Kiebhi o Muthu ua Kazala mu Veji ia Kaiiadi, Kia Tena ku Zediua Dingi

Linda ua di xisa ni muadi uê ua dianga, maji muéne ni Herman a zediua kiavulu mu ukaza. Maji kala kiejiia kiá, o ukaza ua kaiiadi u tena ku bheka maka avulu, mu ukaza ua dianga, ndenge.b

Se ua kazala mu veji ia kaiiadi, kiebhi ki ua mu divua ni kaza diê dia kaiiadi? Saí muhatu dijina diê Tamara, ua kazala mivu itatu ku pholo kioso kia di xisa ni muadi uê ua dianga, uambe: “Kioso ki u kazala mu veji ia dianga, eie u banza kuila o ukaza uê ua-nda nangenena katé ku hádia. Maji mu ukaza ua kaiiadi, nange ki kiene ki u banza dingi, mukonda o ukaza ua dianga ku ua nangenena kana.”

Maji makaza avulu a sange dingi o ku zediua kua kidi kioso kia kazala mu veji ia kaiiadi. Ene a di tundu kiambote mu ukaza uâ ua kaiiadi—eie ué u tena ku zediua dingi! Kiebhi? Tua-nda di longa ibhidi itatu iene mu bhita ni athu, ni kiebhi o milongi ia Bibidia ki tena ku ku kuatekesa ku dibhana ni ibhidi íii.c

KIBHIDI 1: EIE U DI SUÍNISA KU BHANGA IOSO PHALA O UKAZA UA DIANGA KA FIDISE O KU ZEDIUA MU UKAZA UA KAIIADI.

Ellen ua tungu mu ixi ia África do Sul, u zuela: “Ki nga mu tena ku jimba o ukaza uami ua dianga, bhenge-bhenge kioso ki tuia mu ididi mu nga kexile múia ni muadi uami. Saí ithangana ngi kala mu sokesa o ima i bhanga muadi uami lelu ni ima ia kexile mu bhanga o difundu muadi uami.” Kienhiki, se o muadi uê mba o muhatu’ê uexile kiá dikaza, u luuala kiavulu se muéne mu ithangana iavulu u kuata kuzuela maka alungu ni difundu.

NDUNGE: Xikina kuila, uôua ku kingila kuila eie, mba kaza diê, u jimba kiá ni lusolo o ukaza ua dianga, bhenge-bhenge se ua nangenena mivu iavulu. Mu kidi, saí athu a zuela kuila, ene se ku mesena exana kaza diê mu dijina dia kaza dia dianga! Kiebhi ki u tena o ku dibhana ni maka enhá? O Bibidia i tu dimuna: ‘Mua tokala mu di tendela mudienu.’—1 Phetele 3:8.

Kana ku fidisa kaza diê kuzuela maka alungu ni ukaza ua dianga mukonda dia difuba. Se kaza diê u mesena kuzuela ia lungu ni ukaza uê ua dianga, mu ivuidile kiambote ni ku tululuka ni henda ioso. Kana ku banza ni lusolo kuila a mu ku sokesa ni kaza dia dianga. Ianu, diiala ua kazala mu veji ia kaiiadi u zuela: “Muhatu uami Kaitlyn nuka ua ngi fidisa kuzuela maka alungu ni muhatu uami ua dianga. Mu veji dia kiki, muéne u mona kuila kithangana kiambote phala kuijiia ihi ia ngi kuatekesa ku kala ni ifua i ngala na-iu lelu.” Eie ua-nda mona kuila o ithangana íii ia-nda ku kuatekesa ku suínisa dingi o ukamba ni kaza diê.

Tala ngó o ídifua iambote ia kaza diê di uala na-diu kindala kiki. Nange o kaza diê kala ni ífua ioso mba mauhete akexile na-u kaza diê dia dianga. Maji o kaza diê di uala na-diu kindala, uala ni uhete mu ku bhanga ima ia mukuá. Kienhiki, suínisa o ukaza uê ua kaiiadi, ‘kana ku mu sokesa ni muthu uéngi,’ maji xinganeka ni ku tala o kima ki ua uabhela dingi kua kaza diê. (Ngalásia 6:4) Diiala dijina diê Edmond, ua kazala mu veji ia kaiiadi, uambe: “Mukonda ki kuala makamba a iiadi a difu mu ifua, se-ku ué ukaza ua difu ni ukaza uéngi.”

Kiebhi ki u tena o ku lembalala o ima iambote i ua bhange ni kaza diê dia dianga ni ima i ua mu bhanga ni kaza diê dia kaiiadi? Jared u zuela: “Saí kizuua nga zuela ni kaza diami kuila, o ukaza uami ua dianga, uexile kala divulu dia iuka dio soneke kuala o muhatu uami ua dianga n’eme. Sumbala ngi sanguluka kioso ki ngi lembalala o ima i nga bhange ni kaza diami dia dianga, eme nga zediua ni kaza diami dia kindala.”

