Njolodá. 28 Yú wene o undundu wa akwa Ngade, kala kya fwama ku miji yâ, ni jimbanza jâ ni jisanzala jâ.

29 O mbandu ya mwiji wa Manasa a abhana o undundu kwa Mozé, kala kyafwama ku miji yâ. 30 O mbambe yâ, yamatekene ku Manayime ni Basane yoso, kifwa o utuminu woso wa Hoge, sobha ya Basane, ni jisanzala* joso ja Jayile jala ku Basane. Jene joso jatenesa makwinyi asamanu a jimbanza. 31 Ni mbandu ya ixi ya Ngiliyade, ya Axitalote ni ya Edileyi, kala o jimbanza joso ja utuminu wa Hoge, ku Basane, a jibhana ku twana twa Makidi, mon’â Manasa, kifwa o mbandu ya twana twa Makidi, kala kyafwama ku miji yâ.

32 Yú wene o undundu wa abhana Mozé mu kikangalakata kya Mowabe, ku sambwa ya Njolodá, ku mbandu kutundila o dikumbi dya mbanza ya Jedikó.

33 Maji Mozé kabhana undundu ku mwiji wa Levi, mukonda Jihova o Nzambi ya Izalayele, mwéne o undundu wâ, kala kya akanena.

14 Yú wene o undundu watambula akwa Izalayele mu ixi ya Kanana, wabhana o mukunji Eliyazale ni Jozuwé mon’â Nune ni adyakime a miji ya Izalayele. 2 O divwa dya miji atambula o undundu wâ bhukaxi ka jisolote, kala kyatumine Jihova kwa Mozé. 3 Mozé wabhana o ixi kala undundu ku miji iyadi ni kaxaxi ku mbandu yamukwa* ya Njolodá. Maji o Jilevita ka abhana undundu. 4 O mbutu ya Zuze a itange kala miji iyadi, o mwiji wa Manasa ni mwiji wa Efalayíme. O Jilevita katambula ixi kala undundu, atambula ngo jimbanza phala kutunga-mu ni mikawu phala kwinga o ibhaku yâ ni kulanga o jimbote jâ. 5 Kyenyiki, o akwa Izalayele a wanena o ixi kala kyatumine Jihova kwa Mozé.

6 O mayala a Judá kumoxi ni Kalebe mon’â Jefune mukwa Kena, ayi kate kwa Jozuwé ku Jidingale. Mu kubhixila kwenyoko, Kalebe wambe, wixi: “Eye wejiya kyambote yazwela Jihova kwa Mozé, o diyala dya Nzambi yakidi, yalungu n’eye, n’eme ku Kadexi-Balaneya. 7 Ngakexile ni makwinyi awana a mivu, kyoso Mozé o selevende ya Jihova, kya ngikatula ku Kadexi-Balaneya, yu wa ngitumikisa phala kulonda o ixi, eme ngavutuka ni njimbu ya kidi. 8 Sumbala o jiphange jami jingendele naju kumoxi abhangesa o mundu kukala ni wôma,* maji eme ngabelesela Jihova Nzambi yami ni muxima wami woso.* 9 Mu kizuwa kyenyokyo, Mozé wa ngikanena: ‘O ixi yadyota o inama yé, yanda kala o undundu phala eye ni twana twé, kuma wabelesela Jihova Nzambi yami ni muxima woso.’ 10 Kala kya ngikanena, Jihova wa ngilange ni mwenyu mu makwinyi awana ni kitanu kya mivu, tunde Jihova kyakanena o ima yiyi kwa Mozé, kyoso Izalayele kyakexile munyunga mu kikangalakata. Lelu ngala bhabha, ngala kya ni makwinyi anake ni kitanu kya mivu. 11 Lelu ngala hanji ni nguzu, kala ki ngexile kyoso Mozé kya ngitumikisa. O nguzu i ngexile-nayu mu kithangana kyenyokyo, yene hanji i ngala-nayu lelu, kikale phala o ita kikale phala o ikalakalu yamukwa. 12 Mukiki-phe, ngibhane o mbandu yiyi ya mulundu ya kanena Jihova mu kizuwa kyenyokyo. Sumbala mu kizuwa kyenyokyo eye wevwile kwila, kwenyoko kwala akwa Anake ni jimbanza ja makota jala ni ilumbu. Ni kidi kyoso,* Jihova wanda kala n’eme, eme nganda kwa akaya kala kyakanena Jihova.”

13 Kyenyiki, Jozuwé wa mubesowala, wabhana o ixi ya Hebolone kala undundu kwa Kalebe mon’â Jefune. 14 Mukonda dyakiki, o ixi ya Hebolone yatokala kwa Kalebe mon’â Jefune mukwa Kena, kala undundu, mukonda wabelesela Jihova o Nzambi ya Izalayele ni muxima wê woso. 15 M’ukulu, o dijina dya Hebolone dyexile Kidiyate-Halaba, (Halaba wexile o diyala dyabetele-kota ku akwa Anake). O ixi yatululukile, kikwexile dingi ita.

15 O ixi yatokalele* ku mwiji wa akwa Judá yamatekene mu mbambe ni Edomo, o kikangalakata kya Zime ndu ku lwiji lwa Nengebe. 2 O mbambe yâ ku mbandu ya lwiji, yamatekene mu musanza wa Kalunga ka Môngwa. 3 O mbambe yâ, yayile kate ku lwiji mu kubanda ku Akalabimi mu kubhita ku Zini anga iya ku lwiji kate ku Kadexi-Balaneya. Yabhitile ku Hezelone anga ibanda ku Adale i yajingulukila ku Kalaka. 4 O mbambe yasuluka ku Azemone, anga iya kate ku honga ya Ijitu, yasukina mu musanza wa kalunga.* Yiyi yene yexile o mbambe ya akwa Judá ku mbandu ya lwiji.

5 O mbambe yâ ku mbandu kutundila o dikumbi, yamatekene ku musanza wa kalunga ka Môngwa, kate bhu masanganu a ngiji ya Njolodá. O mbambe yâ ku mbandu ya thunda yamatekene ku musanza wa kalunga mu masanganu a ngiji ya Njolodá. 6 O mbambe yâ yabandele kate ku Bete-Hokala, ibhita ku mbandu ya thunda ku Bete-Halaba anga ibanda kate ku matadi a Bohane, mon’â Lubene. 7 O mbambe yasulukile kate ku Ndebile mu honga ya Akole anga ijinguluka ku mbandu ya thunda mu kuya ku Jidingale, yexile ku pholo mu kubanda ku Adumimi ku mbandu ya lwiji ya honga. O mbambe yabhitile mu fixi ya menya ya Ene-Semexi anga isuka ku Ene-Lojele. 8 O mbambe yayile kate mu honga ya mon’â Hinome ndu ku mbandu ya mulundu ku mbandu ya lwiji ya akwa Jebuze, kifwa ku Jeluzaleme. Anga ibanda ku mulundu wexile ku mbandu ku fwila o dikumbi, ku pholo ya honga ya Hinome ni ku mbandu ya thunda mu honga ya Lafayime. 9 O mbambe yayile kate ku mulundu, ndu mu fixi ya menya ya Nefetowa anga isuluka kate mu jimbanza ku mulundu wa Efelone. Anga iya kate ku Bahala, kifwa Kidyate-Jadimi. 10 Ku Bahala o mbambe yamatekene ku mbandu ku fwila o dikumbi, ndu ku mulundu wa Seyile anga ibhita ku mulundu wa Jehadimi, kifwa ku Kesalone, ikulumuka ku Beteseme anga ibhitila ku Timinate. 11 O mbambe isuluka ku mbandu ya mulundu ku thunda dya Ekolone, iya kate ku Xikelone ibhita ku mulundu wa Bahala, isuluka kate ku Jabiniyele anga isuka ku musanza wa kalunga.

12 Ku mbandu ku fwila o dikumbi, o mbambe yasukile ku musanza wa Kalunga Kadikota.* Jiji jene jexile o jimbambe ja akwa Judá, kala kyatokala ku miji yâ.

