Ihi Ia-nda Bhanga Nzambi ni Kuiibha

O Bibidia i tu tangela ihi ia-nda bhanga Jihova ni mon’ê, Jezú Kristu ku hadi iene mu bheka Satanaji, o Diabhu. Iene i zuela: “Kiene kia bhekele Mon’a Nzambi kuíza phala ku buika o ibhangelu ia Diabhu.” (1 Nzuá 3:8, NW) O mundu iú uezala ni luímbi, unguma ni kuiibha, a-nda u buikisa. Jezú u tu tangela kuila ‘ua-nda kaia o sobha ia mundu iú’—Satanaji o Diabhu. (Nzuá 12:31) Kioso Satanaji kia-nda mu buikisa, o mundu uobhe ua-nda kuíza, ni ku kala kididi kia ku tululuka.—2 Phetele 3:13.

Ihi ia-nda bhita ni ió a dituna ku lungulula o ifua iâ, a jiji mu ku bhanga ima ia iibha? Xinganeka mu izuelu íii: “Kuma athu ambote ene a kà tunga mu ngongo, oso aiuka muxima a kà nangenena muenhomo. Maji akua-phulu mu ngongo a kà buikisa-mu, o ibalukutu a kà vuza-mu muene.” (Jisabhu 2:21, 22) O athu a iibha ka-nda kala-mu dingi. Kienhiki, o athu a belesela a-nda ku a bhulula ku ituxi ia a-nda kala athu a iuka.—Loma 6:17, 18; 8:21.

Kiebhi Nzambi kia-nda zubha o kuiibha ku mundu ua ubhe? Ka-nda katula ku athu o ujitu ua ku sola mba ku a bhangesa ku kala kála jimakina. Maji muéne ua-nda longa o athu a belesela o jinjila jê, ni ku a kuatekesa ku lenga o ibanzelu ia iibha.

Ihi ia-nda bhanga Nzambi ni mavuua ene mu kuíza sé athu ku kijiia? Muéne ua tu tangela kuila o nguvulu ia Utuminu uê ua-nda langa o ixi. O Sobha ia Utuminu ua Nzambi, Jezú Kristu, uala ni kutena kua ku saka. (Matesu 14:14) Jezú uala ni kutena kua ku langa o ibhangelu ioso mu ixi. (Marku 4:35-41) Kienhiki o “ibatu ni jithembu,” ki ja-nda bheka dingi hadi ku athu. (Ngongixi 9:11) Ku Utuminu ua Kristu, kana-ku mavuua a-nda bhanga kia iibha ku athu.—Jisabhu 1:33.

Ihi ia-nda bhanga Nzambi ku athu afu ku mavuua? Kioso kia zubhile ku fukununa kamba diê Lázalu, Jezú uambe: “Eme ngi difukunukinu ni muenhu.” (Nzuá 11:25) Kiene muene, Jezú uala ni kutena kua ku fukununa mba ku bheka dingi ku muenhu uoso ua fu!

Se ua sanguluka mu kuijiia kuila o athu ambote ka-nda bhita dingi mu ima ia iibha, mukonda diahi ku di longe o Bibidia phala kuijiia dingi ia lungu ni Nzambi ia kidi ni vondadi iê? O Jimbangi ja Jihova ku diembu diê a-nda sanguluka ku ku kuatekesa ku kala ni kuijiia kuku. Tua mu ku suínisa ku a sota ku diembu diê, mba soneka ku kibuka kia athu edika o kadivulu kaka.