O Kuila Eie Uexile Kiá Muboki ua Thembu Ioso?
1. Ujitu uahi athu avulu ene mu katula mbote, maji ihi ia bhingi ku bhanga o jiphange ja mukua?
1 Mivu joso, athu avulu ene mu katula mbote mu ujitu ua ‘ku longa ni ku tula o njimbu iambote,’ kála aboki a thembu ioso. (Ikalakalu 5:42) Saí jiphange, a xisa o kikalakalu kiki, mukonda dia ima iavulu. Se eie uexile muboki ua thembu ioso, o kuila ua di tonginina kiá se u tena ku kalakala dingi kála muboki ua thembu ioso?
2. Mukonda diahi o jiphange akexile kiá aboki a thembu ioso m’ukulu, kima kiambote ku mona se a tena ku vutuka dingi mu kikalakalu kiki?
2 O Ithangana i Lungulula: Ki tena ku kala kuila, o kima kia ku bhangesa ku xisa o kikalakalu kiki, kia bhiti kiá. Mu kifika, se eie ua xisa o kikalakalu kia muboki ua thembu ioso, ua mono kuila ki uexile mu bhanga dingi 90 a ji ola, o kuila u tena ku vutuka mu kikalakalu kia muboki ua thembu ioso, mu ku bhanga 70 a ji ola? O kuila eie ki kuala dingi ni ikalakalu iavulu ku muiji, kála ki ua kexile muboki ua thembu ioso? Phang’etu ia muhatu ua xile o sidivisu ia thembu ioso mukonda dia sauidi, ua vutuka dingi mu sidivisu íii, mu 89 a mivu. Muéne ka bhangele mu inzo ia ku saka muvu ua muvimba, kioso kia tundu, ua mono kuila, ueji tena ku kala dingi muboki ua thembu ioso!
3. Kiebhi o athu ku muiji a tena ku kuatekesa muthu ku muiji, ku kala muboki ua thembu ioso?
3 Nange eie m’ukulu ku kexile muboki ua thembu ioso, maji saí muthu ku muiji uê ua xisa o kikalakalu kiki, mukonda ua kexile mu langa muthu ku muiji, kála o tata ua kuka kiá. (1 Tim. 5:4, 8) Mu kithangana kiki, ihi ia tena ku bhanga o athu engi ku muiji, phala ku mu kuatekesa? Mukonda diahi ki mu zuela mudienu o maka enhá? (Jisa. 15:22) Kioso o athu ku muiji a kuatekesa muthu phala ku kala muboki ua thembu ioso, enioso a tena ku divua kuila, a mu bhanga o kikalakalu kiki.
4. Ihi i u tena ku bhanga se ku tena ku kalakala kála muboki ua thembu ioso, mu kithangana kiki?
4 Kana ku luuala, se u mona kuila, ki u tena dingi ku vutuka mu sidivisu ia thembu ioso. O vondadi iê ia ku bhanga o kikalakalu kiki, ki sangulukisa Jihova. (2 Kol. 8:12) O uhete uê ua ku longa, i ua di longo mu sidivisu ia thembu ioso, ua-nda ku kuatekesa mu ukunji uê. Bhinga kikuatekesu kua Jihova mu musambu ua lungu ni vondadi iê, ni ku tonginina o kithangana kiê phala ku lungulula o ukexilu uê ku muenhu. (1 Nzu. 5:14) Nange mu ku bhita kithangana, Jihova ua-nda ku jikula ‘dibhitu dia kikalakalu kiambote’ phala ku kala dingi ni kisangusangu kijila mu kalakala kála muboki ua thembu ioso!—1 Kol. 16:9.