13 Jozuwé wabhana kwa Kalebe mon’â Jefune, mbandu ya ixi mwaxaxi ka mwiji wa Judá kala kyatumine Jihova kwa Jozuwé. Mwene watambula o ixi ya Kidiyate-Halaba, kifwa o ixi ya Hebolone. (Halaba mwéne wexile o tata ya Anake.) 14 Kyenyiki, Kalebe wakaye o twana tutatu twa Anake, Xexayi, Ahimane ni Talamayi o twana twa Anake. 15 Mwene watundu kwenyoko, yu wayi mubhânga ni akwa Ndebile. (M’ukulu o ixi ya Ndebile exile mu ixana Kidyate-Sefele.) 16 Kalebe wambe, wixi: “Diyala dyoso ditolola Kidyate-Sefele, nganda mubhana mon’ami Akeza phala kukala muhat’wê.” 17 Otiniyele mon’â Kenaji, phange ya Kalebe, mwéne watolola o mbanza. Kyenyiki, Kalebe wa mubhana mon’ê Akeza kala muhat’ wê. 18 Kyoso mwene kyexile muya kubhata, wabhingi kwa Otiniyele phala kubhinga kibhela kwa tat’ê. Kyenyiki, mwene watuluka ku jumendu,* Kalebe anga u mwibhwidisa, wixi: “Ihi i wamesena?” 19 Mwene watambwijila, wixi: “Ngakudyondo ngibhane dibesá, kuma eye wa ngibhana kibhela mu ixi yala ku lwiji,* ngibhane we Ngulote-Mayime.”* Kyenyiki mwene wa mubhana o ixi ya Ngulote ya Thunda ni Ngulote ya Lwiji.

20 Jiji jene o jixi jatambula akwa Judá kala undundu, kala kyafwamene ku miji yâ.

21 O jimbanza jexile ku mbandu ya lwiji ku mwiji wa Judá, mukuya mu mbambe ni Idomo jenyiji: Kabiziyele, Edele, Jangule. 22 Kina, Dimona, Adada, 23 Kadexi, Hazole, Itenana. 24 Zife, Teleme, Bayalote, 25 Hazole-Hadiyata, Kediyote-Hezelone, kifwa, Hazole. 26 Amane, Sema, Molada, 27 Hazalekada, Hazemone, Bete-Palete. 28 Hazale-Swale, Beleseba, Bizeyotiya, 29 Bahala, Lime, Ezeme, 30 Eletolade, Kesile, Holoma. 31 Zikilake, Madimana, Sanzana, 32 Lebahote, Silimi, Ayime ni Limone. Jimbanza joso jatenesa makwinyi ayadi ni divwa ni jisanzala jâ.

33 O jimbanza jexile ku Sefelá, jenyiji: Xitaholi, Zola, Axina, 34 Zanowa, Ene-Nganini, Tapuwa, Ename. 35 Jalemute, Adulamu, Soko, Azeka, 36 Sahalayime, Aditayime, Ngedela, Ngedelatayime.* Jimbanza joso jatenesa kwinyi ni kiwana ni jisanzala jâ.

37 Zenane, Hadasa, Mingidale-Ngadi, 38 Dilane, Mixipa, Joketele, 39 Lakiji, Bozekate, Engolone. 40 Kabone, Lamase, Kitiliji. 41 Ngedelote, Bete-Dangone, Nahama, Makeda. Jimbanza joso jatenesa kwinyi ni samanu ni jisanzala jâ.

42 Libina, Etele, Azane, 43 Ifitale, Axina, Nezile, 44 Keyila, Akezibe, Malesá. Jene joso jatenesa divwa dya jimbanza ni jisanzala jâ.

45 Ekolone, ni jimbanza ja zukamene ni jisanzala jâ. 46 Tunde ku Ekolone, mu kuya ku mbandu ku fwila o dikumbi, yoso yexile ku mbandu ya Ajidode ni jisanzala jê.

47 Ajidode ni jimbanza ja muzukamene ni jisanzala jê. Ngaza ni jimbanza ja muzukamene ni jisanzala jê, kate mu honga* ya Ijitu ku musanza wa Kalunga Kadikota* ni mbambe ya azukamene.

48 Ku mbandu ya milundu kwexile o jimbanza ja Xamidi, Jatile ni Soko. 49 Dana, Kidyate-Sana, kifwa, Ndebile, 50 Anabe, Xitemó, Anime, 51 Ngozene, Holone ni Ngilo. Jene joso jatenesa kwinyi ni umoxi dya jimbanza ni jisanzala jâ.

52 Alábya, Duma, Ezane. 53 Janime, Bete-Tapuwa, Afeka. 54 Hunda, Kidiyate-Halaba, Hebolone, Sihole. Jene joso jatenesa divwa dya jimbanza ni jisanzala jâ.

55 Mawone, Kalumelu, Zife ni Juta. 56 Jezelele, Jokedyame, Zanowa. 57 Akwa Kena, Ngibeya, Timinate. Jene joso jatenesa dikwinyi dya jimbanza ni jisanzala jâ.

58 Halule, Betezule, Ngedole. 59 Mahalate, Bete-Anote, Eletekone. Jene joso jatenesa samanu dya jimbanza ni jisanzala jâ.

60 Kidiyate-Bahale, kifwa, Kidyate-Jadimi ni Laba. Jimbanza jiyadi ni jisanzala jâ.

61 Mu kikangalakata mwexile o jimbanza ja Bete-Halaba, Midine, Sekaka. 62 Nibisane, mbanza ya Môngwani Engedi. Jatenesa samanu dya jimbanza ni jisanzala jâ.

63 Maji o mayala akwa Judá, katena kukaya akwa Jebuze atungile mu Jeluzaleme. Mukonda dyakiki o akwa Jebuze asuluka mu kutunga kumoxi ni akwa Judá mu Jeluzaleme, kate mu izuwa yalelu.

16 O ixi yatambula o mwiji wa Zuze bhukaxi ka jisolote,* yamatekene ku Njolodá bhwa zukama ni Jedikó, yayile kate mu menya akexile ku mbandu kutundila o dikumbi ya Jedikó, ya disanzumuna ndu mu kikangalakata kya Jedikó, i yayi ku milundu ya Betele. 2 Yasulukile kate ku Betele yatokala ku Luze, ndu ku mbambe ya ixi ya akwa Alaki, ku Atalote. 3 Yene yakulumukine ku mbandu ku fwila o dikumbi, mu mbambe ya ixi ya akwa Jafelete, ndu bhwa suku o mbambe ya Betolone ya Lwiji ni Ngezele, isukina ku musanza wa kalunga.

4 Kyenyiki, Manasa ni Efalayíme, o twana twa Zuze, atambula o ixi yâ. 5 Yiyi yene o mbambe ya akwa Efalayíme, kala kyafwamene ku miji yâ. O mbambe ku mbandu kutundila o dikumbi ku Atalote-Dale ndu ku Betolone ya Thunda. 6 O mbambe yayile kate ku musanza wa kalunga. O Makemeta yakexile ku mbandu ya thunda, yasukine ku mbandu kutundila o dikumbi kate ku Tanake-Silu ndu ku mbandu kutundila o dikumbi ku Janowa. 7 O mbambe yakulumukine ku Janowa, ku Atalote ni Nahalate, ibhixila kate ku Jedikó, isuluka ku Njolodá. 8 Ku Tapuwa, o mbambe yasulukile ku mbandu ku fwila o dikumbi, ku honga ya Kana, isukina ku musanza wa kalunga. Yú wene o undundu wa mwiji wa akwa Efalayíme, kala mwiji kala kya mutokalele. 9 Bhukaxi ka undundu wâ, mwakexile we o jimbanza ni jisanzala ja akwa Efalayíme, jakexile bhukaxi ka undundu wa twana twa Manasa.

10 Maji ene-phe, kakaye o akwa Kanana atungile ku Ngezele. Kyenyiki, o akwa Kanana asuluka mu kutunga mwaxaxi ka akwa Efalayíme kate mu izuwa yalelu, mu kukalakala kala abhika.

17 Kyenyiki, o solote yabwila ku mwiji wa Manasa. Manasa wexile o mona wa dyanga wa Zuze. Makidi, o mona wa dyanga wa Manasa, wexile tata ya Ngiliyade. Kuma mwene wexile dizonda, watambula o ixi ya Ngiliyade ni Basane. 2 O solote yabwila ku mbutu ya Manasa, kala kyafwama o miji. O an’â Abiyezele, an’â Heleke, an’â Axidiyele, an’â Xikeme, an’â Hefele ni an’â Semida. Yá ene o an’â mala a Manasa, mon’â Zuze, a asolo ku miji yâ. 3 Maji Zelofeyadi mon’â Hefele, mon’â Ngiliyade, mon’â Makidi, mon’â Manasa, kakexile ni an’â mala. Wakexile ngo ni an’â ahatu. O majina mâ enyá: Mahala, Nowa, Hokala, Milika ni Tidiza. 4 Kyenyiki, ene ayi ku mukunji Eliyazale, ni kwa Jozuwé mon’â Nune ni ku adiyakime a Izalayele, ya ambe: “Jihova watumina Mozé kutubhana undundu mwaxaxi ka jiphange jetu.” Jozuwé wa abhana o undundu mwaxaxi ka jiphange ja tat’ê, kala kyatumina Jihova.

