“Ehela o Mukengeji Uenu u Muikine”
1. Ujitu uahi u tuala nau phala ku u zuela ku athu?
1 Tundé mu kamene, katé mu usuku, o mukengeji u bhana kijingu kua Jihova Nzambi. Mu kiki, o mukengeji uexana Jezú phala o akaiedi iê ku kala nau, uexile uéngi—“o mukengeji ua muenhu.” (Nzuá 8:12) Ku kala ni kitendelesu kiki mu nzumbi, ujitu uonene u bhinga kikalakalu kia dikota. Jezú uambe: “O mukengeji uenu u muikine bhu pholo ia athu,” phala ku kuatekesa akuenu ku katula mbote. (Mat. 5:16) Bhu kaxi ka milongi a makutu lelu, o mukengeji iú, ua tokala ku u zuela ku akuetu, nuka kua bhingile ku bhanga kiki ni nguzu ioso! Kiebhi ki tu tena kuehela kuila o mukengeji uetu u muikine, kála kia bhange Kristu?
2. Kiebhi Jezú kia londekesa o valolo ia kuboka o njimbu iambote?
2 Mu Kuboka: Jezú ua katula mbote mu kithangana kiê, mu nguzu iê, ni ioso ia kexile na-iu, phala ku boka o njimbu iambote, ku athu mu jinzo jê, mu ikoka, ku mulundu—kuoso kuexile athu. Muéne ua mono o valolo ia ku longa o athu mu ukexilu ua nzumbi. (Nzuá 12:46) Phala o akaiedi iê a tena ku sanga athu avulu, Jezú ua a pelepalala phala n’a kale o “mukengeji ua mundu.” (Mat. 5:14) Ene ehela o mukengeji uâ ku muikina, mu ku bhanga o mbote ku jivizinhu jâ, ni ku a longa o kidi kia Nzambi.
3. Kiebhi ki tu tena ku bhana valolo ku mukengeji ua kidi?
3 O mundu ua Nzambi o mona o valolo ia “kuenda kála an’a a mukengeji” ene a boka bhu ididi ioso bhuala o athu. (Efe. 5:8) Ku tanga o Bibidia mba madilu engi bhu kaxi ka athu, mu sidivisu, bhu xikola, ki bhana kithangana phala kuzuela ni muthu ia lungu ni Bibidia. Mukonda dia kiki, phange ia muhatu ua mateka ku longa muthu o Bibidia, iú ua bhana madilu ku 12 dia jikoleka jê!
4. Mukonda diahi kuehela kuila o mukengeji uetu u muikine, ku bhinga ku kala ni ukexilu uambote?
4 Bhu Kaxi ka Kikalakalu Kiambote: Kuehela o mukengeji uetu ku muikina izuua ioso, kua bhingi ué o ukexilu uetu uambote mu kizuua ni kizuua. (Efe. 5:9) Mu kikalakalu, bhu xikola, ni bhu ididi bhuala athu, o ukexilu uetu a u mona ku athu ni ku tu bhana kithangana phala kuzuela o kidi kia lungu ni Bibidia ku athu. (1 Phe. 2:12) Mu kifika, o ukexilu uambote ua mona ndenge uala ni itanu ia mivu, ua bhangesa o mulongexi uê kuixana o jitata jê. Muéne uambe, “Nuka nga mono mona uala ni kuijiia kua soko, kua ku tungula o ima ia iambote, ni ia iibha!” Kiene, o sidivisu ietu ia kuboka, ni ukexilu uambote, u bhangesa o athu ku xikina “o mukengeji ua muenhu,” ni ku bhana kijingu kua Nzambi ietu.