Jezú Kristu—Kiebhi ki tu mu Lembalala?

Mu mbeji ia Kaiadi, athu ku mundu uoso, ene mu mona jifoto mba ifikula ia Jezú kála kabuetele. A mu zekesa mu kidilu kia ibhaku, kaxa ionene mua kexile mu tula o kúdia phala o ibhaku. Maji o kuila tua tokala ku mona ngó Jezú kála kabuetele?—a Tua-nda di longa o ukexilu ua beta o kota ua ku mu lembalala. Tu tena ku di longa ku musoso ua lungu ni ima ia bhitile ni abhidi akexile mu kuinga o jimbudi jâ m’usuku bhua zukamene o mbanza ia Beleme.

Kua tukulukila anju ku abhidi. Muéne ua a tangela: ‘A mi vualela Mubhuludi, muéne Kristu, muéne Ngana.’ O anju ia a tangela kuila, ene eji sanga Jezú ‘a mu futu mu milele, a mu zekesa mu kidilu kia ibhaku.’ Mu kithangana kieniókio, ku tukuluka kifuxi kia mukuá kia ji-anju a kala mu ‘kuimba mimbu ia ku ximana Nzambi.’

Kiebhi ki ueji dívua se uevuile ji-anju ku ximana Nzambi?—O abhidi a sanguluka! Ambe: “Tuienu hanji katé mu Beleme, tua ka tale ioso ia bhiti-mu.” Kuenhoko, ene a sange “Madiia ni Zuze, ni kamona ka zeka mu kidilu kia ibhaku.”

Mu ku bhita ithangana, athu a mukuá eza mu Beleme mua kexile Madiia ni Zuze. Kioso o abhidi kia a tangela ioso ia bhitile, ene oso a diuana kiavulu. Ua sanguluka mu kuijiia o ima íii iambote?—Etu oso tua zolo Nzambi, tua sanguluka. Tu mone se mukonda diahi o uvualukilu ua Jezú, ua sangulukisa kiavulu o abhidi. Maji phala ku tendela kiambote o maka enhá, tua tokala ku vutuka mu thembu ande dia Madiia ku kazala.

Saí kizuua, Madiia a mu kundu ku anju Ngabidiiele. O anju ia mu tangela kuila, ueji vuala mona ueji ‘kala muthu ua di kota, a ka mu ixana Mon’a Nzambi ia diulu.’ Ngabidiile uambe dingi: ‘Muéne ua ka tumina kála sobha. O ungana uê ki ua ka bhua dingi.’

Madiia ua mesenene kuijiia kiebhi kiki kieji bhita, mukonda muéne nuka ua zekele ni diiala. Kienhiki, Ngabidiiele u mu jimbulula: “O nguzu ia Nzambi ia Diulu ia-nda ku ku vungina kizúzumbia kiê. Kibhangesa kuila o mona ukôla ua-nda ku mu vuala a mu ixana Mon’a Nzambi.” O ku katula o muenhu ua mon’a Nzambi ku diulu ni ku u tula mu mala a Madiia ni ku kula kála kabuetele—madiuanu a dikota!

Ua muene kiá jifoto mba ifikula ja mu londekesa mala atatu “a unjimu” a mu ku kunda o kabuetele Jezú kumoxi ni abhidi?—Mu mbeji ia Natale, o jifoto jiji jene mu moneka kiavulu. Maji jene, ki ja kidi kana. O mala a tatu enhó, ‘mala a unjimu’ akexile mu bhanga ima ia iibhila Nzambi, ene exile akua ku di longa o jithéthembua, akua ku zambula mu kaxi ka jithethembua. Tu mone ihi ia bhiti kioso ene kia bhixila mu Beleme. O Bibidia i zuela: “A bokona m’onzo, a sanga kamona ni Madiia mam’â.” Kienhiki, Jezú kexile dingi kabuetele a mu zekesele mu kidilu kia ibhaku kana; muéne uexile kiá kamona ua kexile kumoxi ni Zuze ni Madiia mu dibhata dimoxi!

Kiebhi o akua ku di longa o jithéthembua kia sange Jezú?—ene a endesa ku “thethémbua,” kana ku mbanza ia Beleme, maji kia dianga a endesa kua sobha Helode mu mbanza ia Jeluzaleme. O Bibidia i zuela kuila Helode ua mesenene ku jibha o kamona. Kienhiki, xinganeka. Ko kuê, nanhi ua tumikisa o thethémbua ióio kuendesa akua ku di longa jithéthembua katé ku sobha Helode?—Ki Jihova, o Nzambi ia kidi kana, maji o nguma iê, Satanaji o Diabhu!

Lelu Satanaji, u bhangesa o athu ku banza kuila, Jezú, kabuetele hanji, ua kambe nguzu. Maji o anju Ngabidiiele ua zuela kua Madiia: ‘Muéne ua ka tumina kála sobha. O ungana uê ki ua ka bhua dingi.’ Kindala Jezú ua mu tumina kiá kála Sobha ku diulu ni kuila muéne ua-nda buikisa o jinguma joso ja Nzambi. Mukonda dia kiki, tua tokala ku lembalala Jezú ni kuila tua bhingi ué ku tangela akuetu o maka enhá.