5 O mwiji wa Manasa watambula dikwinyi dya mbandu ya ixi, watambula we o ixi ya Ngiliyade ni Basane, yakexile ku sambwa* dya ngiji ya Njolodá. 6 O an’â ahatu a Manasa, atambula o undundu wâ kumoxi ni an’â mala. Kyenyiki, o ixi ya Ngiliyade yatokalele ku mbutu ya Manasa.

7 O mbambe ya Manasa yamatekene ku Azele kate ku Makemeta, yakexile ku pholo ya Xikeme, yasulukile ku mbandu ya lwiji* kate mu ixi mwatungile akwa Ene-Tapuwa. 8 O ixi ya Tapuwa yatokalele kwa Manasa, maji o mbanza ya Tapuwa kwa sukina o mbambe ya Manasa, yatokalele ku mbutu ya Efalayíme. 9 O mbambe yâ, yayile kate mu honga ya Kaná ku mbandu ya lwiji ya honga. Mwaxaxi ka jimbanza ja Efalayíme mwakexile we jimbanza ja akwa Manasa. O mbambe ya ixi ya Manasa yakexile ku mbandu ya thunda mu honga, yasukine ku musanza wa kalunga. 10 O mbambe ya ixi ku mbandu ya lwiji yatokalele ku akwa Efalayíme, o mbambe ya ixi ku mbandu ya thunda yatokalele ku akwa Manasa, o mbambe yâ, yexile o musanza wa kalunga. O mbambe ya Manasa, ku mbandu ya thunda yayile* kate ku Azele, o ku mbandu kutundila o dikumbi yayile kate ku Izakale.

11 Mu mbambe ya Izakale ni Azele, Manasa waxala ni ixi ya Bete-Sane ni jisanzala jê,* o ixi ya Ibelayime ni jisanzala jê, o akwa Ndole ni jisanzala jâ, o akwa Ene-Ndole ni jisanzala jâ, o akwa Tahanake ni jisanzala jâ ni akwa Mejidu ni jisanzala jâ. Jimbanza jitatu jakexile ku milundu.

12 Maji akwa Manasa katenene kutambula o jimbanza jiji, kuma akwa Kanana ajijile kutunga mu jimbanza jiji. 13 Kyoso akwa Izalayele kyeza mukala dingi ni kutena, abhangesa akwa Kanana kukala abhika, maji katenene kwakaya enyoso.

14 O mbutu ya Zuze ebhwidisa Jozuwé, exi: “Mukonda dyahi watubhana ngo mbandu ya ixi kala undundu? Etu twala tu mundu wavulu, mukondaJihova wene mu tubesowala kate lelu.” 15 Jozuwé watambwijila, wixi: “Se enu mwala mu mundu wavulu, ndenu mu muxitu muzelesa-ku mbandu ya ixi ya akwa Mapelezi ni ya akwa Lafayime, kuma o milundu ya Efalayíme yatolo kyavulu phala enu.” 16 Kyenyiki, o mbutu ya Zuze yambe, exi: “Ku milundu kitwanda soka-ku etwenyoso. Enyoso akwa Kanana atungu mu honga, ala ni makalu a ita ala ni jifelu, kikale yó ala ku Bete-Sane ni mu jisanzala ja azukama ni yó atungu mu honga ya Jezelele.” 17 Kyenyiki, Jozuwé wambela o dibhata dya Zuze, kifwa o mwiji wa Efalayíme ni mwiji wa Manasa, wixi: “Enu mwala mu mundu wavulu, o kutena kwenu kwadikota, kimwanda tambula ngo mbandu ya ixi, kana. 18 O mbandu ya milundu yandakala we yenu. Sumbala muxitu, enu mwanda ku uzelesa, yanda kala o mbambe yenu. Sumbala o akwa Kanana ala ni nguzu, ala we ni makalu a ita ala ni jifelu, maji enu mwanda kwakaya mwene.”

18 Kyenyiki, o akwa Izalayele adyongeka ku Silo, mukonda o balaka yâ, ya kudyongeka yexile kya kwenyoko, mukonda atambwile kya o ixi yâ. 2 Maji kwexile hanji sambwadi dya miji ya akwa Izalayele, katambwile luwa o undundu wâ. 3 Kyenyiki, Jozuwé wambela akwa Izalayele, wixi: “Mwanda kingila kate thembu kuxi phala kutambula o ixi ya mibhana Jihova, o Nzambi ya jikuku jenu? 4 Solenu mayala atatu ku miji yenu, phala mu atumikise. Ene atokala kuya ni kulonda o ixi, phala ku iwana kala undundu, kala kyatokala ku mwiji ni mwiji. Mukusuluka, ene atokala kwiza mu ngitangela. 5 Ene atokala kuwana o ixi mu sambwadi dya jimbandu. O mwiji wa Judá, watokala kusuluka mu mbambe yâ ku mbandu ya lwiji, o mwiji wa Zuze, watokala kusuluka mu mbambe yâ, ku mbandu ya thunda. 6 Sotenu kwijiya kyambote o ixi, mu iwana mu sambwadi dya jimbandu, mukusuluka ngibhekelenu o njimbu. Eme bhabha nganda ta jisolote ku pholo ya Jihova, Nzambi yetu, phala ku mi wanuna o ixi. 7 Maji-phe, o akwa Levi kanda tambula mbandu ya ixi mwaxaxi k’enu, kuma o undundu wâ, o ukunji wa abhana Jihova. O mwiji wa Ngade ni Lubene ni mbandu ya mwiji wa Manasa, atambula kya o undundu wâ ku mbandu kutundila o dikumbi ya Njolodá, kala kya abhana Mozé, o selevende ya Jihova.”

8 O mayala a disokejeka phala kuya. Jozuwé watendelesa yó eji kuya mulonda o ixi, wixi: “Ndenu! Nyungenu o ixi anga musota ku ijiya kyambote, mukusuluka zenu mu ngitangele. Eme nganda ta jisolote ku Silo ku pholo ya Jihova phala ku miwanuna o ixi.” 9 Kyenyiki, o mayala ayi a nyungu o ixi ya asoto ku ijiya kyambote. Ene a iwanena mu sambwadi dya jimbandu kala kyafwama o jimbanza, anga asoneka mu divulu. Mukusuluka, avutuka kwa Jozuwé mu balaka ku Silo. 10 Jozuwé wate jisolote phala ene ku Silo, ku pholo ya Jihova. Kwenyoko, Jozuwé wawane o ixi phala akwa Izalayele, kala mwiji watambula o mbandu yê kala kya mutokala.

11 O solote yabwila ku mwiji wa Bejamí, kala kyafwama ku miji yâ. O ixi ya abhana bhukaxi ka jisolote, yakexile bhukaxi ka mwiji wa Judá ni mwiji wa Zuze. 12 Ku mbandu ya thunda, o mbambe yâ yamatekene ku ngiji ya Njolodá, iya kate ku mulundu wa Jedikó ku thunda. Yasulukile ku mulundu ku mbandu ku fwila o dikumbi, anga idisanzumuna kate mu kikangalakata kya Bete-Avene. 13 O mbambe yasulukile ku Luze, ku mulundu ku mbandu ya lwiji ya Luze, kifwa ku Betele. O mbambe ya ixi, yakulumukine kate ku Atalote-Dale, ku mulundu ku lwiji lwa Betolone ya Lwiji. 14 O mbambe yayile ku mbandu ku fwila o dikumbi, anga ikondoloka ku mbandu ya lwiji, tunde ku mulundu wexile ku pholo dya Betolone ya Lwiji. Yasukina ku Kidiyate-Bahale, kifwa Kidyate-Jadimi, o mbanza ya Judá. Yiyi yene yexile o mbambe yâ ku mbandu ku fwila o dikumbi.

15 O mbambe ku mbandu ya lwiji, yamatekene bhwasukile Kidyate-Jadimi, anga idisanzumuna kate ku mbandu ku fwila o dikumbi ndu ku fixi ya menya ya Nefetowa. 16 O mbambe yakulumukine bwa sukile o mulundu wexile ku pholo mu honga ya mon’â Hinome, ku mbandu ya thunda ya honga ya Lafayime. Yakulumukine mu honga ya Hinome, iya kate ku mulundu ku mbandu ya lwiji ya akwa Jebuze, anga ikulumuka ku Ene-Lojele. 17 Yasulukile ku mbandu ya thunda, yadisanzumwine kate ku Ene-Semexi, ndu ku Jelilote, yexile ku pholo mu kubanda ku Adumimi, anga ikulumuka ku ditadi dya Bohane, mon’â Lubene. 18 Yasulukile ku mulundu wakexile ku mbandu ya thunda, ku pholo ya Halabá, anga ikulumuka kate ku Halabá. 19 O mbambe yasulukile ku mbandu ya mulundu ku thunda ya Bete-Hokala, yasukine ku mbandu ya thunda ku musanza wa kalunga ka Môngwa, bhwa sukina ni Njolodá ku mbandu ya lwiji. Yiyi yene o mbambe ku mbandu ya lwiji. 20 Ku mbandu kutundila o dikumbi, o ngiji ya Njolodá yene yexile o mbambe. Jiji jene o jimbambe joso ja ixi ya mwiji wa Bejamí, kala kyatokala ku miji yâ.

