Kiebhi Kia Sange o Kidi Kia Bibidia?

O Bibidia ia kanene kiá kuila kioso kieji fua o jipoxolo ja Kristu, kueji moneka jimesene ja makutu bhu kaxi ka Jikidistá ja dianga, ni kulungulula o kidi kia Bibidia. (Ikalakalu 20:29, 30) Kiki kia bhiti muene kála kia ki kanene. Ene a fungu o milongi ia Kristu ni milongi ia akua Jiphagão ni kua moneka ué Jikidistá ja makutu. (Timote 4:3, 4) Kiebhi ki tu tena kuijiia se mu kidi ihi i longa Bibidia?

O kithangana kia Jihova kutukulula o kidi, kia bhixila. Muéne ua kanene kuila ‘mu izuua isukidila-ku o kuijiia kueji dibandekesa.’ (Daniiele 12:4) Ku muvu ua 1870 o kibuka kiofele kia akua kutokuesa o kidi, a mono kuila o milongi ia jingeleja ki iexile ia Bibidia. Ene a mesenene kuijiia kiambote o milongi ia Bibidia, Jihova ua a besoala ni kuijiia kua kidi.

Athu a unjimu a tokuesa kiambote o Bibidia. O Adilongi a Bibidia, a tu diangele, akexile ni ndunge ia kudilonga o Bibidia, i tuene mu kaiela lelu. Ene akexile mu di longa o jipondo ja Bibidia. Se a sangele-mu maka a bhonzo ku a tendela, a sota velusu ia mukuá phala ku a kuatekesa kuijiia kiambote o maka a mesena. Se a monene kuila o velusu íii ijimbulula o velusu ia mukuá, ene a i soneka. Mukonda dia kuehela o Bibidia kubhana o dijimbuluilu, ene a sange o kidi kia lungu ni dijina dia Nzambi, o Utuminu, o vondadi ia Nzambi ia lungu ni ixi, o ukexilu ua madifundu, ni difukunukinu. O kutokuesa kuku, kua a bhulula ku milongi ia makutu, ni ku ima ia iibha.​—⁠Nzuá 8:31, 32.

Tundé ku muvu ua 1879, o Adilongi a Bibidia a mono kuila o kithangana kia bhixila kia kulondekesa o kidi ku mundu uoso. Ku muvu uenhó, ene a mateka kubhanga o kadivulu ku tuene mu di longa lelu, O Mulangidi Ubhana Ngolokela ia Utuminu ua Jihova. Lelu, O Mulangidi a mu di longa-u ku 240 a ixi ndenge, mu 750 ja madimi ndenge. O kidi kia Bibidia nuka kia dibandekesele kála mu izuua ietu!

• Ihi ia bhiti ni kidi kia Bibidia kioso kiafu Kristu?

• Ihi iene mu tu kuatekesa kuijiia o kidi kia Mak’â Nzambi?