O Kikalakalu Kia Uabha Dingi
1. Kikalakalu kiebhi kia ku saka mu ukexilu ua nzumbi, kia mu bhita mu izuua ietu?
1 Kisangusangu kia dikota kia kexile na-kiu o athu ku hama ia dianga, mukonda dia ku a saka mu ukexilu ua xitu. (Luka 5:24-26) Mu izuua ietu, tu sanguluka mu kikalakalu kia ku saka mu ukexilu ua nzumbi. (Dijingunuinu 22:1, 2, 17) Kisangusangu kia dikota ku tanga o misoso ia athu a lungulula o ukexilu uâ ua muenhu, mu kikuatekesu kia Jihova, ni kia nzumbi ikôla! Kima kiambote ku bhanga o kikalakalu kiki, ni ku longa dixibulu ua mu di tunda kiambote mu milongi ia Bibidia.
2. Kisangusangu kiebhi ki tu kala na-kiu, kioso ki tu longa o kidi ku muthu?
2 O dijina dia Nzambi nanhi? Mukonda diahi Nzambi uehela o hadi? Ihi ia-nda bhanga o Utuminu ua Nzambi phala o athu? Etu ki tua mesena ngó ku tambuijila o ibhuidisu íii, maji tu mona ué o kisangusangu kia dixibulu kioso kiaia ni ku di longa o kidi. (Jisa. 15:23; Luka 24:32) Kioso o dixibulu kia kula, muéne u tena ku tumbula o dijina dia Jihova, ku lungulula o ukexilu uê ua ku zuata, ni ua ku di iudika, kuehela o maukexilu a iibha, ni ku longa akua. Se muéne n’a suu mbambe mu ku di bhakula, ni ku di batizala, muéne ua-nda kala phang’etu, ni ku bheza kumoxi n’etu. O kuijiia o ima íii, ku tu bhangesa ku sanguluka.—1 Tesalonika 2:19, 20.
3. Ihi i tua tokala ku bhanga phala ku mateka ku longa o Bibidia ku muthu?
3 O Kuila Eie u Tena ku Bhanga Mbandu? Se eie ua mesena ku bhanga mbandu ku kikalakalu kiki kia uabha dingi, bhinga kua Jihova o kikuatekesu kia ku longa o Bibidia ku muthu, ni ku kalakala kála ki ua bhingi mu musambu uê. (1Nzuá 5:14) Samba phala kuijiia se kuebhi ku u tena ku sanga o athu. Mu ithangana ioso, longa o Bibidia ku athu. (Ndongixi 11:6) Kioso ki u sanga muthu ua xikina o milongi ia Bibidia, vutuka phala ku mu kuatekesa.—1 Kolindo 3:6-9.
4. Mukonda diahi tua tokala ku longa o athu ni lusolo?
4 Kuene hanji athu avulu ala ni nzala, ni dinhota dia kuívua, mba kuijiia o kidi. Nanhi ua-nda ku a kuatekesa mu ukexilu ua nzumbi mu ku a longa o Bibidia? (Matesu 5:3, 6) Tua mesena ku kuatekesa mu ku bhanga o kikalakalu kiki, mu ku samba, ni ku bhanga maxibulu ande dia ku zubha o kikalakalu kiki.—Izaia 6:8.