21 O jimbanza jatokala ku mwiji wa Bejamí, kala kyafwama ku miji yâ, jenyiji: Jedikó, Bete-Hokala ni Emekeziji. 22 Bete-Halabá, Zemalayíme, Betele, 23 Havime, Pala, Ofila, 24 Kefala-Amonayi, Ofini, Jeba. Jene joso jatenesa kwinyi ni kiyadi kya jimbanza ni jisanzala jâ.

25 Ngibiyone, Lama, Behelote, 26 Mixipa, Kefila, Mozahe, 27 Lekeme, Idipele, Talala, 28 Zelá, Halefe, Jebuze, kifwa Jeluzaleme, Ngibeya, Kidiyate. Jene joso jatenesa kwinyi ni kiwana kya jimbanza ni jisanzala jâ.

Yú wene o undundu wa mwiji wa akwa Bejamí, kala kyatokala ku miji yâ.

19 Mukusuluka, o solote ya kayadi yabwila kwa Ximinyá, o mbutu ya Ximinyá. Kala mwiji kala kya mutokalele. O jimbanza jatambwile kala undundu jakexile moxi ya ixi ya Judá. 2 O jixi jatambula kala undundu jenyiji: Beleseba, Seba ni Molada, 3 Hazale-Suwale ni Bala ni Ezeme. 4 Ni Eletolade ni Betule ni Holoma. 5 Ni Zikilake ni Bete-Makabote ni Hazale-Suza, 6 Bete-Lebahote ni Saluwene, kwinyi ni kitatu kya jimbanza ni jisanzala jâ. 7 Ni Ayime, ni Limone ni Etele ni Azane, jimbanza jiwana ni jisanzala jâ. 8 Ni jisanzala joso jazukamene ku jimbanza jiji, kate ku Balatebele ni ku Lamá ku mbandu ya lwiji. Yú wene o undundu watambwile o mwiji wa Ximinyá, kala mwiji kala kya atokalele. 9 O akwa Ximinyá, atambula o undundu wâ moxi dya ixi yatokalele ku akwa Judá, mukonda o ixi yatambula akwa Judá, yexile yadikota phala ene. Kyenyiki, o mwiji wa Ximinyá atambula o undundu wâ, mwaxaxi ka ixi ya akwa Judá.

10 Mukusuluka, o solote ya katatu yabwila ku mwiji wa akwa Nzebulone, kala mwiji kala kya atokalele. O mbambe ya ixi yâ, yayile kate ku Salide. 11 O mbambe ya ixi yâ, yayile kate ku mbandu ku fwila o dikumbi ndu ku Malala, yasulukile ku Dabesete, kate mu honga yakexile ku pholo ya Jokeneyame. 12 Ku Salide, o ixi yasulukile ku mbandu kutundila o dikumbi, kate ku mbambe ya Kixilote-Tabola, yayile ku Dabelate anga ibanda ku Jafiya. 13 Kwenyoko, o mbambe yasulukile ku mbandu kutundila o dikumbi, ku Ngate-Hefele anga iya kate ku Etekazine, o mbambe yasulukile ku Limone anga idisanzumuna kate ku Neya. 14 O mbambe yakondolokele ku mbandu ya thunda, yayile kate ku Hanatone, anga isukidila ku Ifitayele. 15 Ni Katate ni Nahalale ni Ximilone ni Idala ni Beleme. Kwinyi ni kiyadi kya jimbanza ni jisanzala jâ. 16 Yú wene o undundu watambula o mwiji wa Nzebulone, kala kyatokalele ku mwiji wâ. Jiji jene o jimbanza ni jisanzala jâ.

17 O solote ya kawana, yabwila ku Izakale, o mbutu ya Izakale, kala kyafwamene ku miji yâ. 18 O mbambe ya ixi yâ, yamatekene ku Jezelele, yasuluka ku Kesulote ni Suneme, 19 ni Hafalayime, Siyone, Anakalate, 20 Labite, Kixiyone, Ebe, 21 Lemete, Ene-Nganini, Enehada ni Bete-Paze. 22 O mbambe yâ, yabhixila kate ku Tabola, Xahazuma, Beteseme, yasukine ku Njolodá. Jene joso jatenesa dikwinyi ni samanu dya jimbanza ni jisanzala jâ. 23 Yú wene o undundu wa mwiji wa Izakale, kala kyafwamene ku miji yâ. Jiji jene o jimbanza ni jisanzala jâ.

24 O solote ya katanu yabwila ku mwiji wa Azele, kala kyatokalele ku miji yâ. 25 O mbambe ya ixi yâ, yexile Helekate, Hali, Betene, Akezafa, 26 Alameleke, Amadi, Misale, ku mbandu ku fwila o dikumbi, yabhixila kate ku Kalumelu ndu ku Sihole-Libenate. 27 O mbambe yasulukile ku mbandu kutudila o dikumbi ndu Bete-Dangone, yabhitile ku Nzebulone ku mbandu ya thunda ya honga ya Ifitayele, yayile ku Betemeke ni Neyele, yene yasulukile kate ku mbandu ya kyasu ya Kabule. 28 O mbambe yasulukile ku Ebolone, Lehobo, Hamone ku Kaná, yasulukile kate ku Sidónya ya Dikota. 29 O mbambe yenyiyi yakondolokele ku Lamá, yayile kate mu mbanza ya Tilu, yexile ni ilumbu, mukusuluka o mbambe yakondolokele ku Hosa, yasukile ku musanza wa kalunga ku Kezibe. 30 Yasulukile ku Umá, Afeke ni Lehobo. Jene joso jatenesa makwinyi ayadi ni kiyadi kya jimbanza ni jisanzala jâ. 31 Yú wene o undundu wa mwiji wa Azele, kala kyafwamene ku miji yâ. Jiji jene o jimbanza ni jisanzala jâ.

32 O solote ya kasamanu yabwila kwa Nafitali, o mbutu ya Nafitali, kala kyatokalele ku miji yâ. 33 O mbambe ya ixi yâ, yamatekene ku Helefe ku muxi wadikota wa Zananíme, yabhitile ku Adami-Nekebe ni Jabiniyele, yayile kate ku Lakumi, yasukina ku Njolodá. 34 O mbambe ya kondolokele ku mbandu ku fwila o dikumbi, yasulukile ku Azenote-Tabolo kate Hukoke, ibhixila ku Nzebulone ku mbandu ya lwiji kate ku Azele ku mbandu ku fwila o dikumbi, ndu ku Judá ku mbandu kutundila o dikumbi ku Njolodá. 35 O jimbanza jakexile ni ilumbu jenyiji: Sidime, Zele, Hamate, Labate, Kinelete, 36 Adama, Lamá, Hazole, 37 Kadexi, Edileyi, Ene-Hazole, 38 Ilone, Midale, Holeme, Bete-Anate ni Beteseme. Jene joso jatenesa kwinyi ni divwa dya jimbanza ni jisanzala jâ. 39 Yú wene o undundu watambula o mwiji wa Nafitali, kala kyafwamene ku miji yâ. Jiji jene o jimbanza ni jisanzala jâ.

40 O solote ya kasambwadi yabwila ku mwiji wa Dane, kala kyafwamene o miji yâ. 41 O mbambe ya ixi yâ, yexile Zola, Xitaholi, Idisemexi, 42 Sahalebine, Ajalone, Itila, 43 Elone, Timinate, Ekolone, 44 Eliteke, Ngibetone, Balate, 45 Jehudi, Bene-Belake, Ngate-Dimone, 46 Mejakome, Lakome ni jimbanza ja zukamene ku pholo ya Jope. 47 Maji o mbambe ya ixi ya mwiji wa Dane, yatolele kyavulu phala ene. Kyenyiki, ene ayi mulwa ita ni akwa Leseme, anga atolola o mbanza ya Leseme ni xibhata. Mukusuluka atambula o ixi yâ, anga atunga mwenyomo. O mbanza ya Leseme a iluku o dijina dya Dane, o dijina dyatokalele ku kukululu yâ. 48 Yú wene o undundu watokalele ku mwiji wa Dane, kala kyatokalele ku miji yâ. Jiji jene o jimbanza ni jisanzala jâ.

