O Kuila u Tena Kuboka Kia Lumingu?
1. Ihi i tu di longa ia lungu ni ibhangelu ia Phaulu ni jiphange ja mukua, mu mbanza ia Filipe?
1 O kizuua kia Sábhalu kikôla, kiexile kizuua kia Jijudé mu Filipe ku nhoha. Phaulu ni jiphange ja mukua, akexile mu kunda o mbanza mu ikalakalu iâ ia kuboka. Se-ku muthu ueji ku a zuela, mukonda dia kuboka mu kizuua kiná. Ene ejidile kuila o Jijudé a diongeka bhu kanga phala ku samba, mu kiki, ene a katula mbote mu kithangana kiâ, phala ku a tula o njimbu iambote. Kisangusangu kia dikota, kioso Phaulu ni jiphange a kexile nau, a mono kuila Lídia ua xikina i a mu batizala muéne ni muiji uê uoso! (Ikalakalu 16:13-15) Mu kuijiia kuila lelu athu avulu a nhoha mu kizuua kia Lumingu, mukonda diahi ku katula mbote mu kizuua kiki, phala ku a tula o njimbu iambote?
2. Ibhidi iahi o mundu ua Jihova ua bhiti, phala ku boka kia Lumingu sé kizukutisu?
2 O Ibhindamu ia Kuboka Kia Lumingu: Ku muvu ua 1927, O mundu ua Jihova a a suínisa kuboka kia Lumingu. Kiki, kia bhangesa ku a zukutisa. Ku ixi ia Estados Unidos, avulu a a kutile, mu ku xibhaka o kijila kia Lumingu ni kia Sábhalu kikôla, mu ku katula o paze, ni ku sumbisa sé o madukumendu a jinguvulu. Maji o mundu ua Nzambi ka palala mu kuboka. Ku muvu ua 1930, ene a bhange “kikalakalu kia kibuka ni kibuka,” bhu kaxi ka kikalakalu kiki, o aboki a ilunga ia zukama, akexile mu boka o mbambe ioso. Mu kithangana kia kutu o aboki, kua kexile avulu ka tena ku a kuta ku maungana. O kuila eie u bhana valolo mu nguzu ia bhange o jiphange jiji, mu ku boka kia Lumingu sé kizukutisu?
3. Ihi i bhangesa o kizuua kia Lumingu ku kala kizuua kiambote phala kuboka?
3 Kizuua Kiambote Phala Kuboka: Mundu uavulu uala bhu bhata kia Lumingu. Ene ala dingi ni kithangana kia ku nhoha. Saí akua jingeleja, nange a mesena kuzuela dingi ia lungu ni Nzambi, mu kizuua kiki. Se o kiônge kietu kia Lumingu, o kuila tu tena ku tunda mu sidivisu ia kuboka ande mba kioso ki zubha o kiônge?
4. Kisangusangu kiahi ki tu kala na-kiu, se tu boka mu kizuua kia Lumingu?
4 Se tu boka mu kizuua kia Lumingu, tua-nda kala hanji ni kithangana phala ku nhoha. Mu ku nhoha, tua-nda kala ni kisangusangu mu kuijiia kuila tua kalakala mu sidivisu ia Nzambi mu kizuua kieniókio. (Jisa. 19:23) Tu tena ku kala katé muene ni kisangusangu kia ku sanga muthu kála Lídia!