KIBHIDI 2: EIE U DI SUÍNISA KU DIBHANA NI MAKAMBA OKULU KEJIIA KIAMBOTE KAZA DIÊ DIA KAIIADI.

Javier ua kazala mu veji ia kaiiadi mu ku bhita mbeji jisamanu kioso kia di xisa ni muhatu uê, u zuela: “Kioso ki nga kazala, o muhatu uami ua kexile mu mona kuila saí makamb’ami akexile ku mu tala se ua kexile ni ifua iambote.” Saí diiala dijina diê Leo ua dibhana ni maka engi. Muéne u zuela: “Saí athu akexile mu zuela ku muhatu uami kuila, a zolele kiavulu muadi uê ua dianga—akexile mu zuela kiki bhu pholo iami muene!”

NDUNGE: Fikisa ku kala bhu kididi kia makamba mê. Ianu u tua mu tange kiá, u zuela: “Saí ithangana o makamba okulu, kia a bhonza kiavulu ku bhanga ukamba, se o diiala mba o muhatu ka mu ijiia kiambote kala o kamba di’okulu.” Kienhiki, mu ‘kale mu athu ambote, ni kulondekesa o ku lenduka kuenu ku athu oso.’ (Tito 3:2) Bhana kithangana phala o makamba mê ni ndandu jê a jidile. Kioso o ukaza uê ki uia ni ku kula, o ukamba uê ni akuâ ua-nda lunguluka ué. Javier, u tua mu tange kiá, uambe kuma, kioso o thembu kia kexile mu bhita, muéne ni muhatu uê akexile mu suínisa dingi o ukamba uâ ni makamba okulu. Muéne ua zuela dingi: “Tua soto ku bhanga ué makamba a ubhe, kiki kia tu kuatekesa kiavulu.

Suua o ibanzelu ia kaza diê kioso ki u bhita ithangana ni makamba mê okulu. Mu kifika, se u mateka o kuzuela maka alungu ni kaza diê dia dianga, zuela mu ukexilu ua kuila, o kaza diê dia ubhe ka divue kala ku ua mu zolo. O Bibidia i zuela: ‘Saí athu, u zuelelu uâ u toma ku mixima kala pondo ja xibhata; dimi-phe dia ji hete mu kuzuela, di bheka ku disanza.’—Jisabhu 12:18.

KIBHIDI 3: EIE U DI SUÍNISA KU DIELELA KU KAZA DIÊ DIA KAIIADI MUKONDA O KAZA DIÊ DIA DIANGA KEXILE FIIELE MU UKAZA.

Andrew a mu xisa ku muhatu uê ua dianga, u zuela: “nga kexile ni uôma ua ku ngi xisa dingi.” Maji mu ku bhita thembu, muéne ua kazala dingi ni Riley. “Saí ithangana nga kexile mu di bhuidisa se ngeji tena muene ku kala diiala diambote phala Riley kala kiexile o diiala diê dia dianga. Nga kexile mu thandanganha mu ku banza kuila, muéne u tena kuzuela kuila ki ngi muthu uambote phala muéne ni ku ngi xisa phala ku kazala ni muthu uéngi.”

NDUNGE: Zuela ni kaza diê o maka a mu ku thandanganhesa. O Bibidia i zuela: ‘Bhua kambe o kaiula phala ku mona o phangu ni ndongo, o ima ki i tunda kiambote.’ (Jisabhu 15:22) O ku di kunda ni kaza diê, kua kuatekesa Andrew ni Riley ku di dielela. Andrew u zuela: “Nga zuela Riley, kuila nuka nga-nda ku mu xisa phala ku batula o maka, kiene ué kia ngi tangela Riley. Bhofele-bhofele, nga mu mu dielela ni muxima uami uoso.”

Se o kaza diê, di uala na-diu lelu, a mu nganale ku kaza diê dia dianga, bhanga ioso i u tena phala muéne ku ku dielela. Mu kifika, Michel ni Sabine, a di xisa ni kaza diâ, a te kikutu mudiâ, kia ku di tangela kioso kia di sanga ni kaza diâ dia dianga. Sabine u zuela: “O ku bhanga kiki, ku tu bhangesa ku di dielela ni ku batama ku muxima.”—Efezo 4:25.

Athu avulu a kazala mu veji ia kaiiadi, ene mu ditunda kiambote, kienhiki eie ué u tena ku zediua dingi mu ukaza uê. Nange ua beta ku dijiia dingi kiambote kindala, m’ukulu ndenge. Andrew u tua mu tange kiá, u zuela: “O ukaza uami ni Riley u ngi suínisa kiavulu. Mu ku bhita 13 dia mivu mu ukaza uetu, o ukamba uetu ua kolo dingi—ukamba u tua mesena kuila u nangenena.”