49 Kyenyiki, azubha kuwana o ixi kala undundu. Mukiki-phe, akwa Izalayele abhana kwa Jozuwé mon’â Nune, undundu bhukaxi kâ. 50 Kala kyatumu Jihova, a mubhana o ixi ya Timinate-Sela yabhingi mwene, ku milundu ya Efalayíme. Mwene wa itungulula anga utunga mwenyomo.

51 Yú wene o undundu wawane Eliyazale, o mukunji, ni Jozuwé mon’â Nune ni atwameni a miji a Izalayele bhukaxi ka jisolote ku Silo, ku pholo ya Jihova bhu mwelu wa balaka ya kudyongekela-mu. Kyenyiki, azubha kuwana o ixi.

20 Jihova wambela Jozuwé, wixi: 2 “Tangela akwa Izalayele: ‘Solenu jimbanza phala kulengela-mu, kala ki ngakyambele kya bhukaxi ka Mozé. 3 Phala o yó ujibha mukwa sé kukikana,* alengele-mu. Jene janda kala kididi phala kudisweka ku muzokedi wa manyinga. 4 Mu jimbanza jiji, watokala kusola-mu mbanza imoxi phala kulengela-mu. O kyanda bhixila mu mbanza, mwene watokala kwimana bhu mwelu wa dibhitu ni kutangela kwa adyakime a mbanza, yoso yabhange. Mu kyenyiki, ene atokala ku mutambulula ni ku mubhana kididi phala kutunga-mu. 5 Se o muzokedi wa manyinga u mukayela, o adyakime a mbanza katokala kubhakula o kijibhangânga bhu maku mê, kuma mwene wajibha mukwa sé kukimesena, kamukwatele unguma ku muxima. 6 Mwene watokala kutunga mu mbanza yenyoyo, kate kyanda mwixana ku pholo ya adyakime phala ku mufundisa. Mwene watokala kukala kwenyoko kate ku ufwilu wa mukunji wadikota wa izuwa yenyoyo, kyene ngo o kijibhangânga kyanda vutuka mu mbanza mwatundile, kyoso kyalengele. Mwene wanda tena kuvutuka mu mbanza yê, ni mu dibhata dyê.’”

7 Mu kyenyiki, ene asolo* Kadexi, ku Ngalileya ku milundu ya Nafitali, Xikeme, ku milundu ya Efalayíme ni Kidiyate-Halaba, kifwa Hebolone, ku milundu ya Judá. 8 Ku mbandu ya Njolodá kutundila o dikumbi, kwa zukamene ni Jedikó, ene asolo Bazane mu kikangalakata ku mulundu. Ku mwiji wa Lubene, Lamote ku Ngiliyade, ku mwiji wa Ngade, ni Ngolane ku Basane ku mwiji wa Manasa.

9 Jiji jene o jimbanza jasolo, phala akwa Izalayele yoso ni akwa jixi jengi atungile mwaxaxi kâ. Phala o yó ujibha mukwa sé kukimesena alengele-mu, phala kamujibhe ku muzokedi wa manyinga ande dya ku mufundisa kwala o adyakime.

21 Kyenyiki, o atwameni a mwiji wa Levi ayi kwa mukunji Eliyazale, ni kwa Jozuwé, mon’â Nune ni ku atwameni a miji ya Izalayele. 2 Ene ayi muzwela nawu ku Silo, mu ixi ya Kanana, exi: “Mu thembu ya Mozé, Jihova watumine kutubhana ibhela phala kwingila-mu o ibhaku yetu ni jimbanza phala tutunge-mu.” 3 Kyenyiki, mu undundu wâ, o akwa Izalayele abhana jimbanza ni ibhela yakwingila-mu ibhaku, ku Jilevita kala kyatumine Jihova.

4 O solote yabwila ku mwiji wa Kohate. O Jilevita exile o mbutu ya mukunji Alá, atambula kwinyi ni kitatu kya jimbanza ku mwiji wa Judá, ni wa Ximinyá, ni wa Bejamí bhukaxi ka jisolote.

5 O mwiji wa Kohate, watambula* dikwinyi dya jimbanza ku mwiji wa Efalayíme, ku mwiji wa Dane ni ku mwiji wa Manasa.

6 O akwa Ngelexone atambula kwinyi ni kitatu kya jimbanza ku mwiji wa Izakale, ku mwiji wa Azele, ku mwiji wa Nafitali ni ku mbandu ya mwiji wa Manasa ku Basane.

7 O kwa Meladi, kala kyafwama ku miji yâ, atambula dikwinyi ni kiyadi kya jimbanza ku miji ya Lubene, ya Ngade ni ya Nzebulone.

8 Kyenyiki, o akwa Izalayele abhana ku Jilevita o jimbanza ni ibhela yakwingila-mu o ibhaku, bhukaxi ka jisolete, kala kyatumine Jihova bhukaxi ka Mozé.

9 O mwiji wa Judá ni mwiji wa Ximinyá, abhana o jimbanza jotumbule bhabha mu majina. 10 Jene ajibhana ku an’â Alá, atokala ku miji ya Kohate, o Jilevita, mukonda o solote yabwila kwa ene. 11 Ku milundu ya Judá, abhana Kidiyate-Halaba, kifwa Hebolone ni ibhela yakwingila-mu o ibhaku. (Halaba wexile o tata ya Anake.) 12 Maji o mikáwu ni jimbanza ajibhana kwa Kalebe, mon’â Jefune, kala ixi yê.

13 O an’â Alá, o mukunji, a abhana o mbanza phala yó woso wajibha, kulengela-mu, kifwa Hebolone, ni ibhela yâ yakwingila-mu o ibhaku, a abhana we Libina ni ibhela yâ ya kwingila-mu o ibhaku, 14 ni mbanza ya Jatile, ni ibhela yâ yakwingila-mu o ibhaku, ni mbanza ya Xitimowa ni ibhela yâ yakwingila-mu o ibhaku, 15 ni mbanza ya Holone, ni ibhela yâ ya kwingila-mu o ibhaku, ni mbanza ya Ndebile, ni ibhela yâ yakwingila-mu o ibhaku, 16 ni mbanza ya Ayime, ni ibhela yâ yakwingila-mu o ibhaku, ni mbanza ya Juta, ni ibhela yâ ya kwingila-mu o ibhaku, ni mbanza ya Beteseme, ni ibhela yâ ya kwingila-mu o ibhaku. Jatenesa divwa dya jimbanza ku miji iyadi yiyi.

17 Ku mwiji wa Bejamí, Ngibiyone, ni ibhela yâ ya kwingila-mu o ibhaku, Jeba, ni ibhela yâ ya kwingila-mu o ibhaku, 18 Anatote, ni ibhela yâ yakwingila-mu o ibhaku ni Alumone, ni ibhela yâ yakwingila-mu o ibhaku. Jene joso jatenesa mbanza jiwana.

19 O jimbanza joso jabhana ku mbutu ya Alá, o mukunji, jatenesa kwinyi ni kitatu kya jimbanza ni ibhela yâ yakwingila-mu o ibhaku.

20 Amukwa ku mwiji wa Kohate, kifwa yó asubhukile ku mwiji wa Kohate, o Jilevita, atambula o jimbanza ku mwiji wa Efalayíme bhukaxi ka jisolote. 21 Ene atambula o jimbanza jatokalele kulengela-mu o kijibhanganga. Kifwa atambula o mbanza ya Xikeme ni ibhela yâ ya kwingila-mu o ibhaku ku mulundu wa Efalayíme. Atambula we Ngezele, ni ibhela yâ yakwingila-mu o ibhaku, 22 Kibisayime, ni ibhela yâ yakwingila-mu o ibhaku, Betolone, ni ibhela yâ ya kwingila-mu o ibhaku. Jene joso jatenesa mbanza jiwana.

23 Ku mwiji wa Dane, Eliteke, ni ibhela yâ ya kwingila-mu o ibhaku, Ngibetone, ni ibhela yâ yakwingila-mu o ibhaku, 24 Ajalone, ni ibhela yâ yakwingila-mu o ibhaku, Ngate-Dimone, ni ibhela yâ ya kwingila-mu o ibhaku. Jene joso jatenesa mbanza jiwana.

25 O mbandu ya mwiji wa Manasa, Tahanake, ni ibhela yâ yakwingila-mu o ibhaku, Ngate-Dimone, ni ibhela yâ ya kwingila-mu o ibhaku. Jatenesa mbanza jiyadi.

