DIAMBU DIA KAPA | KIEBHI O BIBIDIA IA NANGENENA KATÉ MU IZUUA IETU?
O Bibidia ia Nangenena né Muene ni Ibhidi ia Mivu-ni-Mixinda
O KILUEZU: Ku dimatekenu o asoneki, a sonekene o Bibidia mu mikanda ia dibu ni mu mikanda ia malânda.a (2 Timote 4:13) Kiebhi o mikanda íii, ia te o Bibidia mu iluezu?
O mikanda ia dibu, i tanduka ni lusolo, o tinda i tunda, i zoza ué ni lusolo. O Ngijiie Richard Parkinson ni Stephen Quirke ambe “mu kubhita thembu o mukanda u botomoka kála mbombo, u kituka mavu. O mukanda se a u bhaka thembu iavulu, u kuata mofo mukonda dia kutalala, maji se a u funda u kuata sualala.” Saí mikanda ia dibu kioso kia i sange, a i bhake mu ididi mua vudile mukengeji, ni kutalala, mukonda dia kiki ia zanganha ni lusolo.
O mikanda ia malânda i nangenena dingi o ia dibu ndenge maji iene i zanganha ué se ka mu i langa kiambote mba se a i ta mu kididi mua tema kiavulu mba mua talala kiavulu.b O mikanda ia malânda i kuata ué sualala. Saí divulu dia zuela kuila, sai “ithangana o ima i nangenena, maji sai bhabha ki i nangenena.” Mu kiki se o mikanda ia Bibidia ia zanganhele, o njimbu iê ki ieji bhixila katé mu izuua ietu.
O BIBIDIA IA NANGENENA KIEBHI: O kitumu kia Jijudé kia tendelesele kuila, o jisobha joso a tokalele ‘kukopiiala o Kitumu kiki mu divulu phala ene,’ o kitumu kiala mu madivulu atanu a dianga mu Bibidia. (Matendelelu 17:18) O asoneki a katunda, a soneka uá mikanda iavulu, mukonda dia kiki ku hama ia dianga K.K. o Mikanda Ikola ia kexile mu malombe moso a Izalaiele ni ku maxokololo a Masedonha! (Luka 4:16, 17; Ikalakalu 17:11) Ihi ia kuatekesa o mikanda iokulu ku nangenena katé mu izuua ia lelu?
Mikanda ia Mar Morto, ia nangenena mu hama ja mivu mukonda a i bhakele mu masanga ni mu makungu a kukuta
O ngijiie ia Kikutu Kiobhe ngana Philip W. Comfort uambe: “O Jijudé a ejidile mukonda dia ukexilu uâ, ua kubhaka o mikanda mu masanga phala ki i zanganhe.” O Jikidistá akexile hanji mu kaiela o ukexilu iú. Mukonda dia kiki, saí mikanda ia Bibidia a i sange mu masanga, mu maxilu a vundu, mu makungu ni mu mikáu.
O MBOTE: Mazunda ni mazunda a mikanda ia Bibidia nange iala kiá ni 2.000 ja mivu, ia nangenena katé mu izuua ietu. Sé-ku dingi divulu diala ni mikanda iokulu-kulu kála o Bibidia.
a O mikanda ia dibu, akexile mu i bhanga ni muxi u kudila mu ngiji, a uixana dibu. O mikanda ia malânda akexile mu i bhanga ni ibha ia iama.
b Mu kifika, o mukanda u tanga o Ufolo ua Estados Unidos, a u sonekene mu mikanda ia malânda. Mu lelu didi kua bhiti kiá 250 a mivu ndenge, athu k’ene mu tena kumona kiambote o isoneku iê.