“O Ukunji Uetu—Ulondekesa Muanhu”
1. Kiebhi Jihova kiene mu londekesa o muanhu ku athu?
1 Nzambi mukua muanhu ni athu oso. (Mak. 34:6; Jisá. 106:41-45; 2 Phe. 3:9) O phangu iê ia muanhu, a tena ku i mona mu kaxi ka kikalakalu kia kuboka o Utuminu, ku mundu uoso. Jihova ua kalakala ni athu mu 2,000 ja mivu, mu kienhiki, muéne uene hanji mu bhangesa o athu ku mu zukama. (Nzuá 6:44) Kiebhi ki tu tena ku kaiela o muanhu ua Jihova, mu ukunji uetu?
2. Kiebhi ki tu tena kulondekesa o muanhu, kioso ki tu kalakala mu mbambe ietu?
2 Kuboka Inzo ni Inzo: Etu tu kaiela o muanhu ua Jihova, mu ku boka sé ku palala mu jimbambe muoso muala o athu ka londekesa luua kuila a mesena. (Ikalakalu 5:42) Etu ni muanhu uoso, tu di bhana ni athu ka mesena kuívua, ni izukutisu mu ukunji uetu. (Marku 13:12, 13) Etu ué tu londekesa muanhu, mu ku kolokota mu nguzu ietu ia ku kunda o athu, né muene se ki bhonza ku a sanga ku mabhata mâ.
3. Mukonda diahi kua bhingi muanhu, kioso ki tu kunda dingi ni kioso ki tu longa o maxibulu metu?
3 Ku Longa o Bibidia: Ku kuna o mbutu, ku bhinga muanhu. Etu tu tena ku langa, maji ki tu tena ku i bhangesa kukula ni lusolo. (Tiia. 5:7) Kiene kimoxi, o kukula mu nzumbi ki ku bhita ni lusolo. (Marku 4:28) Oso a di longa kumoxi n’etu, a tena ku mona kuila kia bhonzo ku xisa o ulongelu ua makutu, mba ídifua a i fidisa mu Bibidia. Etu ki tu tokala ku bhangesa o dixibulu kukula ni lusolo, mu ku mu jijidika ku lungulula o ukexilu ua muenhu uê. Kua bhingi muanhu, ni kithangana kia soko phala o nzumbi ikola ia Nzambi, i mu kuatekese.—1 Kol. 3:6, 7.
4. Kiebhi o muanhu u tu kuatekesa ku bhana umbangi ku jindandu jetu, ki abhezi a Nzambi?
4 Jindandu ki Abhezi a Nzambi: Sumbala etu tua mesena kuila o jindandu jetu a di longa o kidi, etu tua tokala tu londekesa o muanhu mu ku kingila o kithangana kia tokala, phala ku a longa o kidi kia Nzambi, ni ku di langa phala ki tu a bhana milongi iavulu. (Ndo. 3:1, 7) Mu kiki, tu bhana umbangi mu kaxi ka phangu ietu, ni ku kala polondo phala ku a longa ni kutululuka ni ku xila kuoso. (1 Phe. 3:1, 15) Mu kidi, o ku longa ni muanhu, kua-nda bhangesa o ukunji uetu ku tunda dingi kiambote, ni ku bhana kisangusangu kua Tata ietu ia diulu.