26 O mbandu ya miji ya akwa Kohate, atambula dikwinyi dya jimbanza, ni ibhela yâ yakwingila-mu o ibhaku.

27 O akwa Ngelexone, o mwiji wa Levi, atambula ku kaxaxi ka mwiji wa Manasa, o mbanza phala kulengela-mu yó wajibha muthu, kifwa, Ngolane ku Basane ni ibhela yâ yakwingila-mu o ibhaku. Atambula we Betela, ni ibhela yâ ya kwingila-mu o ibhaku. Jatenesa mbanza jiyadi.

28 Ku mwiji wa Isakale, Kixiyone ni ibhela yâ ya kwingila-mu o ibhaku, Dabelate ni ibhela yâ yakwingila-mu o ibhaku, 29 Jalemute ni ibhela yâ yakwingila-mu o ibhaku, Ene-Nganini ni ibhela yâ yakwingila-mu o ibhaku. Jatenesa mbanza jiwana.

30 Ku mwiji wa Azele, Misale ni ibhela yâ yakwingila-mu o ibhaku, Abadoni ni ibhela yâ ya kwingila-mu o ibhaku, 31 Helekate ni ibhela yâ ya kwingila-mu o ibhaku, Lehobo ni ibhela yâ yakwingila-mu o ibhaku. Jatenesa mbanza jiwana.

32 Ku mwiji wa Nafitali, atambula o mbanza ya kulengela-mu, yó ajibha muthu. Kifwa, Kadexi ku Ngalileya, ni ibhela yâ yakwingila-mu o ibhaku. Atambula wa Hamote-Dole, ni ibhela yâ ya kwingila-mu o ibhaku, Kaditane ni ibhela yâ yakwingila-mu o ibhaku. Jatenesa mbanza jitatu.

33 Akwa Ngelexone atambula dikwinyi dya jimbanza ni ibhela yakwingila-mu o ibhaku, kala kyafwama ku miji yâ.

34 O Jilevita jasubhukile ku mwiji wa Meladi, atambula ku mwiji wa Nzebulone, o mbanza ya Jokeneyame ni ibhela yâ yakwingila-mu o ibhaku, Kálata ni ibhela yâ yakwingila-mu o ibhaku, 35 Dimina ni ibhela yâ yakwingila-mu o ibhaku, Nahalale ni ibhela yâ yakwingila-mu o ibhaku. Jatenesa mbanza jiwana.

36 O ku mwiji wa Lubene, Bazane ni ibhela yâ yakwingila-mu o ibhaku, Jahaze ni ibhela yâ yakwingila-mu o ibhaku. 37 Kedimote ni ibhela yâ yakwingila-mu o ibhaku, Mefite ni ibhela yâ yakwingila-mu o ibhaku. Jatenesa mbanza jiwana.

38 Ku mwiji wa Ngade, o mbanza yakulengela-mu phala yó wajibha muthu, kifwa Lamote, ku Ngiliyade ni ibhela yâ yakwingila-mu o ibhaku, Manayime ni ibhela yâ ya kwingila-mu o ibhaku, 39 Hexebone ni ibhela yâ yakwingila-mu o ibhaku, ni Jazele ni ibhela yâ yakwingila-mu o ibhaku. Jatenesa mbanza jiwana.

40 O akwa Meladi, kifwa o mbandu ya mwiji wa Levi, atambula dikwinyi ni kiyadi kya jimbanza, kala kyafwama o miji yâ.

41 Mu ixi ya akwa Izalayele, o akwa Levi atambula makwinyi awana a jimbanza ni ibhela yakwingila-mu o ibhaku. 42 Kala mbanza yakexile ni ibhela yakwingila-mu o ibhaku bhwa zukama ni mbanza. O jimbanza joso jakexile ni ibhela yiyi.

43 Kyenyiki, Jihova wabhana ku akwa Izalayele, o ixi yoso yakanene ku jikuku jâ, ene a itambula anga atunga-mu. 44 Jihova wa ehela kutunga ni kutululuka kala kyakanene ku jikuku jâ. O jinguma joso, né ngo umoxi katenene kubhânga ni ene. Jihova wabhakula bhu maku mâ, o jinguma jâ joso. 45 O ikanenu yoso yambote yabhange Jihova ku dibhata dya Izalayele yadikumbidila, kikukambe kudikumbidila, né ngo kikanenu* kimoxi.

22 Kyenyiki, Jozuwé wexana akwa Lubene, akwa Ngade ni kaxaxi ka mwiji wa Manasa, 2 yu wa ambela, wixi: “Enu mwabhange yoso ya mitumu Mozé o selevende ya Jihova, mwabelesela we yoso i nga mitangela. 3 Kimwabhana dikunda ku jiphange jenu mu thembu yoso yiyi kate mu kizuwa kyalelu, mwa kumbidila o itumu ya Jihova Nzambi yenu. 4 Kindala, Jihova Nzambi yenu wabhana dinyohenu ku jiphange jenu kala kya akanena. Kyenyiki, mutena kya kuvutuka mu jibalaka jenu mu ixi ya mibhana Mozé, o selevende ya Jihova, ku sambwa* dya Njolodá. 5 Kumbidilenu-phe o itumu ni ijila ya mibhana Mozé, o selevende ya Jihova, mu kuzola Jihova Nzambi yenu, mukwenda mu jinjila jê, mukubhaka o itumu yê, mu kudikwatenena kwa mwene ni ku musidivila ni muxima wenu woso ni mwenyu wenu woso.”

6 Jozuwé wa abesowala, yu wa asulu. Kyenyiki, ene avutuka mu jibalaka jâ. 7 O kaxaxi ka mwiji wa Manasa, Mozé wa abhanene undundu ku Basane. O kaxaxi kamukwa ka mwiji, Jozuwé wa abhana o ixi ku mbandu ku fwila o dikumbi ya Njolodá bhwa zukama ni jiphange jâ. Kyoso-phe Jozuwé kya atumu kuvutuka mu jibalaka jâ, wa abesowala, 8 yu wa ambela, wixi: “Vutukenu mu jibalaka jenu ni jimbote javulu, ni ibhaku yavulu, ni phalata, ni ulu, ni ngondo, ni felu ni izwatu yavulu. O imbamba yoso i mwatambula ku jinguma jenu, mu iwana ni jiphange jenu.”

9 Kyenyiki, akwa Lubene, akwa Ngade ni kaxaxi ka mwiji wa Manasa, avutuka, anga axisa o an’â Izalayele mu mbanza ya Silo, mu ixi ya Kanana. Anga avutuka mu ixi ya Ngiliyade, o ixi yatambula phala kutunga-mu kala kyatumu Jihova bhukaxi ka Mozé. 10 Kyoso kyabhixila ku Njolodá mu ixi ya Kanana, akwa Lubene, akwa Ngade ni kaxaxi ka mwiji wa Manasa, atungu kalatódyu kwenyoko bhwa zukama ni Njolodá. Kexile kalatódyu konene. 11 Ku pholo dya kwenda, o an’â Izalayele eza mukwijiya o maka, ya ambe exi: “Talenu! Akwa Lubene, akwa Ngade ni kaxaxi ka mwiji wa Manasa, atungu kalatódyu bhwa suku o mbambe ya ixi ya Kanana, bhwa zukama ni Njolodá ku mbandu yamukwa yatokala ku akwa Izalayele.” 12 Kyoso akwa Izalayele kyevu o maka yá, o adyakime a Izalayele adyongeka ku Silo, phala kuya mubhânga ni ene.

