Jihova “Kene ni Kathombo”

O kuila a ku londekesele kiá kathombo? O kuila a kuimine kiá kima ki ua bhingi, salu mba a ku bhangele kiá poko mukonda dia kikonda kiê mba o uhete uê? Se kiki kia bhitile kiá n’eie, k’eie ngó kana. Maji tala o njimbu íii iambote: O ukexilu iú ua iibha uene mu londekesa o athu lelu, ki uene ku diulu kana. O poxolo Kidistá, Phetele, uambe ni kidi kioso: “Nzambi kene ni kathombo ka athu.”—Tanga Ikalakalu 10:34, 35.

Phetele ua tange o izuelu íii, ku dibhata dia muthu kexile mubhezi ua Nzambi, Koloneliu. Phetele, uexile Judé, mu izuua iê o Jijudé akexile mu mona kuila, o athu ka bhezele Nzambi, exile athu a xidi, athu ka tokalele ku bhanga nau ukamba. Kienhiki-phe, mukonda diahi Phetele ua kexile ku dibhata dia Koloneliu? Mukonda Jihova Nzambi muéne ua mu tumine kuia-ku. Phetele ua monene kisuma kua mu tangela: “Kia zelesa Nzambi, eie ku ile uixi kiaxidi.” Sé Phetele ku kijiia, Koloneliu ua monene ué kisuma kua mu monekena anju ia mu tumine kuixana Phetele. (Ikalakalu 10:1-15) Kioso Phetele kia mono kuila Jihova muéne ua kexile mu bhanga o ima íii, muéne ka bhuila mu kuzuela.

Phetele uambe: “Kia kidi kiene, nga mono kuma Nzambi kene ni kathombo ka athu.” (Ikalakalu 10:34) Mu Ngeleku o kizuelu, “ku kala ni kathombo” kilombolola “mukua ku tala o pholo.” Ia lungu ni kizuelu kiki, saí muthu mukua ku tokuesa o Bibidia, ua jimbulula: “Kiki kia difu ni mufundixi u tala ku pholo ia diiala ni ku mu fundisa kana kála kilondekesa o ijila ia ku fundisa, maji mukonda dia pholo iê.” Nzambi ka tala o pholo, o ixi, o unvuama, mba o ima iala na-iu o athu kana.

Mu veji dia kiki, Jihova u tala o muxima. (1 Samuuele 16:7; Jisabhu 21:2) Phetele uambe dingi: “Maji ku akua jixi joso, uoso u mu xila muène, hé u bhanga ioso iaiuka, Muène u mu tambulula.” (Ikalakalu 10:35) O ku xila Nzambi, kulombolola, ku mu bhana kijingu ni ku mu dielela ni ku dituna ku bhanga o ima ia iibhila muéne. O ku bhanga o ima ia iuka, ku bhinga ku bhanga o kima kia tokala bhu pholo ia Nzambi. Jihova ua uabhela o muthu uala ni muxima uambote u mu bhangesa ku bhanga o kima kia tokala.—Matendelelu 10:12, 13.

Se a ku londekesele kiá kathombo, kima kiambote kuijiia o izuelu ia Phetele ia lungu ni Nzambi. Jihova ua mu sunga o athu a ifuxi ioso phala ku bokona mu ubhezelu ua kidi. (Nzuá 6:44; Ikalakalu 17:26, 27) Muéne uivua, anga u tambuijila o misambu ia abhezi iê ka tale o kikonda, mba o ixi ia muthu. (1 Jisobha 8:41-43) Tu tena ku dielela kuila, kioso Jihova kia tala ku ixi, muéne u mona ngó muiji umoxi—o athu mu ixi. Ua mesena kuijiia dingi ia lungu ni Nzambi íii ka moneka kathombo?