13 Mukusuluka, akwa Izalayele atumikisa Fineya, mon’â mukunji Eliyazale ku akwa Lubene, ku akwa Ngade ni ku kaxaxi ka mwiji wa Manasa, mu ixi ya Ngiliyade. 14 O dikwinyi dya atwameni a miji ayi kumoxi ni mwene. Kala dibhata kwatundu mutwameni umoxi wa mwiji, watokala ku miji ya Izalayele. Kala mutwameni mwéne wexile o dikota ku mwiji wa tat’ê bhukaxi ka jimidi* ja akwa Izalayele. 15 Kyoso kyabhixila ku akwa Lubene, ku akwa Ngade ni ku kaxaxi ka mwiji wa Manasa, mu ixi ya Ngiliyade, a ambela:

16 “O mundu woso wa Jihova wambe, wixi: ‘Mukonda dyahi enu mwakambe kulondekesa ufiyele ku Nzambi ya Izalayele mukubhanga o kima kiki? Lelu enu mweha kukayela Jihova, mwatungu kalatódyu phala enu, énu mwabhukumukina Jihova. 17 Kifwa o kituxi kitwate ku Peyole kikyatusoko? Kate lelu twaxidi hanji, sumbala ni dibhebhu dyeza ku thandu dya kifuxi kya Jihova. 18 Enu mwamesena dingi kweha kukayela Jihova? Se mubhukumukina dingi Jihova, mwene wanda kala ni njinda yavulu ku kifuxi kyoso kya Izalayele. 19 Se mwa mukibhanga mukonda o ixi imwatambula yakasana, zaukenu-phe ku mbandu yamukwa ku ixi yatokala kwa Jihova, bhwala o balaka ya Jihova, ni mutunge mwaxaxi ketu. Maji kanenu kubhukumukina Jihova, kanenu kutubhangesa we ku mubhukumukina mu kutunga kalatódyu kengi, muveji dya kukala ngo ni kalatódyu ka Jihova Nzambi yetu. 20 Enu ki mwa mulembalala kyoso Akane mon’â Nzelá, kyate kituxi mu kukamba ufiyele mu ima yatokalele ku ibwika?* O njinda ya Nzambi ki yeza ku thandu dya kifuxi kyoso kya Izalayele? Kwafu athu avulu mukonda dya kituxi kyate mwene.’”

21 Kyenyiki, akwa Lubene ni akwa Ngade, ni kaxaxi ka mwiji wa Manasa, atambwijila o atwameni a jimidi ja Izalayele, exi: 22 “Jihova o Nzambi ya jinzambi, Jihova o Nzambi ya jinzambi! Mwene wakijiya. O akwa Izalayele we anda kwijiya, se twabhukumuka anga tukamba ufiyele kwa Jihova, mwene atukaxtikale mu kizuwa kyalelu. 23 Se twatungu kalatódyu phala kweha kusidivila Jihova, ni kubhana-mu jisata ja kwoha ni kusatela-mu jimbutu ni jisata ja paze, Jihova wanda tukaxtikala mukonda twa mubhukumukina. 24 Maji kikyene, etu twakibhangela ngo mukonda dya hele ya kwila ku hádya o twana twenu ambela o twana twetu, exi: ‘O kwila enu mwafwama kubheza Jihova, o Nzambi ya Izalayele kumoxi n’etu? 25 Jihova wabhangesa kwila o ngiji ya Njolodá ikale o mbambe yetu ni enu ni ya akwa Lubene ni akwa Ngade. Enu kimwafwama kubheza Jihova kumoxi n’etu.’ Kyenyiki, o twana twenu twanda fidisa o twana twetu kubheza* Jihova.”

26 “Mukonda dyakiki twambe: ‘Tu tungyenu mwene kalatódyu. Maji kiphala kubhakula-ku jisata ja kwoha mba maujitu. 27 Maji phala kukala mbangi bhukaxi k’etu ni enu, ni bhukaxi ka mbutu yenu ni mbutu yetu, ya kwila twanda sidivila Jihova ku pholo yê, ni jisata jetu ja kwoha, ni jisata jetu ja paze ni maujitu amukwa. Phala o twana twenu ku hádya kazwele ku twana twetu, exi: “Enu kimwafwama kusidivila Jihova kumoxi n’etu.”’ 28 Mukonda dyakiki, twambe: ‘Se ku hádya atutangela o ima yiyi mba a itangela ku mbutu yetu, etu twanda kwatangela: “Talenu, o kalatódyu kabhange o jikuku jetu, kadifwe ngo ni kalatódyu ka Jihova. Kene ka kabhange phala kubhakula-ku jisata ja kwoha mba maujitu. Maji akabhange phala kukala mbangi bhukaxi kenu ni etu.”’ 29 Kikola kubhukumukina Jihova ni kweha kukayela Jihova, mu kutunga kalatódyu phala kubhana-mu jisata ja kwoha, kusatela jimbutu ni maujitu amukwa. Kikale tukibhanga ngo ku kalatódyu ka Jihova Nzambi yetu kala mu balaka yê!”

30 Kyoso o mukunji Fineya ni adyakime a kyônge kya Izalayele ni atwameni a miji* akexile né kumoxi kyevu o ima yiyi yazwela o mbutu ya Lubene, ya Ngade ni ya Manasa, asanguluka. 31 Kyenyiki, o mukunji Fineya mon’â Eliyazale, wambela o mbutu ya Lubene, ya Ngade ni ya Manasa, wixi: “Lelu twejiya kwila Jihova wala mwaxaxi ketu, mukonda enu kimwate kituxi kyakukamba kukala fiyele kwa Jihova. Kindala enu mwabhulula akwa Izalayele bhu maku a Jihova.”

32 Mukusuluka, o mukunji Fineya mon’â Eliyazale, ni atwameni a Izalayele axisa akwa Lubene ni akwa Ngade mu ixi ya Ngiliyade. Ya avutuka mu ixi ya Kanana mu kwambata o njimbu ku akwâ. 33 O akwa Izalayele asanguluka kyavulu ni njimbu ya atudila. Mukusuluka, akwa Izalayele aximana Nzambi, kazwela dingi yalungu ni kubhânga ni akwa Lubene ni akwa Ngade, phala kubhwika o ixi mwatungile ene.

34 Kyenyiki, akwa Lubene ni akwa Ngade, aluku dijina ku kalatódyu,* mukonda “kene mbangi phala etwenyoso ya kwila, Jihova mwene o Nzambi yakidi.”

23 Mu kubhita thembu yavulu, kyoso Jihova kyabhanene dinyohenu ku akwa Izalayele, yu wa abhulula ku jinguma jâ, kyoso Jozuwé kyakukile kya kyavulu, 2 mwene wongeka o Izalayele yoso, o adyakime, o atwameni a miji, o afundixi, ni athu akamukwa akexile ni kutena, yu wa ambela: “Eme ngakuka kya kyavulu. 3 Enu mwamono ni mesu menu, yabhange Jihova, Nzambi yenu ku ifuxi yoso yiyi, kuma Jihova Nzambi yenu, mwéne wabhânge bhu kididi kyenu. 4 Talenu, eme ngabhana o ixi kala undundu ku miji yoso bhukaxi ka jisolote,* tunde ku Njolodá kate ku musanza wa Kalunga ka Dikota,* ku mbandu ku fwila o dikumbi, o ixi yatokalele ku ifuxi yengi, i ngabwika ni yoyo i ngakambe o kubwika. 5 Jihova Nzambi yenu, mwéne wakaye o ifuxi yiyi ku pholo yenu. Mwene wa akaye mukonda dyenu, enu mwatambula o ixi yâ kala kya mikanena Jihova Nzambi yenu.

6 “Kindala swinenu phala kukumbidila ni kubelesela yoso yosoneke mu divulu dya Kijila kya Mozé, mukukamba kuditela mu jinjila jayibha, 7 kanenu kudibunda ni ifuxi yiyi yasubhuka mwaxaxi kenu, né ngo kutumbula o majina a jinzambi jâ, né ku jilôkela, né ku jisidivila mba ku jifukamena. 8 Maji dikwatenyenu kwa Jihova Nzambi yenu, kala ki mwabhange kate mu kizuwa kyalelu. 9 Jihova wanda kaya o ifuxi yamakota, yaswina. Kate mu kizuwa kyalelu, séku muthu watena kubhânga ni enu. 10 Diyala dimoxi mudyenu, wanda tena kukaya midi, mukonda Jihova Nzambi yenu wa mubhânga bhukididi kyenu, kala kya mikanena. 11 Kyenyiki dilangyenu, sulukenu jinga mu kuzola Jihova, Nzambi yenu.

12 “Maji se muditela mu jinjila jayibha ni kudilunga ni ifuxi yaxala mwaxaxi kenu, ni kukazala nawu, ni kudibunda kumoxi ni ene, 13 ejiyenu-kyu kwila, Jihova Nzambi yenu, kanda suluka mu kukaya o ifuxi yiyi yasubhuka mwaxaxi kenu mukonda dyenu. Ene anda kala kala mubhetu ni jixikote kumakunda menu ni minya mu mesu menu, kate kimwanda jimuka mu ixi yambote ya mibhana Jihova, Nzambi yenu.

14 “Talenu, kwa ngikambe ngo eme nganda fwa,* enu mwejiya kyambote ni muxima wenu woso, ni mwenyu wenu woso kwila, ku izwelu yoso ya mikanena Jihova, Nzambi yenu, kikukambe né ngo kizwelu kimoxi kudikumbidila, yoso yadikumbidila kokwenu. Kikukambe kudikumbidila né ngo kizwelu kimoxi. 15 Maji kala kyadikumbidila o ikanenu yoso yambote ya mibhange Jihova Nzambi yenu, Jihova wandabheka ku thandu dyenu o mabhebhu oso akanena, ni kujima o mbutu yenu mu ixi yiyi yambote ya mibhana Jihova Nzambi yenu. 16 Se mu bhukumukina o kikutu ki mwabhange ni Jihova Nzambi yenu, kya mitendelesa, anga musidivila jinzambi jengi ni ku jifukamena, o njinda ya Jihova yanda kwiza ku thandu dyenu, enu mwanda jimuka ku thandu dya ixi yambote ya mibhana mwene.”

24 Jozuwé wongeka o miji yoso ya Izalayele ku Xikeme, yu watumu kwixana o adyakime a Izalayele, o atwameni, o afundixi, ni athu amukwa exile ni ungana. Ene anga amoneka ku pholo ya Nzambi yakidi. 2 Jozuwé wambela o kifuxi kyoso, wixi: “Jihova o Nzambi ya Izalayele wambe kiki: ‘O jikuku jenu kate mwene ni Tela, tat’â Mbalahamu, ni tata ya Naholo, mu ukulu atungile ku mbandu yamukwa ya ngiji ya Ewufalate. Ene exile mubheza jinzambi jengi.

3 “‘Mu kubhita thembu, Mbalahamu nga mukatula ku mbandu yamukwa ya ngiji ya Ewufalate, éme nga mubhangesa kunyunga o ixi yoso ya Kanana, eme ngasokolola o mbutu yê mu ku mubhana Izake. 4 O Izake ngamubhana Jakobo ni Izawu. Mukusuluka, ngabhana kwa Izawu o mbandu yoso ya milundu ya Seyile kala ixi yê. Jakobo ni an’ê anga akulumuka ku Ijitu. 5 Ku pholo dya kwenda, ngatumikisa Mozé ni Alá ku Ijitu, éme ngabheka mabhebhu ku Ijitu. Mukusuluka, ngamikatula kwenyoko. 6 Kyoso ki ngakatula o jitata jenu ku Ijitu, ene anga abhixila ku musanza wa kalunga, o akwa Ijitu akayela o jitata jenu ni makalu a ita, ni jikabalu kate ku musanza wa kalunga Kakusuka. 7 O jikuku jenu amateka kudikola kwa Jihova, mwene wate kitombe mwaxaxi kenu ni akwa Ijitu, yu wabobesa akwa Ijitu mu menya a musanza wa kalunga. O mesu menu atale o ima yoso i ngabhange ku akwa Ijitu. Enu mwatungu mu kikangalakata mu mivu* yavulu.

8 “‘Eme nga myambata kate ku ixi ya akwa Mamodi, atungile kusambwa* ya Njolodá. Ene abhânge ni enu, maji nga abhakula bhu maku menu phala mutambule o ixi yâ, anga ngajimi o mbutu yâ ku pholo yenu. 9 Kyenyiki, Balake mon’â Zipolo, sobha ya Mowabe weza phala kubhânga ni Izalayele. Mwene wexana Balamu mon’â Bewole, phala kumiloka. 10 Maji eme ngaditunu kwivwa Balamu. Kyenyiki, mwene wa mi besowala muveji javulu, éme nga mibhulula bhumaku mâ.

11 “‘Mukusuluka, enu mwazauka o ngiji ya Njolodá, anga mwabhixila mu mbanza ya Jedikó. Maji o atwameni* a Jedikó ni akwa Mamodi, ni akwa Mapelezi, ni akwa Kanana, akwa Hiti, akwa Jidingaze, akwa Mahivi ni akwa Jebuze abhânge ni enu, maji nga abhakula bhu maku menu. 12 Nga abhangesa kukala ni wôma* wenu, nga akaye ku pholo yenu kala ki ngabhange ku jisobha jiyadi ja akwa Mamodi. Kiki ki mwa kibhange ni xibhata yenu mba ni mifula yenu. 13 Nga mibhana mabhya u mwakambe ku adima, ni jimbanza ji mwakambe kujitunga, enu mwatungu mwenyomo. Enu mwamudya ku ibundu ya mixi ya mividi ni mixi ya midiva i mwakambe ku ikuna.’

14 “Mukiki-phe, Jihova mu kwatelyenu wôma, musidivilenu ngo mwene ni ufiyele* woso. Bwikenu mukaxi kenu o jinzambi joso jexile musidivila o jikuku jenu ku mbandu ya mukwa ya Ewufalate ni ku Ijitu, sidivilyenu Jihova. 15 Kindala, se kya mi ibhila kusidivila Jihova, lelu-phe solenu se mwanda sidivila nanyi. Se o jinzambi jexile mu bheza o jikuku jenu ku mbandu yamukwa ya ngiji ya Ewufalate, mba o jinzambi ja akwa Mamodi mu ixi imwatungu. Maji eme ni dibhata dyami dyoso, twanda sidivila Jihova.”

16 Kyenyiki o mundu wambe, wixi: “Kikola! Etu kitwanda kweha kusidivila Jihova phala kusidivila jinzambi jengi. 17 Jihova Nzambi yetu, mwéne watukatula etu ni jitata jetu mu ixi ya Ijitu, o ixi* ya ubhika, yu wabhange madiwanu amakota ku pholo yetu. Yú watulange mu njila yoso itwabhange kyoso ki twabhiti mwaxaxi ka ifuxi yengi. 18 Jihova wakaye o mundu woso, kate ni akwa Mamodi atungile mu ixi i twatungu. Mukonda dyakiki, etu we twanda sidivila Jihova mukonda mwéne o Nzambi yetu.”

19 Mukusuluka, Jozuwé wambela o mundu, wixi: “Enu ki mutena kusidivila Jihova, mukonda mwene Nzambi yazele, mwene wandala kwila mu mubheza ngo mwene. Mwene kanda loloka o itondalu yenu* ni ituxi yenu. 20 Se muxisa Jihova phala kusidivila jinzambi jengi, mwene wanda ku mikaxtikala ni ku mijikinisa, sumbala wa mibhangele mbote.”

21 O mundu-phe wambela Jozuwé, wixi: “Kana, etu twanda sidivila Jihova!” 22 Jozuwé wambela o mundu, wixi: “Enu mu jimbangi mudyenu mwene ya kwila, enu mwasolo kusidivila Jihova mu vondadi yenu.” Ene atambwijila, exi: “Etu tu jimbangi mwene.”

23 “Kyenyiki-phe, katulenu o jinzambi jengi mwaxaxi kenu, lungenu o muxima wenu kwa Jihova, o Nzambi ya Izalayele.” 24 O mundu wambela Jozuwé, wixi: “Twanda sidivila Jihova Nzambi yetu ni kukumbidila o izwelu yê.”

25 Kyenyiki, mu kizuwa kyenyokyo Jozuwé wabhange kikutu ni mundu, yu wa abhana kitumu ku Xikeme. 26 Mukusuluka, Jozuwé wasoneka o izwelu mu divulu dya kitumu kya Nzambi. Mukyenyiki, wakwata ditadi dyadikota, yu waditula bhoxi dya muxi wadikota wexile bhwa zukama ni kalatódyu ka Jihova.

27 Jozuwé wasuluka mukwambela o mundu, wixi: “Talesenu! O ditadi didi dyanda kala mbangi yetu, mukonda dyevu yoso yatutangela Jihova. Dyanda kala mbangi bhukaxi kenu phala ki muditune o Nzambi yenu.” 28 Kyenyiki, Jozuwé wasulu o mundu,* kala muthu wayi ku ixi yê.

29 Mu kubhita o ima yiyi, Jozuwé mon’â Nune, o selevende ya Jihova wafu, mu kitala kya hama ni dikwinyi dya mivu. 30 Anga a mufunda mu ixi yê ku Timinate-Sela, ku mbandu ya milundu ya Efalayíme, ku thunda ku mulundu wa Ngahaxi. 31 O akwa Izalayele asuluka ni kusidivila Jihova mu izuwa yoso ya Jozuwé, ni mu izuwa yoso ya adyakime exile ku mwenyu kyoso Jozuwé kyafu. Ejidile o ima yoso yabhangele Jihova, phala o mbote ya Izalayele.

32 O ifuba ya Zuze, yeza nayu akwa Izalayele tunde ku Ijitu, ayi mu ifunda ku Xikeme, mu mbandu ya kibhela kyasumbile Jakobo, ku twana twa Hamolo, tata ya Xikeme, mu hama ya mabele a phalata. O kibhela kyakituka undundu wa twana twa Zuze.

33 Kwafu we Eliyazale, mon’â Alá. A mufundu ku kamulundu ka mon’ê Fineya, o kamulundu ka mu bhanene ku mbandu ya milundu ya Efalayíme.